25 مامىردا سەناتورلار قازاقستان مەن قىرعىزستان ەلى اراسىنداعى رەادميسسيا تۋرالى ۇكىمەتارالىق كەلىسىمدى جانە وسى كەلىسىمدى ىسكە اسىرۋ ءتارتىبى تۋرالى اتقارۋ حاتتاماسىن راتيفيكاتسيالاۋ تۋرالى; قازاقستان مەن رەسەي اراسىنداعى تەمىر جول كولىگى كاسىپورىندارىنىڭ, مەكەمەلەرى مەن ۇيىمدارىنىڭ قىزمەتىن قۇقىقتىق رەتتەۋدىڭ ەرەكشەلىكتەرى تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوبالارىن قارايدى. زاڭناماعا وسىمدىكتەر مەن جانۋارلار دۇنيەسى جانە قورعانىس پەن اسكەري قىزمەت ماسەلەلەرى بويىنشا تۇزەتۋلەر ءبىرىنشى وقىلىمدا تالقىلاناتىن بولدى. سەنات وتىرىسىندا ەلىمىزدىڭ كونستيتۋتسيالىق كەڭەسىنىڭ مۇشەسى ۇبايدوللا ستامقۇلوۆتىڭ وكىلەتتىگىن توقتاتۋ تۋرالى جانە پارلامەنت سەناتى توراعاسىنىڭ ۇسىنىسى بويىنشا كونستيتۋتسيالىق كەڭەسىنىڭ مۇشەسى قىزمەتىنە تاعايىنداۋ تۋرالى ماسەلە دە قارالادى.
قاسىم-جومارت توقاەۆتىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى. وندا جوعارعى پالاتا وتىرىسىنىڭ كۇن ءتارتىبى تالقىلاندى, دەپ حابارلادى سەناتتىڭ ءباسپاسوز قىزمەتى.