مينيستر ءوز ماقالاسىندا كوپ ماسەلەگە تەرەڭىرەك توقتالىپتى. جوعارى وقۋ ورىندارىندا ەڭبەك ەتكەن كوپ جىلدىق تاجىريبەمە سۇيەنە وتىرىپ, مينيسترلىك تاراپىنان قولعا الىنعان باستالامالاردىڭ شىن مانىسىندەگى ءمان-جايىنا قاتىستى ءوز ازاماتتىق ۇستانىمىمدى بىلدىرگىم كەلىپ وتىر. جانە وعان سوڭعى ۋاقىتتا بۇقارالىق اقپارات قۇرالدارىندا, ونىڭ ىشىندە عالامتور جەلىلەرىندە مينيستر تاراپىنا ايتىلعان سىن-پىكىرلەر دە سەبەپ بولىپ وتىر. الدىمەن ايتارىم, ءبىلىم جانە عىلىم مينيسترلىگى ەلباسى ن.نازارباەۆتىڭ «قازاقستان-2050» ستراتەگياسىنداعى, قازاقستان حالقىنا ارناعان جولداۋلارىنداعى باسىم مىندەتتەردى جۇزەگە اسىرۋدا. كەز كەلگەن رەفورمانىڭ جەڭىل جۇزەگە اسىرىلا سالمايتىندىعى – تاريحي شىندىق. ال, ءبىلىم بەرۋ سالاسىنىڭ ماڭىزدى ستراتەگيالىق باعىت ەكەندىگىن ەسكەرەر بولساق, جۇرتتىڭ ۇلكەن الاڭداۋشىلىعىن دا تۇسىنۋگە بولادى. دەگەنمەن, بوسقا داۋرىقپاي, ەلدى دۇرلىكتىرمەي, ماسەلەنىڭ ءمانىسىن تولىق ءتۇسىنىپ, ەلباسىنىڭ باستامالارىنا قولداۋ كورسەتۋىمىز كەرەك دەپ ەسەپتەيمىن. ول ءۇشىن ءبىلىم جانە عىلىم مينيسترلىگىنە بۇل باستامالاردى ەلگە دۇرىس جەتكىزۋ, ءتۇسىندىرۋ تەتىكتەرىن قاراستىرعان ءجون. سوڭعى كەزدەرى تالقىلاۋعا تۇسكەن باستامالارعا قاتىستى ويىمدى, ماماندىعىم تاريحشى بولعاندىقتان, وسى ماسەلەدەن باستايىن. «قازاقستان تاريحى» ءپانىنىڭ مازمۇنى بويىنشا مەكتەپ باعدارلاماسىندا جانە جوعارى وقۋ ورنى باعدارلاماسىندا قايتالاۋلار وتە كوپ. سوندىقتان, ونداي قايتالاۋلاردى قىسقارتۋ دۇرىس دەپ ەسەپتەيمىن. ەكىنشىدەن, كلاسسيفيكاتور ماسەلەسىنە كەلەر بولساق, ونىڭ جاڭا نۇسقاسى رەسمي تۇردە قولدانىسقا ءالى ەنگىزىلگەن جوق. سوندىقتان, ەشقانداي داۋ-دامايعا دا نەگىز جوق. قۇجاتتىڭ جاڭا نۇسقاسىنىڭ تالقىلاۋعا ءتۇسىپ, ءارتۇرلى پىكىرلەردى تۋىنداتۋى دا زاڭدى قۇبىلىس. وسىعان بايلانىستى كلاسسيفيكاتوردىڭ «باكالاۆريات ماماندىقتارى» اتتى بولىمىندە «قازاق ءتىلى», «قازاق ادەبيەتى», «قازاق تاريحى», «لينگۆيستيكا», «شىعىستانۋ» ماماندىقتارى الىنىپ تاستالدى دەۋگە دە ەشبىر سەبەپ جوق. بۇل ماماندىقتاردىڭ بارلىعى دا جوعارى وقۋ ورىندارىندا ساقتالىپ, وقىتىلۋدا. سونداي-اق, «الىپپە» وقۋلىعى دايىندىق سىنىپتارىندا وقىتىلاتىندىعى پەداگوگيكالىق قاۋىمداستىقپەن اقىلداسا وتىرىپ, شەشىلگەن ماسەلە. ويتكەنى, قازىرگى بالالاردىڭ باسىم كوپشىلىگى مەكتەپكە ارىپتەردى تانىپ, وقي الاتىنداي بولىپ بارادى. سوندىقتان «الىپپەنىڭ» قاجەتتىلىگى مەكتەپكە دەيىنگى دايىندىق سىنىپتارىندا قاتتى سەزىلەدى. ال باستاۋىش سىنىپتاردا «انا ءتىلى» وقۋلىعى ەنگىزىلەتىن بولادى. ءبىلىم جانە عىلىم مينيسترلىگىنىڭ حابارلاۋىنشا, «سەرپىن» باعدارلاماسى ءوز جۇمىسىن توقتاتقان جوق, كەرىسىنشە, بۇل باعدارلاماعا بولىنەتىن ورىندار سانى بيىلعى جىلى 500-گە ۇلعايادى. سولتۇستىك وڭىرلەردەگى جوعارى وقۋ ورىندارىنا, ەڭ الدىمەن, ماگيسترانتتار مەن دوكتورانتتار جىبەرىلەتىن بولدى. بۇل ماسەلە دە پەداگوگيكالىق قاۋىمداستىقپەن جانە جەرگىلىكتى اتقارۋشى ورگاندارمەن كەڭىنەن تالقىعا تۇسكەن بولاتىن. «ۇشتۇعىرلى ءتىل» باعدارلاماسىنىڭ جۇزەگە اسىرىلۋىنا ەلباسىنىڭ سوڭعى جولداۋىندا دا ەرەكشە نازار اۋدارىلدى. وندا ء«ۇش ءتىلدى وقۋعا كەزەڭ-كەزەڭمەن كوشۋ ماسەلەسى بويىنشا ۇسىنىستار ازىرلەنسىن. قازاق ءتىلىنىڭ باسىمدىعى ساقتالادى. ونىڭ ءارى قاراي دامۋىنا زور كوڭىل بولىنەدى. سونىمەن قاتار, بۇگىندە اعىلشىن ءتىلى – جاڭا تەحنولوگيا, جاڭا يندۋستريا, جاڭا ەكونوميكا ءتىلى. اعىلشىن ءتىلىن مەڭگەرمەي, قازاقستان جالپى ۇلتتىق پروگرەسكە جەتە المايدى. ...وسىنىڭ بارلىعىن ەسكەرىپ, اعىلشىن ءتىلىن كەزەڭ-كەزەڭمەن ەنگىزۋىمىز كەرەك», − دەپ اتاپ كورسەتىلگەن. سوندىقتان, بۇل شارانى الەمدىك وركەنيەت كوشىنەن قالماي, وزىق ەلدەردىڭ قاتارىنا ەنۋگە باعىتتالعان ارەكەت دەپ دۇرىس تۇسىنگەنىمىز ءجون. وسىلايشا, ءبىلىم جانە عىلىم مينيسترلىگى ەلباسى ن.ءا.نازارباەۆتىڭ ساياساتىن قولداپ, الەمنىڭ 30 وزىق ەلىنىڭ قاتارىنا كىرۋدى باستى مىندەت ەتىپ, ەلىمىزدىڭ وسكەلەڭ ۇرپاعىن ءبىلىمدى, مادەنيەتتى, اقىل-پاراساتى مول ازاماتتار ەتىپ تاربيەلەۋ ماقساتىن ۇستانىپ وتىر. وسىعان بايلانىستى ءبىلىم جانە عىلىم سالاسىنداعى ەلباسى بەلگىلەپ بەرگەن ماڭىزدى ستراتەگيالىق مىندەتتەردى ءوز دەڭگەيىندە جۇزەگە اسىرۋ ءۇشىن مينيستر ە.ساعاديەۆكە بارىنشا قولداۋ كورسەتۋ, حالىقتىڭ اراسىندا جان-جاقتى ءتۇسىندىرۋ جۇمىستارىن جۇرگىزىپ, رەفورمالاردىڭ تيىمدىلىگىن قامتاماسىز ەتۋگە ىقپال ەتۋ ءبىزدىڭ ارقايسىمىزدىڭ ازاماتتىق پارىزىمىز دەپ بىلەمىن.
باقىت ساپارباەۆ,
م.اۋەزوۆ اتىنداعى وقمۋ كوللەدجىنىڭ ديرەكتورى, تاريح عىلىمدارىنىڭ دوكتورى, پروفەسسور