بۇگىن قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى ا.ي.مىرزاحمەتوۆ قر پارلامەنت سەناتىنىڭ پلەنارلىق وتىرىسىندا «قازاقستان رەسپۋبليكاسى جەر كودەكسىنىڭ جەكەلەگەن نورمالارىنىڭ قولدانىسىن جانە «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ قولدانىسقا ەنگىزىلۋىن توقتاتا تۇرۋ تۋرالى» زاڭ جوباسىن تانىستىردى, دەپ حابارلايدى اۋىل شارۋاشىلىق مينيسترلىگى.
«اتالعان زاڭ جوباسىن اۋىل شارۋاشىلىعى مينيسترلىگى ەلباسى ن.نازارباەۆتىڭ 2016 جىلعى 18 تامىزداعى جارلىعىن ورىنداۋ ءۇشىن ازىرلەدى», – دەدى ۆيتسە-پرەمەر.
زاڭ جوباسىنىڭ نەگىزگى ماقساتى – اۋىل شارۋاشىلىعى جەرلەرىن شەتەلدىكتەرگە, ازاماتتىعى جوق ادامدار, شەتەلدىك زاڭدى تۇلعالار, سونداي-اق جارعىلىق كاپيتالىنداعى شەتەلدىكتەردىڭ, ازاماتتىعى جوق ادامداردىڭ, شەتەلدىك زاڭدى تۇلعالاردىڭ ۇلەسى 50 پايىزدان اساتىن زاڭدى تۇلعالارعا جالعا جانە قازاقستاندىقتارعا جەكە مەنشىككە بەرۋگە بايلانىستى جەر كودەكسىنىڭ جانە «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ نورمالارىنا جاريالانعان موراتوري مەرزىمىن 2021 جىلعى 31 جەلتوقسانعا دەيىن ۇزارتۋ بولىپ تابىلادى.
قازىرگى تاڭدا اۋىل شارۋاشىلىعى جەرلەرىنىڭ ساپالى جاعدايى, ولاردىڭ پايدالانىلۋى, مەنشىك يەلەلەرى مەن جەر پايدالانۋشىلار تۋرالى مالىمەتتەر بازاسىن قۇرۋعا باعىتتالعان رەۆيزيا جانە توپىراقتىق, گەوبوتانيكالىق زەرتتەۋ, ونىڭ كاداسترلىق قۇنىن انىقتاۋدى قامتيتىن جۇمىستار جۇرگىزۋ جوسپارلانىپ وتىر.
«ءوز كەزەگىندە, بۇل مالىمەتتەر اۋىل شارۋاشىلىعى جەرلەرىن ءتيىمدى پايدالانۋدى جوسپارلاۋ مەن باقىلاۋعا نەگىز بولىپ تابىلادى. بۇل جۇمىستاردى جۇرگىزۋ قوسىمشا ۋاقىتتى تالاپ ەتەدى», – دەپ اتاپ ءوتتى ا.مىرزاحمەتوۆ.
سونداي-اق, زاڭ جوباسى مەملەكەت مەنشىگىندەگى اۋىل شارۋاشىلىعى ماقساتىنداعى جەرلەردى بەرۋگە بايلانىستى ماسەلەلەردى زاڭنامالىق تۇرعىدا رەتتەيدى.
ايتالىق, موراتوري نورمالارى اۋىل شارۋاشىلىعى ماقساتىنا بەرىلگەن جەرلەردىڭ بارلىعىنا قاتىستى. ياعني, اۋىل شارۋاشىلىعى ماقساتىنداعى جەرلەر بولعاندىقتان, تەك قانا قازاقستاندىقتارعا جالعا بەرىلەدى, جەكە مەنشىككە بەرىلمەيدى.
بايانداما سوڭىندا ا.مىرزاحمەتوۆ زاڭ جوباسىن ىسكە اسىرۋدىڭ مەملەكەتتىك بيۋدجەتتەن قارجى شىعىندارىن قاجەت ەتپەيتىنىن جانە الەۋمەتتىك-ەكونوميكالىق ورتاعا وڭدى اسەر ەتىنىن اتاپ ءوتتى.