قر پارلامەنتى ماجىلىسىندە ۇكىمەتتىڭ 2016 جىلعا رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىرۋ بارىسىندا قارجى ءمينيسترى باقىت سۇلتانوۆ زەينەتاقىنى ارتتىرۋعا قانشا قارجى بولىنگەندىگىن مالىمدەدى, دەپ حابارلايدى قازاقپارات.
«بەكىتىلگەن بيۋدجەتتىڭ شىعىستارى ەكى رەت ناقتىلانۋدىڭ ناتيجەسىندە 980 ملرد تەڭگەگە كوبەيگەن بولاتىن. بيۋدجەتتىڭ وسىنداي ۇلعايۋى, بىرىنشىدەن, الەۋمەتتىك سالاعا قارجىنى كوبەيتۋگە مۇمكىندىك بەردى. شىعىستاردىڭ جارتىسى, ياعني 4 ترلن تەڭگەسى الەۋمەتتىك بولىپ تابىلادى», - دەدى مينيستر.
اتاپ ايتقاندا, 1 قاڭتاردان باستاپ زەينەتاقى مولشەرى 9 پايىزعا كوبەيدى.
«زەينەتاقىنى تولەۋگە بيۋدجەتتەن 1 353 ملرد تەڭگە قارجى ءبولىندى. ازاماتتىق قىزمەتكەرلەردىڭ جاڭا ەڭبەكاقى جۇيەسى مودەلىن ەنگىزۋگە 290 ملرد تەڭگە ءبولىندى. بالا تۋعا جاردەماقى 438 مىڭ الۋشىعا تولەنىپ, وعان 33 ملرد تەڭگە جۇمسالدى», - دەدى سۇلتانوۆ.