كەشە ۇكىمەت ۇيىندە قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ يسپانيا كورولدىگى ۇكىمەتىنىڭ توراعاسى حوسە لۋيس رودريگەس ساپاتەرومەن كەزدەسىپ, ەكى ەل اراسىنداعى جاڭا قۇجاتتارعا قول قويۋ راسىمىنە قاتىستى. كەزدەسۋ يسپانيا ۇكىمەتى توراعاسىنىڭ ەلىمىزگە ەكى كۇندىك رەسمي ساپارى اياسىندا ءوتتى.
ەلىمىزدىڭ يسپانيا كورولدىگىمەن ديپلوماتيالىق قارىم-قاتىناس ورناعان جىلدار ىشىندە قول جەتكىزگەن جەتىستىكتەرى ەكىجاقتى بايلانىستىڭ جاڭا دەڭگەيگە كوتەرىلگەندىگىن ايعاقتايدى. ۇكىمەت باسشىسى كارىم ءماسىموۆ پەن يسپانيا كورولدىگى ۇكىمەتىنىڭ توراعاسى حوسە لۋيس رودريگەس ساپاتەرونىڭ قاتىسۋىمەن وتكەن ىنتىماقتاستىق تۋرالى ەكىجاقتى قۇجاتتارعا قول قويۋ ءراسىمى بارىسىندا قازاقستان جانە يسپانيا مەملەكەتتەرى اراسىندا قىلمىستىق ىستەر بويىنشا ءوزارا قۇقىقتىق كومەك كورسەتۋ تۋرالى كونۆەنتسياعا, قىلمىسقا قارسى كۇرەستەگى ىنتىماقتاستىق تۋرالى مەموراندۋمعا قول قويىلدى.
سونداي-اق قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتى مەن يسپانيا كورولدىگى سىرتقى ىستەر مينيسترلىگىنىڭ ديپلوماتيا مەكتەبى اراسىندا ءوزارا تۇسىنىستىك تۋرالى مەموراندۋمعا قول قويىلدى. ال «قازمۇنايگاز» ۇك» اق يسپاندىق «Repsol» كومپانياسىمەن ءوزارا تۇسىنىستىك تۋرالى مەموراندۋمعا, «قازاقستان ينجينيرينگ» ۇك» اق «يندرا» كومپانياسىمەن قورعانىس جانە قاۋىپسىزدىك سالاسىنداعى ىنتىماقتاستىق تۋرالى كەلىسىمگە, سونىمەن قاتار, «اتامەكەن» ۇەپ يسپانيانىڭ كاسىپكەرلىك ۇيىمدارىنىڭ كونفەدەراتسياسىمەن ءوزارا تۇسىنىستىك تۋرالى مەموراندۋمعا قول قويدى. قازاقستاننىڭ ساۋدا-ونەركاسىپ پالاتاسى مەن يسپانيانىڭ ساۋدا-ونەركاسىپ پالاتاسىنىڭ جوعارى كەڭەسى قازاقستاندىق-يسپاندىق ىسكەرلىك كەڭەس قۇرۋ تۋرالى كەلىسىمگە كەلسە, «قازاق مۇناي جانە گاز ينستيتۋتى» اق پەن «تەحنيكاس رەۋنيداس» كومپانياسى ءوزارا تۇسىنىستىك تۋرالى مەموراندۋمدى بەكىتتى.
بۇل قۇجاتتارعا قول قويۋ قازاقستان مەن يسپانيا اراسىنداعى ءتۇرلى سالالارداعى ىنتىماقتاستىقتى جوعارى دەڭگەيگە كوتەرۋدە ماڭىزدى ءرول اتقاراتىن بولادى.
ۆەنەرا تۇگەلباي.