مەموراندۋم بويىنشا قازاقستاندا يسلام قارجىلاندىرۋ جۇيەسىن دامىتۋ جولىنداعى جالپى مىندەتتەردى شەشۋ ءۇشىن قاۋىمداستىق جانىندا ءوزارا ديالوگ الاڭىن قۇرۋ ارقىلى نارىقتاعى وكىلدەرمەن بىرلەسكەن باعدارلامالار مەن ءتۇرلى شارالار دايىنداۋ, ەلدە يسلام قارجى جۇيەسىن ناسيحاتتاۋ, دامىتۋ ماقساتىندا فورۋم, كونفەرەنتسيالار ۇيىمداستىرۋ كوزدەلگەن. سونداي-اق قور باعدارلامالارىن جۇزەگە اسىرۋعا باعىتتالعان بىرىككەن شارالار كەشەنىن جۇزەگە اسىرۋ, «دامۋ» قورىنىڭ قىزمەتكەرلەرىن, كاسىپكەرلەردى وقىتۋ دا جوسپاردا بار, دەپ حايۋارلايدى "دامۋ" قورىنىڭ رەسمي سايتى.
«وتكەن جىلى «دامۋ» قورى يسلام قارجىلاندىرۋى بويىنشا جۇمىسشى توبىن قۇردىق. ونىڭ قۇرامىنا يسلام قارجى دامىتۋ قاۋىمداستىعى مەن وسى سالادا جۇمىس ىستەپ جۇرگەن بىرقاتار قارجى ۇيىمدارى كىردى. ءسويتىپ بىرلەسە وتىرىپ يسلام قارجىلاندىرۋىن دامىتۋ جونىندە ىشكى باعدارلامامىزدى جاسادىق. ول باعدارلاما قۇجات رەتىندە دايىن. ەندى تەك قارجىلاندىرۋ تەتىكتەرىن تاقىلاپ, ءبىر مامىلەگە كەلۋ قالدى. مەنىڭ ويىمشا ول شەشىلەتىن ماسەلە. يسلام قارجى شارتتارى بويىنشا الەم ەلدەرىنىڭ 60 پايىزى جۇمىس ىستەيتىنىن ەسكەرسەك, ءبىزدىڭ دە بۇل كوشتەن قالۋعا قاقىمىز جوق. ەلباسى يسلام قارجىلاندىرۋىن دامىتۋ جايلى تاپسىرما بەرگەنىن دە وزدەرىنىڭ بىلەسىزدەر. سوندىقتان دا ءبىز ءوز تاراپىمىزدان «دامۋ» قورىمەن جۇمىس ىستەيتىن كاسىپكەرلەرگە يسلام شارتتارى بويىنشا قارجىلاندىرۋ تالاپتارى جونىندە اقپاراتتاندىرۋ جۇرگىزەمىز. ءارى قازاقستاندا وسى شارتپەن جۇمىس ىستەيتىن ء«ال-حيلال» بانكى مەن «زامان» بانكىنىڭ ىشكى قۇجاتارى دايىن بولىپ, جۇمىستارىن شاريعات كەڭەسى ماقۇلداعان جاعدايدا ءبىز شاعىن جانە ورتا كاسىپكەرلەردى قارجىلاندىرۋدى باستاماقپىز»,-دەدى «دامۋ» قورى باسقارما توراعاسىنىڭ ورىنباسارى داۋلەت ابىلقايىروۆ.
يسلام شارتتارىمەن قارجى الۋ ءۇشىن كاسىپكەرلەرگە يسلام قارجىلاندىرۋىنىڭ نە ەكەنىن ءبىلۋ ماڭىزدى. مەموراندۋم اياسىندا ۇيىمداستىرىلعان «بيزنەستى دامىتۋعا ارنالعان يسلام قارجىلاندىرۋىنا قالاي قول جەتكىزۋگە بولادى؟» اتتى ءۇش ساعاتتىق سەمينار وسى سۇراقتارعا جاۋاپ بەردى.
شارا بارىسىندا «ال ساكر فينانس», «Kazakhstan Ijara Company», يسلام قارجى دامىتۋ قاۋىمداستىعىنىڭ جانە «ساداقا» قايىرىمدىلىق قورىنىڭ وكىلدەرى يسلام قارجى ينستيتۋتى باعدارلامالارىنىڭ تانىستىرىلىمىن وتكىزدى. تانىستىرىلىم بارىسىندا جيىنعا كەلگەن كاسىپكەرلەر وزدەرىن تولعاندىرعان سۇراقتارىن قويدى. اتاپ ايتقاندا يسلام شارتتارى بويىنشا جۇمىس ىستەيتىن بانكتەر ەلدەگى باسقا دا ەكىنشى دەڭگەيلى بانكتەرگە باسەكەلەس بولا ما؟ يسلام بانكتەرى قانداي تالاپتار بويىنشا جۇمىس ىستەيدى؟ تەك يسلام ءدىنىن ۇستانۋشىلارعا عانا قىزمەت كورسەتىلە مە؟ يسلام شارتتارى بويىنشا قارجى الماق بولعان كاسىپكەرگە قانداي تالاپتار قويىلادى,-دەگەن سياقتى كوپتەگەن سۇراقتارعا جاۋاپ تاپتى.