تاۋەلسىزدىگىنىڭ 20 جىلدىعىن اتاپ وتكەلى وتىرعان قازاق ەلى ءبىلىم بەرۋ ىسىمەن قاتار, وقۋشىلاردىڭ دەمالىسىنا دا ەرەكشە ءمان بەرىپ كەلە جاتىر. ءبىر زاماندارى ەلىمىزدىڭ جاس ۇرپاعى قىرىمداعى «ارتەككە» بارۋدى ارمان ساناسا, ەندىگى جەردە ەلباسى نۇرسۇلتان نازارباەۆتىڭ تىكەلەي قولداۋىمەن 2002 جىلى پايدالانۋعا بەرىلگەن «بالداۋرەن» رەسپۋبليكالىق وقۋ-ساۋىقتىرۋ ورتالىعى سول «ارتەكتىڭ» ورنىن باسىپ وتىر. پرەزيدەنت ەل بولاشاعى جاستاردىڭ قولىندا دەدى. ال سول جاستاردى پاتريوتتىققا تاربيەلەۋ, وتان ءسۇيگىشتىككە باۋلۋ, ەلىنىڭ تاريحىن, جەرىنىڭ قاسيەتىن ۇعىندىرۋ جۇمىسىندا وقۋشىلاردىڭ دەمالىسىن ساتىمەن ۇيىمداستىرۋ ۇلكەن ءرول اتقاراتىنى بەلگىلى. وسى يگىلىكتى ءىس ون جىلعا جۋىق ۋاقىتتان بەرى ءوز دارەجەسىندە ورىندالىپ كەلە جاتىر.
«بالداۋرەن» وقۋ-ساۋىقتىرۋ ورتالىعىندا جىل سايىن ەلىمىزدىڭ بارلىق ايماعىنان بەس مىڭعا جۋىق وقۋشى 16 اۋىسىمدا دەمالادى. وسى ارادا مەن مىنا نارسەنى باسا ايتقىم كەلەدى. وقۋشىلار بىزدەگى دەمالىسىن تەك جازدا عانا ەمەس, جىل بويى ۇزدىكسىز وتكىزۋىنە بولادى. ساباق كەزىندەگى دەمالىستا وقۋشى ءبىلىم الۋىن جالعاستىرا بەرەدى. تاربيەشىلەرمەن قاتار, ءار ءپاندى تەرەڭ وقىتاتىن مۇعالىمدەر قۇرامى, وقۋلىقتار, وقۋ ادىستەمەلەر, لابوراتوريالىق جۇمىستارعا قاجەت قۇرال-جابدىقتار تولىعىمەن جاساقتالعان. بيىلعى جازعى دەمالىستا ەلىمىزدىڭ بارلىق وڭىرىنەن كەلگەن جۇزدەگەن وقۋشىلار جوعارى دارەجەدە دەمالۋدا. دەمالىس كەزىندە ءار وقۋشىنىڭ وزىندىك قارىم-قابىلەتىن شىڭداۋعا ارنالعان ءتۇرلى سايىستار مەن بايقاۋلارعا, فەستيۆالدار مەن وليمپيادالارعا قاتىسىپ, باعىن سىناۋعا, تابيعات اياسىندا بولۋعا مۇمكىندىك جاسالعان. ءبىر ۇلت, كوپتەگەن ەتنوستىڭ باسىن قۇراپ, الەمگە دوستىقتىڭ التىن تۇعىرى رەتىندە تانىلعان وتانىمىزدى مەكەندەپ جاتقان بارلىق جۇرتتاردىڭ ۇل-قىزىنىڭ دەمالىسى تەڭ دارەجەدە ۇيىمداستىرىلىپ وتىرعانىن دا ايتا كەتسەم دەيمىن. ءبىزدىڭ لاگەردەگى جاستاردىڭ ءبىر اۋىزدان ايتاتىن ءسوزى ءبىرتۇتاس قازاقستاننىڭ پەرزەنتىمىز دەگەنگە سايادى.
وسىنداي يگىلىكتى ىستەردى ءجۇزەگە اسىرۋدا الەمدەگى وركەنيەتتى ەلدەردىڭ وزىق تاجىريبەسىن ءوز جۇمىسىمىزعا ءتيىمدى پايدالانۋعا تالپىنىپ كەلەمىز. قازاق ارتەگى اتانعان ورتالىقتىڭ عيماراتى جان-جاقتى جوندەۋدەن ءوتىپ, قاجەتتى ماتەريالدىق, تەحنيكالىق جانە عىلىمي-ادىستەمەلىك بازاسى تالاپقا ساي جاراقتالعان دەۋگە بولادى. بۇل تاربيە كەشەنىندە ءتورتكۇل دۇنيەدە ءوتىپ جاتاتىن حالىقارالىق جانە رەسپۋبليكالىق بايقاۋلار مەن فەستيۆالدار, كورمەلەر وتكىزىلىپ كەلەدى. سونىڭ ءبىر دالەلى وتكەن جىلى دۇنيەجۇزىنىڭ 97 ەلىنەن 625 بالا قاتىسقان 51 حالىقارالىق ماتەماتيكا وليمپياداسى دەر ەدىك. وسى ءبىزدىڭ وقۋ-ساۋىقتىرۋ كەشەنىندە بولعان سول ءبىلىم سايىسىندا وتانىمىزدىڭ 5 تۇلەگى جۇلدەگەر اتانىپ, مەملەكەتىمىز بەستىكتىڭ قۇرامىنا كىردى.
وتكەن ايدىڭ سوڭىنا قاراي ەگەمەندىكتىڭ 20 جىلدىعىنا ارناپ, دەمالىپ جاتقان وقۋشىلار «قازاقستاننىڭ كۇشى – بىرلىكتە!» دەگەن تاقىرىپتا ۇلتتار مادەنيەتىنىڭ رەسپۋبليكالىق فەستيۆالىن وتكىزدى. وعان ءبىلىم جانە عىلىم ءمينيسترى باقىتجان جۇماعۇلوۆ قاتىسىپ, وقۋشىلاردىڭ جازعى دەمالىسى ارقاشان باستى نازاردا تۇراتىنىن ايتىپ, بالالار ساۋىقتىرۋ ۇيىمىن جاڭاشا ۇلگىدە ۇيىمداستىرىپ, ۋاقىت تالابىنا ساي جاڭارتۋ جايىن العا تارتتى.
ءبىز الداعى ۋاقىتتا وسى بالالار كەشەنىن حالىقارالىق دارەجەگە كوتەرۋمەن بىرگە, وبلىس, اۋدان كولەمىندە بولىمشەلەرىن قۇرۋ ءماسەلەسىن قوزعاپ كەلە جاتىرمىز. ەگەر ونداي مۇمكىندىك بولىپ جاتسا, بولاشاقتا «بالداۋرەنگە» سول ورتالىقتاردا بىلىمىمەن, تاربيەسىمەن كوزگە تۇسكەندەردى عانا جىبەرىپ وتىرۋ ارقىلى كەشەننىڭ بەدەلىن ارتتىرۋعا بولادى دەگەن پىكىردەمىز. بۇل ويىمىزدى وبلىس, اۋدان باسشىلارى قولداپ, وزدەرى ۇيىتقى بولىپ جاتسا, نۇر ۇستىنە نۇر بولار ەدى. وقۋشىلاردىڭ دەمالىسىن ۇتىمدى ۇيىمداستىرۋعا جول اشىلاتىنى ءشۇباسىز. جوعارىداعى جينالىستا مينيستر «بالداۋرەندى» حالىقارالىق لاگەرگە اينالدىرۋ قاجەتتىگىن ايتقان ەدى. ءبىز بۇل جۇمىستى ءبىرازدان بەرى ويلاستىرىپ كەلەمىز. مىسالى, «ورلەنوك» (رەسەي), «كامچيا» (بولگاريا), «زۋبرەنوك» (بەلارۋسسيا), «ارتەك» (ۋكراينا) سەكىلدى ورتالىقتارمەن تىعىز قارىم-قاتىناس جاساپ, وزىق ءتاجىريبەنى وزىمىزگە ساباق ەتىپ الۋدامىز. ءبىزدىڭ كەشەندە جاپونيا, ءتۇركيا, ءۇندىستان, ءوزگە دە ەلدەردىڭ ءبىلىم بەرۋ مەكەمەلەرىنىڭ وكىلدەرى, ەۋروپالىق بالالار مەن يۋنيسەف, ەقىۇ, باسقا دا حالىقارالىق ۇيىمداردىڭ باسشىلارى بولدى. سول سەكىلدى ەۋروپا بيزنەس اسسامبلەياسىنىڭ كوميتەتى (ەۆا وكسفورد, ۇلىبريتانيا) ۇسىنىسى بويىنشا «بالداۋرەن» رەسپۋبليكالىق وقۋ-ساۋىقتىرۋ ورتالىعى ەۋروپالىق ساپاعا يە بولدى. ءبىز قازىر تامىز ءماسليحاتىنا ءازىرلەنىپ جاتىرمىز. وسى القالى جيىندا «بالداۋرەن» رەسپۋبليكالىق وقۋ-ساۋىقتىرۋ كەشەنىنىڭ وبلىستاردان فيليالىن اشۋ ءجونىندەگى الدا ايتقان ۇسىنىسىمىزدى قولداسا دەگەن تىلەگىمىز بار. بۇل ءبىلىم مەن ءتاربيەنى ۇشتاستىرىپ, قاتار ءجۇرگىزۋگە ەرەكشە سەپتىگىن تيگىزەر ەدى. وسى ارادا ويىمىزعا ءال-فارابي بابامىزدىڭ تاربيەسىز بەرگەن ءبىلىمنىڭ, ۇرپاق ساناسىنا جۇقپايتىنى جونىندەگى بايلامى ورالىپ وتىر. تۇيىندەي ايتقاندا, ەلىمىزدەگى بىردەن-ءبىر بالالارعا ارنالعان وقۋ-ساۋىقتىرۋ كەشەنى الداعى ۋاقىتتا اياسىن كەڭەيتىپ, اۋقىمىن ءوسىرىپ جاتسا, ميلليونداعان ۇرپاقتىڭ تاعىلىمدى دا ءتاربيەلى بولىپ وسۋىنە مول مۇمكىندىك جاسالا بەرەتىن بولادى.
مۇحيتدين تولەپباەۆ, «بالداۋرەن» رەسپۋبليكالىق وقۋ-ساۋىقتىرۋ كەشەنىنىڭ باس ديرەكتورى.