بۇگىن قىزىلوردادا «2016 جىلى قىزىلوردا وبلىسىندا شاعىن جانە ورتا كاسىپكەرلىكتى دامىتۋ سالاسىنداعى جەتىستىگى ءۇشىن» وبلىستىق كورمە-كونكۋرسى ءوتتى. قىزىلوردا وبلىسىنىڭ اكىمى قىرىمبەك كوشەرباەۆ جەڭىمپازداردى قۇتتىقتاپ, ايماق ەكونوميكاسى ءۇشىن شاعىن جانە ورتا كاسىپكەرلىكتىڭ ماڭىزدىلىعىن اتاپ ءوتتى.
- قازىرگى تاڭدا وبلىسىمىزدا ءوڭىرىمىزدىڭ الەۋمەتتىك-ەكونوميكالىق جاعدايىنا زور ۇلەسىن قوسىپ وتىرعان 5 مىڭعا جۋىق شاعىن جانە ورتا بيزنەس كاسىپورىندارى جانە 35 مىڭنان استام جەكە كاسىپكەرلەر مەن شارۋا قوجالىقتارى جۇمىس جاسايدى. اتالعان سەكتوردا 100 مىڭعا جۋىق ادام جۇمىسپەن قامتىلعان – بۇل وبلىستاعى ەكونوميكالىق بەلسەندى حالىقتىڭ ۇشتەن ءبىر بولىگى. قازىر دە قۇرىلىپ جاتقان جاڭا جۇمىس ورىندارىنىڭ نەگىزگى بولىگى وسى شاعىن جانە ورتا كاسىپكەرلىكپەن قامتاماسىز ەتىلىپ جاتقاندىعى, كاسىپكەرلىككە قولايلى ورتانى قالىپتاستىرماي ەكونوميكانى دامىتۋ مۇمكىن ەمەستىگى, ورتا سىنىپ – قوعامداعى تۇراقتىلىقتىڭ نەگىزى ەكەندىگىندە ەشكىمنىڭ دە تالاسى جوق دەپ ويلايمىن,- دەدى وبلىس اكىمى قىرىمبەك كوشەرباەۆ.
وبلىستىق كورمە-كونكۋرس اياسىندا شاعىن جانە ورتا كاسىپكەرلىك ونىمدەرى مەن تاۋارلارىنىڭ كورمەسى ۇيىمداستىرىلدى. كونكۋرسقا بارلىعى 40 كاسىپورىن قاتىستى. «ءوندىرىس سالاسىنداعى جەتىستىكتەرى ءۇشىن» نوميناتسياسى بويىنشا ءۇشىنشى ورىندى قازالىلىق جەكە كاسىپكەر ماناس بيگەرەستانوۆ, ەكىنشى ورىندى «مير-2001» جشس السا, ءبىرىنشى ورىنعا «كنك كەميكال» جشس يە بولدى. «ازىق-ت ۇلىك ونەركاسىبى سالاسىنداعى جەتىستىگى ءۇشىن» نوميناتسياسى بويىنشا ءۇشىنشى ورىندى شيەلىلىك جەكە كاسىپكەر سابىر ەرماحانوۆ يەلەنسە, ەكىنشى ورىندى «قاراشالاڭ» سەرۆيستىك دايىنداۋ ورتالىعى» الدى. ال ءبىرىنشى ورىنعا «قىلىش» شارۋا قوجالىعى يە بولدى. «جەڭىل ونەركاسىپتەگى جەتىستىكتەرى ءۇشىن» نوميناتسياسى بويىنشا ءۇشىنشى ورىندى سىرداريا اۋدانىنىڭ جەكە كاسىپكەرى جانىبەك ماحانبەت, ەكىنشى ورىندى جەكە كاسىپكەر «مسك», ال ءبىرىنشى ورىندى «DALATEX» جشس الدى.
جەڭىمپازدار ديپلومدار مەن باعالى سىيلىقتارمەن ماراپاتتالدى. بۇدان بولەك, كاسىپكەرلەر وبلىس اكىمىنىڭ العىس حاتىمەن ماراپاتتالدى. 1991 جىلى دۇنيەگە كەلگەن تاۋەلسىزدىكتىڭ ءتول قۇرداستارىنا جەكە ناگرادالار تابىستالدى.