بۇگىن پارلامەنت سەناتىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكى وقىلىمدا تالقىلاپ, قۇجاتتى قابىلدادى, دەپ حابارلايدى قازاقپارات.
قر زاڭ جوباسىن تانىستىرۋ بارىسىنداعى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ سوزىنە قاراعاندا, ەنگىزىلىپ وتىرعان وزگەرىستەرگە سايكەس بەكىتىلگەن مەرزىم جارتى جىلعا شەگەرىلۋدە. وسى رەتتە جۇمىس بەرۋشىلەر, جەكە كاسىپكەرلەر, جەكە نوتاريۋستاردىڭ, جەكە سوت ورىنداۋشىلاردىڭ, ادۆوكاتتاردىڭ, جەكە تۇلعالاردىڭ اۋدارىمدارى مەن جارنالارىن تولەۋ مەرزىمى 2017 جىلدىڭ 1 قاڭتارىنان ەمەس, 1 شىلدەسىنەن ىسكە اسىرىلا باستايدى. سونىمەن قاتار مەملەكەت حالىقتىڭ بەلسەندى ەمەس بولىگى ءۇشىن جارنانى جارتى جىلعا كەيىن تولەيدى, ياعني 2018 جىلدىڭ 1 قاڭتارىنان باستاپ تولەم جاسايدى. ەكىنشىدەن, تولەمدەر مەن جارنالاردىڭ جۇيەگە ءتۇسۋ مەرزىمى التى ايعا شەگەرىلگەندىكتەن, سايكەسىنشە, جۇيەدە كورسەتىلەتىن مەديتسينالىق كومەككە اقى تولەۋ جارتى جىلعا ۇزارتىلادى (2018 جىلدىڭ 1 قاڭتارىنان باستاپ).
بۇدان بۇرىن حابارلانعانداي, وسى مەرزىمدە قور مەن ونىڭ فيليالدارى قۇرىلادى, دەنساۋلىق ساقتاۋ شىعىندارى رەسپۋبليكالىق دەڭگەيدە شوعىرلانادى. بۇل تۇرعىدا قور مەديتسينالىق قىزمەتتەردىڭ بىرىڭعاي ستراتەگيالىق ساتىپ الۋشىسى رەتىندە قىزمەت ەتەدى. اتالعان مەرزىمدى ۇزارتۋعا بيۋدجەتتىك زاڭناماداعى وزگەرىستەر ىقپال ەتتى. زاڭ جوباسى قاراستىراتىن تاعى ءبىر ماسەلەگە توقتالاتىن بولساق, مەكتەپ مەديتسيناسىن ءبىلىم بەرۋ جۇيەسىنەن دەنساۋلىق ساقتاۋ سالاسىنا اۋىستىرۋعا بايلانىستى.
2018 جىلدىڭ 1 قاڭتارىنان باستاپ مەملەكەت بالالار ءۇشىن مەديتسينالىق ساقتاندىرۋ قورىنا جارنالاردى تولەيدى. سوندىقتان بالالارعا مەديتسينالىق كومەك كورسەتۋ كەلەسى جىلدان مەديتسينالىق ساقتاندىرۋ قورىنان ىسكە اسىرىلادى. مەكتەپ مەديتسيناسىن جاۋاپتى ۆەدومستۆوعا اۋىستىرۋ اياسىندا ۇيىمداستىرۋشىلىق وزگەرىستەر قامتىلادى. وسى ورايدا ەندى ءبىلىم بەرۋ جۇيەسىندەگى مەديتسينالىق پۋنكتەر ەمحانالاردىڭ قۇرىلىمدىق بولىمشەلەرى بولادى. ال مەديتسينالىق ماماندار شتاتتاعى قىزمەتكەرلەر قاتارىنا ەنگىزىلەدى.