مۇناي ءوندىرىسىن قىسقارتۋ تۋرالى كەلىسىمشارتتىڭ ءساتتى اياقتالۋى نارىقتا ءىرى وزگەرىستەرگە جول اشىپ, باعانى 2015 جىلدىڭ ورتاسىنان بەرگى ماكسيمۋمعا كوتەردى.
وپەك پەن وعان كىرمەيتىن وزگە مۇناي ەكسپورتتاۋشى ەلدەردىڭ 2017 جىلدىڭ 1 قاڭتارىنان باستاپ ءوندىرىستى 1,8 ملن باررەلگە ازايتۋ تۋرالى كەلىسىمشارت ناتيجەسىندە بۇگىن استانا ۋاقىتىمەن ساعات 17:00-دە برەنت ماركالى مۇنايدىڭ باعاسى 56,50 دوللارعا تۇراقتادى. ال امەريكاندىق WTI مۇنايى 53,80 دوللارعا ساۋدالانۋدا.
جوعارىدا اتالعان كەلىسىم كەلەر جىلدان باستاپ ءوز كۇشىنە ەنەتىندىكتەن, قازىر ەكسپورتتاۋشى مەملەكەتتەر ءوندىرىستى بارىنشا ارتتىرۋعا تىرىسقان. سونىڭ ىشىندە ساۋديا مەن يراكتاعى ءوندىرىس كولەمى ايتارلىقتاي ۇلعايدى. ونسىز دا ساۋد ارابياسى قاراشا ايىندا رەكوردتىق دەڭگەيدە مۇناي وندىرگەن ەدى. قازاقستان بىرەر اي بۇرىن اشىلعان قاشاعان كەن ورنىنىڭ ارقاسىندا ەكسپورت كولەمىن ەڭ جوعارعى دەڭگەيگە جەتكىزگەن.
نارىقتاعى وسىنداي جارىستىڭ ناتيجەسىندە ۇلتتىق ۆاليۋتامىز اقش دوللارى مەن ەۋروعا شاققانداعى باعامى ءبىر جارىم اي بۇرىنعى مينيمۋمعا دەيىن ءتۇستى.
جالپى, نارىق زاڭدىلىعىنا سايكەس, ءوندىرىس كولەمى ارتقاندا مۇنايمەن كۇن كورىپ وتىرعان ەلدەردىڭ ۆاليۋتالارى السىرەۋى ءتيىس ەدى. ال بۇل جولعى كەرىسىنشە ءۇردىستىڭ باستى سەبەبى, بيرجاداعى ساۋداگەرلەردىڭ كەلەر جىلعا قاراي بەيىمدەلۋى.
ساراپشىلاردىڭ ايتۋىنشا, مۇناي باعاسى جاڭا داۋىرگە قادام باسىپ, قۇبىلۋ دەڭگەيى جاڭاشا دالىزگە كوتەرىلدى. شامامەن الداعى ۋاقىتتا قارا التىن 50 دوللاردان تومەنگە تۇسپەيتىن سەكىلدى.
ال وپەك كەلىسىمىنىڭ جۇزەگە اساتىنىنا كۇمانمەن قاراۋشىلار اتالعان قۇجاتتىڭ تەك قاعاز بەتىندە قالىپ, جەمە-جەمگە كەلگەندە ەشبىر ەل نارىقتاعى ۇلەسىنەن ايىرىلعىسى كەلمەي, بۇرىنعى كولەمىن ساقتاپ قالۋى مۇمكىن ەكەنىن ايتادى. ونىمەن قوسا, مۇمكىندىكتى پايدالانىپ, اقش كومپانيالارى دا سلانتستىق مۇناي وندىرىسىنە قارقىن بەرمەك.
بۇعان قوسا نارىقتا جاساندى تۇردە تاپشىلىق جاساۋ ءبارىبىر ۇزاق مەرزىمدە جەمىستى بولمايدى. باعانىڭ كوتەرىلۋى ءۇشىن سۇرانىس تابيعي جولمەن كوبەيۋ كەرەك, دەيدى رەسەيلىك ساراپشىلار.
ال قاراشا ايىندا مۇناي ءوندىرىسىن تاريحتا رەكوردتىق دەڭگەيگە كوتەرگەن قازاقستان كەلەر جىلدان باستاپ 20 مىڭ باررەلگە ازايتۋعا مىندەتتەلدى. ال بىرەر اپتا بۇرىن ەنەرگەتيكا ءمينيسترى قانات بوزىمباەۆ كەلەر جىلى قاشاعانداعى ءوندىرىستى 9 ەسەگە دەيىن كوتەرۋ تۋرالى جوسپاردىڭ بارىن ايتقان ەدى. كەشەگى كەلىسىمشارتتى ەسكەرسەك, بۇل كەم دەگەندە الداعى جارتى جىلدا جۇزەگە اسا قويمايتىن سەكىلدى.