وسىعان وراي ەڭ الدىمەن اۋىلشارۋاشىلىق قۇرىلىمدارى ساپالى تۇقىم, ارزانداتىلعان جانار-جاعارماي جانە قاجەتتى تەحنيكامەن قامتاماسىز ەتىلدى. توپىراق قۇنارىن ساقتاۋعا قاجەتتى باسقا دا اگروتەحنيكالىق شارالار تولىعىمەن اتقارىلدى. سوڭعى كەزدە كەيبىر ۇساق شارۋا قوجالىقتارى تىڭايتقىشتاردى پايدالانۋ ىسىنە سالعىرت قاراي باستاعاندارى دا جاسىرىن ەمەس. بيىل مۇنداي تەرىس تاجىريبەنىڭ تامىرىنا بالتا شابىلدى. سونىمەن بىرگە, ولار ءوز قولدارىنداعى بۇرىنعى ەسكى تەحنيكانى جاڭعىرتۋدا دا قام-قاراكەت تانىتۋدا. بۇگىنگى كۇنى بولاشاق مول ونىمگە كەپىل بولارلىقتاي وسىنداي وزەكتى ماسەلەلەردىڭ بارىنە دە مەملەكەتتىك تۇرعىدان قولداۋ تەتىكتەرى ەنگىزىلگەن. ماسەلە سونى ءتيىمدى تۇردە پايدالانا بىلۋدە دەۋگە بولادى. بۇعان دەيىنگى جىلداردا وبلىستىڭ ءداندى داقىلدار القاپتارىنا ساپاسى ەكىنشى ساناتتان تومەن, ءتىپتى كەي كەزدەردە ءۇشىنشى ساناتتاعى تۇقىم دا سەبىلىپ كەلگەنىن جوققا شىعارۋ قيىن. ال بيىل سەبىلەتىن تۇقىمنىڭ باسىم بولىگىن نەگىزىنەن جوعارى جانە ءبىرىنشى ساناتتاعى تۇقىم قورى قۇرايدى.
اقتوبە و باستان رەسپۋبليكامىزداعى استىق وسىرەتىن وڭىرلەر قاتارىنان ورىن الىپ كەلەدى. الايدا, بەلگىلى ءبىر كەزەڭدە ايماقتاعى ەگىستىك القاپتاردىڭ كولەمى قىسقارتىلىپ كەتكەن جاعدايلار دا بولعان. ارينە, ونىڭ ءتۇرلى وبەكتيۆتى جانە سۋبەكتيۆتى سەبەپتەرى دە بولعان شىعار. الايدا, ءدال بۇگىنگى كۇنى ءبىر ماسەلە ايقىن. بۇل – وتكەن 2016 جىلمەن سالىستىرعاندا بيىل وبلىستاعى ەگىستىك القاپتار كولەمى 74,2 مىڭ گەكتارعا ۇلعايعانى.
وسىلايشا, بيىلعى جىلى جالپى كولەمى 641 مىڭ گەكتار القاپقا ەگىستىك سالۋ جوسپارلانعان. بۇدان الىناتىن ءونىم مولشەرى قانداي بولماق؟ بۇل جونىندە الدىن الا بولجام جاساپ, بال اشۋ قيىن, ارينە. سونىڭ ىشىندە سۋارمالى ەگىس ەمەس, تاۋەكەلگە نەگىزدەلگەن, ءتىپتى كەرەك دەسەڭىز, جاز كەزدەرىندەگى جاۋىن-شاشىنعا دا تاۋەلدىلىگى بار ەگىستىك جاعدايىندا قانداي دا ءبىر ايقىن جورامال جاساۋ وڭايعا تۇسپەيدى. ايتسە دە قازىرگى كۇنى اگروتەحنيكالىق شارالار ويداعىداي جۇرگىزىلگەن جاعدايدا 480 مىڭ توننا استىق جيناۋعا بولاتىنى جونىندە ەسەپتەر جاسالعان.
ءسوز سوڭىندا وڭىردە بەل ورتاعا تاياعان كوكتەمگى ەگىستىڭ جاي-كۇيىنە كەلسەك, استىق وسىرۋشىلەردىڭ باستى نازارى ونى سوزباي, ۋاقىتىندا اياقتاۋعا اۋدارىلعان. بۇل ىستە قارعالى اۋدانىنىڭ ديقاندارى كوش باستاپ كەلەدى.
تەمىر قۇسايىن, «ەگەمەن قازاقستان»
اقتوبە وبلىسى