اقتاۋدا «ءابىش الەمى» اتتى ءبىرىنشى رەسپۋبليكالىق تەاتر فەستيۆالى ءوتتى. تورت كۇنگە سوزىلعان تەاتر فەستيۆالىنە قازاقستاننىڭ ءار وڭىرىنەن 7 تەاتر ۇجىمى قاتىستى. فەستيۆالدىڭ باستى ماقساتى – ارامىزدان كەتكەنىنە ءبىر جىل بولعان قارىمدى قالامگەردى ەسكە الۋ جانە ونىڭ شىعارمالارىن ناسيحاتتاۋ بولسا, بايقاۋعا قاتىسۋشى ونەر ۇجىمدارىنا قويىلعان تالاپ – ءابىش كەكىلباي ۇلىنىڭ شىعارمالارىن ساحنالاۋ.
ساحنا شەبەرلەرى ءابىش شىعارمالارىنداعى تاريحي تۇلعالاردىڭ پسيحوليگيالىق ەرەكشەلىكتەرى مەن قايراتكەرلىك قىرلارىن, تاريحي بولمىسىن بارىنشا اشىپ كورسەتۋگە تىرىستى. قازىلار قۇرامى, ناتيجەنى جوعارى باعالاپ, ەكى جىلدا ءبىر رەت وتەتىن اتالمىش فەستيۆالدى ابىشتانۋعا, ءابىش شىعارمالارىن يگەرۋگە جاسالعان يگى قادام دەپ باعالادى.
«ابىلاي حان», «لير پاتشا», «حانشا-داريا حيكاياسى», «ادام بولىپ وتەيىن» - بارلىعى جەتى شىعارما ساحنالانعان ءتورت كۇندىك ونەر دوداسىنا 120-عا جۋىق ارتىستەر قاتىستى. فەستيۆالدىڭ باس جۇلدەسى مەن ءابىش كەكىلباەۆ اتىنداعى ماراپاتتى «شىڭىراۋ» دراماسىمەن ن.ءجانتورين اتىنداعى ماڭعىستاۋ وبلىستىق دراما تەاترى ۇجىمى يەلەندى. پەتروپاۆلدان كەلگەن ءسابيت مۇقانوۆ اتىنداعى قازاق دراما تەاترىنىڭ ۇجىمى "اكتەرلىق ىزدەنىستەر" نوميناتسياسىن جەڭىپ السا, "تاريحتى ساحنالاعانى ءۇشىن" اتالىمىن تاحاۋي احتانوۆ اتىنداعى اقتوبە وبلىستىق دراما تەاترى يەلەندى. ايماق باسشىلىعى تاعايىنداعان "زامانىنا ۇندەس سپەكتاكل" جانە "ۇزدىك ءابىش كەكىلباەۆ اۋدارماسى" سىياقىسىن قىزىلوردا جانە الماتى وبلىسىنان كەلگەن ونەر ۇجىمدارى يەمدەندى.
گۇلايىم شىنتەمىرقىزى, "ەگەمەن قازاقستان".
ماڭعىستاۋ وبلىسى