وبلىس اكىمى ەرلان قوشانوۆ جەڭىس كۇنى قارساڭىندا ۇلى وتان سوعىسىنىڭ ارداگەرلەرىن قابىلداپ, وعان ايماعىمىزدىڭ قالالارى مەن اۋداندارىنان كەلگەن 30 ادام شاقىرىلدى. ايماق باسشىسى ايتقانداي, سوعىس جىلدارىنداعى باتىرلاردىڭ قاتارى سيرەپ بارادى. 2010-شى جىلى جەڭىس كۇنىن قاراعاندى وبلىسىندا 1110 ارداگەر قارسى العان بولسا, بۇگىنگى كۇنى ولاردىڭ سانى نەبارى 184. ارداگەرلەرگە ارنالعان مەرەكەلىك كونتسەرتتە كاسىبي ارتىستەر جانە بالالار كوركەم ونەرپازدىق ۇجىمدارى ونەر كورسەتىپ, اقشالاي سىيلىق تابىس ەتىلدى.
جالپى, قاراعاندى قالاسىنىڭ ورتالىق ساياباعىنداعى «ساربازدار دوستىعى» داستۇرلى فەستيۆالىنەن باستالعان يگى شارالار بىرنەشە كۇنگە جالعاستى. وتان قورعاۋشىلار كۇنىنە وراي س.سەيفۋللين اتىنداعى قازاق دراما تەاترىندا «ماحاببات قىزىق مول جىلدار» دراماسى قويىلسا, تەمىرتاۋ قالاسىنىڭ بالالار جانە جاسوسپىرىمدەر تەاترى «ەتو, دەۆۋشكي, ۆوينا!» دەگەن اتاۋمەن سوعىس جىلدارىنىڭ حرونيكاسىن ۇسىندى.
سونداي-اق, قاراعاندىدا راقىمجان قوشقارباەۆتىڭ ەرلىگىن كورسەتكەن اسكەري-تاريحي جاڭعىرتۋ شاراسى ءوتتى. ءبىر كۇنگە جاڭا مايقۇدىق مادەنيەت ۇيى رەيحستاگتىڭ قاسبەتى ۇلگىسىندە بەزەندىرىلىپ, عيماراتتىڭ الدىنداعى الاڭدا تاريحى ءساتتى تاعى ءبىر ەسكە سالدى. شارا بارىسىندا ءتۇتىن گراناتالار مەن سيگنال راكەتالارى قولدانىلدى. جاڭعىرتۋ شاراسىنا 300-گە جۋىق ادام قاتىسىپ, ايگىلى ساربازدىڭ قىزى ءاليا قوشقارباەۆا قۇرمەتتى قوناق بولدى.
«اكەم ول ۋاقىتتا 20 جاستاعى جاس جىگىت ەدى. وسى الاڭدا جەتى ساعات بويى, باسىن كوتەرمەي بوراپ تۇرعان وقتىڭ ورتاسىمەن ەڭبەكتەي جىلجىعاندىعىن ەلەستەتۋدىڭ ءوزى قورقىنىشتى. اكەم ماعان ءوزىنىڭ ەرلىگىن ايتپايتىن, باتىرلىعىن باسقالاردان ەستىدىم. ونىڭ ەرلىگىن ەسكە الۋعا ارنالعان وسى شارانى ۇيىمداستىرۋشىلارعا راحمەتىمدى ايتامىن. تاريحتىڭ وسىنداي كورىنىستەرى ارقىلى جاستارىمىز سوعىستىڭ قانداي بولعانىن, بۇگىنگى بەيبىت كۇن قانداي باعامەن كەلگەنىن ءتۇسىنسىن», - دەيدى باتىردىڭ قىزى.
اتالمىش ەرلىكتى كورسەتۋ يدەياسىن تاريح اۋەسقويلارى كلۋبىنىڭ مۇشەلەرى بىرنەشە جىل قاتارىنان ويلاستىرىپ كەلەدى. بۇعان دەيىن قاراعاندىلىق ەنتۋزياستار باۋىرجان مومىش ۇلىنىڭ 100 جىلدىق مەرەيتويىنا ورايلاستىرىپ, كريۋكوۆ اۋىلىنىڭ جانىنداعى شايقاستىڭ جاڭعىرتۋىن وتكىزگەن بولاتىن.
جەڭىس كۇنى قارساڭىندا پاتريوتتىق جوبانى جۇزەگە اسىرۋدى قاراعاندى قالالىق ءماسليحاتىنىڭ دەپۋتاتى, كاسىپكەر تولەگەن ءاشىموۆ ۇسىنعان. وزى وعان دەمەۋشىلىك كورسەتكەن. يدەيانى اسكەري-پاتريوتتىق تاربيەمەن اينالىساتىن اۋلا كلۋبتارى بىردەن قۇپتاعان ەكەن. راقىمجان قوشقارباەۆ پەن گريگوري بولاتوۆتىڭ رولدەرىن كاستينگ ارقىلى تاڭداۋ تۇسكەن الماس امىرە مەن يلگيز الپىسباەۆ سومدادى.
ال, كەشە ءداستۇرلى تۇردە قاراعاندىدا «ماڭگىلىك پولك» شەرۋى ساپىندا مىڭداعان قالا تۇرعىندارى وتان ءۇشىن جاندارىن قيعان اتا-بابالارىنا تاعزىم ەتىپ, قالا كوشەلەرمەن ءجۇرىپ ءوتتى.
جەڭىس كۇنىندە وتكىزىلەتىن ءداستۇرلى ميتينگ-رەكۆيەم, جالپى جيىن «ماڭگىلىك الاۋ» مەموريالىنىڭ الدىندا بولدى. وعان وبلىس اكىمى ەرلان قوشانوۆ ارنايى قاتىسىپ, بارشا قاراعاندىلىقتاردى ۇلى جەڭىس كۇنىمەن قۇتتىقتادى.
– ەگەر ءبىزدىڭ بابالارىمىز سول سوعىستا جەڭىسكە جەتپەسە, ءبىز بەيبىت ومىر سۇرەر مە ەدىك؟ وتان ءۇشىن جانىن قيعان جاۋىنگەرلەرگە, ارداگەرلەرگە دەگەن قۇرمەتىمىز - مىنا تۇرعان ماڭگىلىك الاۋ سياقتى. ەش ۋاقىتتا وشپەيدى, ەش ۋاقىتتا سونبەيدى. جەڭىمپازدارعا مىڭ تاعزىم, – دەدى ەرلان جاقان ۇلى.
ميتينگتەن سوڭ وبلىس əكىمى بىرقاتار سوعىس ارداگەرلەرىنىڭ شاڭىراعىندا بولىپ, ولاردى جەڭىس كۇنىمەن قۇتتىقتاپ, باعالى سىيلىقتار تابىس ەتتى.
ارى قاراي, جەڭىس ساياباعىندا مەرەكەلىك شارالار جالعاسىن تاپتى. ول جەردە دە «ەر ەسىمى – ەل ەسىندە» اتتى كونتسەرتتىك باعدارلاما باستالىپ, قالا جۇرتشىلىعى ورتالىق ساياباقتا وتكەن رەترو-اۆتوموبيلدەر كورمەسىن تاماشالادى. مۇنداي ءىس-شارالار, وبلىس ورتالىعىنا جاقىن «تەمىرجولشىلار», «مولودەجنىي», «جاڭا مايقۇدىق» مادەنيەت ۇيلەرىندە دە اتالىپ ءوتتى.
ميراس اسان,
«ەگەمەن قازاقستان»
قاراعاندى وبلىسى