سولتۇستىكتە ورتالىق ازياداعى ەڭ ءىرى ەت كومبيناتى سالىنادى

نەمىس تەحنولوگياسىنا نەگىزدەلگەن كاسىپورىن كەشەنىندە مال ۇستاۋ ورىندارى مەن سويۋ قوسىندارى, ەتتى بولشەكتەپ, وڭدەيتىن تسەحتار, ساقتايتىن توڭازىتقىشتار بار. كومبينات ىسكە قوسىلعاندا شوشقا, ءىرى قارا مال ەتتەرى حالىقارالىق تالاپتارعا ساي تەرەڭدەتىپ وڭدەلىپ, ەكسپورتقا جىبەرىلەدى. ازىرگە ونىڭ ورتالىق ازيادا بالاماسى جوق.  «كەشەن جىلىنا 15 مىڭ توننا ەت, 9 مىڭ توننا شۇجىق ونىمدەرىن شىعارۋعا قاۋقارلى. جوبالىق قۋاتتىلىعى ءتيىمدى پايدالانىلسا ونىمدەر الىس-جاقىن شەتەلدەرگە ساتىلاتىن بولادى», – دەدى قۇمار ىرگەباي ۇلى.  ەت كومبيناتىنىڭ جانىنداعى مال كەشەنىندە 100 مىڭ باس تالپاق تاناۋ ءوسىرىپ, 4 مىڭ توننا ەت الۋ جوسپارلانعان. 10 جىل بويى تۇرالاپ تۇرعان كاسىپورىندى 1,5 ايدا ىسكە قوسۋ, 100 جاڭا جۇمىس ورىندارىن اشۋ بەلگىلەنگەن.  ايماق باسشىسى ءتيىستى ورىندارعا ينۆەستورلار تارتۋدى تاپسىردى.  ءومىر ەسقالي, «ەگەمەن قازاقستان».