سارسەنبى كۇنى «استانا-ارەنا» ستاديونىندا فۋتبولدان قازاقستان مەن سيريا قۇرامالارى اراسىندا جولداستىق كەزدەسۋ ءوتتى. بۇل كۇنى الداعى ەۋروپا چەمپيوناتىنىڭ كۇزگى شەشۋشى ىرىكتەۋ كەزدەسۋلەرىنە دايىندىق شەڭبەرىندە كوپتەگەن ماتچتار ۇيىمداستىرىلدى.
ال استاناداعى باسەكە 1:1 ەسەبىمەن تەڭ اياقتالدى. ءسويتىپ, ءبىزدىڭ سيريادان ءۇش رەت جەڭىلگەنىمىزدىڭ ەسەسىن قايتارۋدىڭ رەتى تاعى كەلمەدى. دەگەنمەن, ەسەپكە قاراپ ءبىزدىڭ قۇراما ناشار وينادى دەپ ايتا المايمىز. بۇل ماتچ چەح مامانى ميروسلاۆ بەرانەكتىڭ ۇلتتىق قۇرامانىڭ باس باپكەرى رەتىندەگى ەكىنشى ويىنى بولدى. ءبىرىنشى ويىندا ازەربايجان كومانداسىن 2:1 ەسەبىمەن جەڭىپ, جانكۇيەرلەر الدىندا ءبىراز بەدەل جيناپ العانى بەلگىلى.
سوعان قاراپ كەشەگى ماتچتا باپكەر بەرانەك تاعى دا ازەربايجانمەن بولعان ويىندى قايتالاپ, سيريا سياقتى ازيانىڭ ورتاڭقول كومانداسىن جەڭەدى دەپ ويلاعان ەدىك. بىراق, وسى ويىندا جەڭبەسەك تە كوماندانىڭ جەڭىسكە دەگەن جىگەرى, كاسىبي ءوسۋى بايقالدى.
ماتچتا ەسەپتى ءبىرىنشى بولىپ قوناقتار اشتى. ودان كەيىن قۇراماعا قايتا كەلگەن جامبىل كوكەەۆ ەسەپتى تەڭەستىردى. وسى كەزدەسۋدە بىزگە ونىڭ ويىنى ۇنادى. سونىمەن بىرگە, ۇلان قونىسباەۆ, تاڭات نوسەرباەۆتىڭ قيمىلدارىنا دا جانكۇيەر قاۋىم ريزا بولعانداي. ويىندا گريدين, وستاپەنكو, حيجنيچەنكو دا بارىن سالعانىن اتاپ وتكەن ءجون.
داستان كەنجالين.