الماتى قالاسىندا كسرو حالىق ءارتىسى, حالىق قاھارمانى روزا باعلانوۆانى ماڭگى ەستە قالدىرۋ ءۇشىن ءوزى تۇرعان ءۇيدىڭ قابىرعاسىندا ەسكەرتكىش تاقتا قويىلدى.
ەسكەرتكىش تاقتانىڭ اشىلۋ سالتاناتىندا الماتى قالالىق تىلدەردى دامىتۋ, مۇراعاتتار ءجانە قۇجاتتاما باسقارماسىنىڭ باسشىسى ماماي احەت كىرىسپە ءسوز سويلەدى. ودان كەيىن الماتى قالاسى اكىمىنىڭ ورىنباسارى سەرىك سەيدۋمانوۆ اتاقتى ءانشىنىڭ ءومىر جولى مەن ونەر جولىنا كەڭىنەن توقتالا كەلىپ, حالقىنا قىزمەت ەتىپ وتكەن وسىنداي ابزال جاندار ەشقاشان ۇمىتىلمايتىندىعىن اتاپ ايتتى.
جيىندا سونداي-اق, روزا اپامىزبەن كوزى تىرىسىندە قىزمەتتەس بولعان التىنبەك قورازباەۆ, سارا تىنىشتىعۇلوۆا, ماقپال ءجۇنىسوۆا سەكىلدى ونەر قايراتكەرلەرى ءوز پىكىرلەرىمەن ءبولىسىپ, اتاقتى ءانشىنىڭ تۋعان-تۋىستارى وسى شارانى ۇيىمداستىرۋشىلار مەن قولداۋ كورسەتۋشى ازاماتتارعا ءجۇرەكجاردى تىلەكتەرىن جەتكىزدى.
قانات ەسكەندىر, الماتى.
سۋرەتتى تۇسىرگەن بەرسىنبەك سارسەنوۆ.