بۇگىندە وندىرىستە تەحنيكالىق ماماندىق يەلەرىنە سۇرانىس وتە جوعارى. اسىرەسە, ءوندىرىس ورىندارىنا تەوريالىق ءبىلىمىن ءىس ءجۇزىندەگى تاجىريبەمەن ۇشتاستىرعان جاس ماماندار كەرەك-اق. ق.ساتباەۆ اتىنداعى قازۇتۋ وقۋ باعدارلامالارىن جۇزەگە اسىرۋ بارىسىندا وسى ماسەلەگە زور كوڭىل ءبولىپ كەلەدى. بۇل باعىتتاعى جۇمىستاردى جاقسارتا ءتۇسۋ ماقساتىندا ۋنيۆەرسيتەتتە يندۋستريالدى-كەڭەستىك كوميتەت قۇرىلىپ, ونىڭ العاشقى وتىرىسىنا ۋنيۆەرسيتەت باسشىلارى جانە قازاقستاندىق بىرنەشە كومپانيادان كەلگەن وكىلدەر قاتىستى.
وتىرىستى اشقان ۋنيۆەرسيتەت رەكتورى, پروفەسسور ج.ءادىلوۆ ءبىلىم بەرۋ ءىسىنىڭ وندىرىستەگى ۇدەرىستەن الشاقتاپ كەتپەۋى ءۇشىن ۋنيۆەرسيتەتتە ءبىلىم بەرۋ ساپاسىن جاقسارتۋ مەن عىلىمي جۇمىستاردى جەتىلدىرە ءتۇسۋ باعىتىندا اتقارىلعان ءىس-شارالارعا, وقۋ ورنىنىڭ قول جەتكىزگەن تابىستارىنا جانە ءىس بارىسىندا كەزدەسكەن قيىندىقتارعا توقتالىپ, ولاردى شەشۋدىڭ ءتيىمدى جولدارى قاراستىرىلىپ جاتقانىن جەتكىزسە, كومپانيا وكىلدەرى رەكتورعا وسى ماسەلەلەر ءتوڭىرەگىندە وزدەرىن قىزىقتىرعان ساۋالدارىن قويدى. كەلەسى كەزەكتە ولار قازۇتۋ-مەن ءوز كومپانيالارى اراسىندا قانداي ىسكەرلىك بايلانىس ورناتۋعا بولاتىنىن ايتىپ, ۇسىنىستارىن جەتكىزدى. ولاردىڭ كوپشىلىگى قازۇتۋ-مەن تىعىز قارىم-قاتىناس ورناتۋعا دايىن ەكەندىكتەرىن ءبىلدىردى. ياعني, كوپتەگەن كومپانيالاردا ۋنيۆەرسيتەت ستۋدەنتتەرىنىڭ وندىرىستىك ءتاجىريبەدەن وتۋلەرىنە مۇمكىندىك زور. كومپانيا وكىلدەرىنىڭ بىلىكتى ماماندارى مەن عالىمدارى ۋنيۆەرسيتەت شاكىرتتەرى مەن وقىتۋشىلارىنا ءدارىس وقىپ, تاجىريبەلەرىمەن ءبولىسسە, بىلىكتى مامان دايارلاۋدا مۇنىڭ كوپ پايداسى بولارىن ايتتى. ەكى جاق تا وسى ماسەلەلەردى ەگجەي-تەگجەيلى قاراستىرۋدى جاقىن ارادا قولعا الماق.
ءبىر ايتا كەتەتىن ءجايت, يندۋستريالدى-كەڭەستىك كوميتەتتىڭ مۇنداي وتىرىسى الداعى ۋاقىتتا جىلىنا ەكى رەت وتكىزىلەدى دەپ جوسپارلانىپ وتىر.
گۇلزەينەپ سادىرقىزى.