وليمپيادا چەمپيونى ولگا رىپاكوۆا بۇگىن شقو اكىمى دانيال احمەتوۆپەن جانە سەمەي جۇرتشىلىعىمەن بىرگە سپورت اكادەمياسىن اشتى. ءراسىم قازاقستان تاۋەلسىزدىگىنىڭ 25 جىلدىعىنا ارنالدى, دەپ حابارلادى ءوڭىردىڭ اقپاراتتىق ورتالىعى.
بەلگىلى بولعانداي, سپورت اكادەمياسىنىڭ قۇرامىنا بالالار-جاسوسپىرىمدەر سپورت مەكتەبى, 200 ورىندىق ينتەرنات جانە جەكپە-جەك زالى كىرەدى. ينتەرنات قۇرىلىسى 2015 جىلى كۇزدە باستالعان.
نىساندار سەمەي قالاسىنداعى №1 بجسم جانىندا بوي كوتەردى. قۇرىلىس اياقتالعاننان كەيىن بارلىق ءۇش نىساندى بىرىكتىرىپ, سپورت اكادەمياسىن قۇرۋ شەشىمى قابىلداندى.
«ءبىز كەرەمەت ەلدە تۇرىپ جاتىرمىز. وبلىستىڭ ەڭ دارىندى بالالارى جينالعانى ءۇشىن قۋانىشتىمىن. 200 ۇزدىك سپورتشى. بۇل مەكەمەنى «سەمەي سپورت اكادەمياسى» دەپ اتاۋدى شەشتىك», - دەپ اتاپ ءوتتى راسىمدە دانيال احمەتوۆ.
تاۋەلسىزدىك قارساڭىندا اشىلعان ماڭىزدى سپورت كەشەنىنىڭ اشىلۋىمەن سەمەي تۇرعىندارىن وليمپيادا چەمپيونى ولگا رىپاكوۆا قۇتتىقتادى. «سپورتتى جاقسى كورەتىن بالالار سۇيىكتى ىسىمەن اينالىساتىن كەرەمەت ورىن اشىپ جاتىرمىز. شالعاي اۋداندارداعى جاس سپورتشىلاردا دا وسىنداي مۇمكىندىك بولعانى وتە ماڭىزدى. تاۋەلسىزدىكتىڭ 25 جىلدىعىمەن قۇتتىقتايمىن! ءبىر جەتىستىكپەن توقتاپ قالۋعا بولمايدى, ۇنەمى جەتىلىپ, العا ۇمتىلا بەرىڭدەر», - دەدى بالالارعا ولگا رىپاكوۆا.
اكادەميا جۇمىسى شقو كەلەشەگىنەن ءۇمىت كۇتەتىن سپورتشىلارىن ىرىكتەپ ولاردى جەكپە-جەكتىڭ ءتورت ءتۇرى (دزيۋدو, سامبو, گرەك-ريم كۇرەسى, ەركىن كۇرەس) بويىنشا دايىنداۋعا باعىتتالعان.
بالالارمەن وقۋ-جاتتىعۋ جۇمىسىن وتكىزۋ ءۇشىن موڭعوليادان, رەسەيدەن, ازەربايجاننان جوعارى ساناتتى شەتەل ماماندارى تارتىلدى. وبلىس كولەمىندە 10-18 جاس ارالىعىنداعى وقۋشىلاردى جيناۋ جىل سايىن قىركۇيەك ايىندا جۇرگىزىلەدى.