ەل ىرگەسى امان بولسىن!

نەتكەن جارا­تى­لىس, نەتكەن كەرەمەت دەپ تاڭ قالاتىنمىن. شىنىندا, قازاق­تىڭ اسىلدارى ءبىر-ءبىر تاۋ شى­ڭىنداي ەدى عوي. قاراپ وتىرسام, مەن دە سولاردىڭ جاسىنا جەتىپ, ءتىپتى كەيبىرەۋىنەن اسىپ تا كەتكەندەيمىن. ەل گازەتى اتالىق جاستاسىز, حالقىڭىزعا جاڭا جىلعا وراي باتالى ءسوز ايتساڭىز دەپ تىلەك بىلدىرگەندە اۋزىما تۇسكەن ءبىرىنشى ءسوز تاۋبە بولدى. ءيا, تاۋبە. ەل بولدىق, ەتەك-جەڭىمىزدى جينادىق. كوپتىڭ قاتارىندا جۇرگەن قازاق تورت­كۇل دۇنيەگە تانىلىپ, كوش باسى­نان كورىندى. تالاي جۇرتتىڭ قابىرعاسىن قايىستىرعان ەكونوميكالىق داعدارىستى سەزىنە قويعان جوقپىز. قا­شان­دا قيلى كە­زەڭدە ەل باس­تاپ شىعاتىن باتىل ۇل كەرەك بولىپ تۇرا­تى­نى انىق. وسى جاعىنان كەلگەندە پرەزيدەنت نۇرسۇلتان نازارباەۆ ەرەكشە كوزگە ءتۇستى. حالقىن پالە-جالاعا, قيىندىق-قىسپاققا ۇرىن­دىرماي, العا باستاپ كەلەدى. تاعى ءبىر جەتىستىگىمىز, بيىل ەقىۇ-عا توراعا بولاتىنىمىز. قازاق قاي كەزدە وسىنداي تەڭدىككە جەتىپ, تورگە شىعىپ, باس ۇستاپ ەدى؟ تاۋبەسىنەن جاڭىلماعان, بارىن باعالاپ, جاقسىسىن جارقىراتىپ كورسەتەتىن ۇلتتىق رۋحىمىزعا قاراي مۇندايدا ايتىلار جۇرەك­جاردى ءسوز – قايىرلى بولسىن! بارىس جىلى قاشاندا قازاققا جامان بولعان ەمەس. ەل ىرگەسى بەرىك بولىپ, جارقىراعان ماڭدايىمىز اشىلىپ, ءتىل-كوزدەن اۋلاق بولايىق دەيىك. بيىل مەن دە 80-گە كەلىپ قالىپپىن. ءبىزدىڭ الدى­مىزدا, ەل ىشىندە تىلەگىن بىلدىرە­تىن, باتاسىن بەرەتىن اعالار, زامانداستار از ەمەس. مەن ولارعا دا سونداي جاقسىلىقتى تىلەيمىن. قازىر اينالامىزدا كوز دە كوپ, ءسوز دە كوپ. ودان قورعايتىن دا, ساقتايتىن دا ەلدىڭ بىرلىگى, ۇلتىمىزدىڭ تاتۋلىعى. جاسى­راتىن نەسى بار, وتكەندى كوكسەپ, ولەرمەندىك تانىتىپ جۇرگەندەر توبە كورسەتەدى. ولارعا توتەپ بەرەتىن قازاقتىڭ, قازاق زيالىلارىنىڭ اقىل-پاراساتى. بارىس جىلى بۇكىل قازاقستان­دىقتارعا, ءوز جۇرتىما بارىس­تاي باتىل, ءبارىن اقىلعا جەڭ­دىرىپ, ەل ىرگەسىن مىقتى ۇستايتىن التىن دىڭگەك بولىڭىزدار دە­مەكپىن! ءدال بۇگىن بىزگە كەشەگى الاش ارىستارىنىڭ ەل دەپ ەمىرەنگەن ەرلىك-ەڭبەگى, ۇلتىم دەپ ۇيىسقان, جۇدىرىق بولىپ جۇ­مىلعان تىنىس-تىرشىلىگى كەرەك. وسىنى مۇلتىكسىز ورىنداساق, العا قويعان ماقسات تا, مىندەت تە ورىندالادى. بارىس جىلى تابىس جىلى, بەرەكە-بىرلىك جىلى بولسىن, اعايىن!