پارلامەنت سەناتى جالپى وتىرىستا «قازاقستان رەسپۋبليكاسىنىڭ ۇكىمەتى مەن اتوم ەنەرگياسى جونىندەگى حالىقارالىق اگەنتتىك اراسىنداعى قازاقستان رەسپۋبليكاسىندا اتوم ەنەرگياسى جونىندەگى حالىقارالىق اگەنتتىكتىڭ تومەن بايىتىلعان ۋران بانكىن قۇرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى, دەپ حابارلايدى قازاقپارات.
حالىقارالىق تومەن بايىتىلعان ۋران بانكى اتوم ەنەرگياسى جونىندەگى حالىقارالىق اگەنتتىككە مۇشە مەملەكەتتەردىڭ اتوم ستانسالارىنا يادرولىق وتىندى كەپىلدى جەتكىزۋدى قامتاماسىز ەتۋ ءۇشىن اگەنتتىكتىڭ قولداۋىمەن قۇرىلادى جانە وسى اگەنتتىككە مۇشە ەلدەردىڭ بىرىندە ورنالاسقان تومەن بايىتىلعان ۋران قويماسىن قامتيدى. وسىنداي بانكتى قۇرۋ باستاماسىن ۇسىنعان اگەنتتىك وپەراتور ەلگە بىرنەشە تالاپ قويادى.
«ەل يادرولىق ەمەس مارتەبەگە, يادرولىق تسيكلدىڭ بۇل بولىگىندە تەحنولوگيالارعا جانە تاجىريبەگە, ءتيىستى ينفراقۇرىلىمعا, اتوم ەنەرگياسى جونىندەگى حالىقارالىق اگەنتتىكتىڭ سەنىمىنە يە بولۋعا ءتيىس. بۇنىڭ بارلىعى قازاقستاندا بار, ەڭ الدىمەن جينالعان تاجىريبەنىڭ ارقاسىندا», - دەدى قر ەنەرگەتيكا ءمينيسترى قانات بوزىمباەۆ زاڭ جوباسىن تانىستىرۋ بارىسىندا.
ءمينيستردىڭ سوزىنە قاراعاندا, قازاقستان ءىرى ۋران ءوندىرۋشى جانە جوعارى بايىتىلعان ۋراندى تومەن بايىتىلعان ۋران فورماسىنا قايتا وڭدەۋ مۇمكىندىكتەرىنە يە بولا وتىرىپ, بەيبىت يادرولىق ەنەرگەتيكانى دامىتۋعا ءوز ۇلەسىن قوسۋعا نيەتتى. 2011 جىلعى 29 شىلدەدە قازاقستان ءوز اۋماعىندا تومەن بايىتىلعان ۋران بانكىن ورنالاستىرۋ نيەتى تۋرالى رەسمي ءوتىنىمدى حالىقارالىق اگەنتتىككە جىبەردى. وتىنىمدە قاراستىرۋ ءۇشىن ەكى الاڭ ۇسىنىلدى, ياعني وسكەمەندەگى ءۇلبى مەتاللۋرگيالىق زاۋىتى جانە بۇرىنعى سەمەي سىناق پوليگونى اۋماعىنداعى №5 الاڭى قامتىلدى. 2011 جىلى 29 تامىزدان 2 قىركۇيەك ارالىعىندا اتوم ەنەرگياسى جونىندەگى حالىقارالىق اگەنتتىكتىڭ تەحنيكالىق ميسسياسى قوسىلعان الاڭداردى قاراپ, ءۇلبى مەتاللۋرگيالىق زاۋىتىن تاڭدادى. بۇل 65 جىلدىق تاريحى بار كاسىپورىن, ونىڭ 45 جىلدان استام مەرزىمىندە وسىنداي ماتەريالمەن جۇمىس ىستەۋ تاجىريبەسى بار.