استانادا جاسوسپىرىمدەر اراسىندا ءوتىپ جاتقان الەم چەمپيوناتى كۇن وتكەن سايىن قىزا تۇسۋدە.
ازىرشە بوكسشىلار اراسىندا ىرىكتەۋ جەكپە-جەكتەرى ءوتىپ جاتىر. ەندى ءبىر-ەكى كۇننەن كەيىن ىرىكتەۋدەن سۇرىنبەي وتكەن بوزبالالار شيرەك فينالعا شىعىپ, ءارى قاراي ءجۇلدەلى ورىندارعا تالاساتىن بولادى.
ال قازىرگى ىرىكتەۋ ايقاستارى باسقا ەلدەردى ايتپاعاندا, ءبىزدىڭ 13 قارادومالاق بالامىزعا ناعىز سىناق الاڭىنا اينالعانىن كورىپ وتىرمىز. ويتكەنى, كۇن سايىن كەشكە دەيىن جانكۇيەرلەر الدىندا قارا تەرگە ءتۇسىپ قولعاپ ءتۇيىستىرىپ جاتقان قاراكوزدەرىمىز ءۇشىن بۇل الەم چەمپيوناتى ولاردىڭ ءومىرىندەگى ەڭ ءۇلكەن جارىس. مىنە, وسىنداي سىننان سۇرىنبەي ءوتۋ بوكسشىلار ءۇشىن ەل الدىنداعى ۇلكەن جاۋاپكەرشىلىك دەۋگە بولادى. وسى رەتتە 15-16 جاستاعى قۇراما مۇشەلەرىنىڭ جەڭىسكە جەتۋ ءۇشىن بويىنداعى بارلىق كۇشتى شارشى الاڭدا سارقا جۇمساپ جاتقانىن اتاپ وتكەن ءجون.
دۇيسەنبى كۇنى ءۇش بوكسشىمىز العاشقى ەكى كۇندە جەڭىسكە جەتكەن ءتورت قۇرداسى سياقتى قارسىلاستارىن جەڭىپ, كەلەسى اينالىمعا جولداما الدى. وسى كۇنى 48 كيلو سالماقتاعى زاڭعار تەمىرحان ەلۆيس سەۆەرنيو رودريگەستى (دومينيكان رەسپۋبليكاسى), قايىرگەلدى داۋىتبەك (63 كگ.) ءىلياس ادزيناەۆتى (بەلارۋس) جەڭسە, 70 كيلو سالماقتاعى داۋلەت بايعابا نەمىس نوربەرت شوەلحامماردەن 10:7 ەسەبىمەن باسىم ءتۇستى. بۇل ايقاستاردىڭ ىشىندە قايىرگەلدى ءداۋىتبەك قارسىلاسىن ەكىنشى راۋندتا ساباپ, جەڭىسكە جەتتى. سودان ءارى قاراي جەكپە-جەكتىڭ قيىن بولارىن بىلگەن بەلارۋس باپكەرلەرى كەزدەسۋدى توقتاتىپ, جەڭىلىستى مويىنداۋعا ءماجبۇر بولدى.
سول كۇنى ءبىزدىڭ راۋان زاتۋللا (52 كگ.) شارشى الاڭداعى العاشقى كەزدەسۋىن وتكىزىپ, بەلارۋس ەدۋارد ۆاحادان جەڭىلىس تاپتى. ودان كەيىن ەربولات ەرمەكوۆ (57 كگ.) ەكىنشى رەت رينگكە شىعىپ, ول دا قارسىلاسىنان ايلاسىن اسىرا المادى. بۇل ايقاس تەپە-تەڭ دەڭگەيدە وتكەنىمەن تورەشىلەر جەڭىستى ءۇندى كۋمار سانديپكە بەرىپ جىبەردى.
وسى چەمپيوناتتا باسقا ەلدەردىڭ دە بوكسشىلارى جەڭىسكە جەتۋ ءۇشىن ايانباي تىرىسىپ جاتىر. الدىڭعى كۇنى تۇرىكتەر ازەربايجاننىڭ ەسەسىن ارميانداردان قايتاردى. ازەربايجاندار دا قاراپ وتىرعان جوق. دۇيسەنبى كۇنى ولار ءتورت كەزدەسۋ وتكىزىپ, سونىڭ ەكەۋىندە جەڭىسكە جەتتى. رەسەي بوكسشىلارى بولسا ءتورت جەكپە-جەكتىڭ بارىندە قارسىلاستارىن ايقىن باسىمدىقپەن ۇتتى. الەم چەمپيوناتىندا ءجۇلدەگە ءۇمىتكەرلەردىڭ ءبىرى ۋكراينا قۇراماسىنىڭ تىنىسى ەندى اشىلعان سياقتى. قازىر ولاردىڭ بارلىق بوكسشىلارى جاقسى ناتيجە كورسەتۋدە.
داستان كەنجالين.