اۆستريا استاناسىندا ءوتىپ جاتقان بۇكىلالەمدىك ەكونوميكالىق فورۋمدا تالقىلانۋدا
8 ماۋسىمدا ۆەنادا ەۋروپا مەن ورتالىق ازياعا ارنالعان ءبۇكىلالەمدىك ەكونوميكالىق فورۋم جۇمىسىن باستادى. ماجىلىستەر حوفبۋرگ سارايىنىڭ زالدارىندا وتۋدە جانە ولار ايماقارالىق ىنتىماقتاستىقتىڭ كەلەشەگىنە ارنالۋدا.
«يننوۆاتسيالار شەكارالارىن كەڭەيتۋ» ۇرانىمەن ءوتىپ جاتقان فورۋمنىڭ باعدارلاماسىندا عالامدىق باسەكەلەستىك, رەسۋرستاردى ءتيىمدى پايدالانۋ, جاڭا قاۋىپ-قاتەرلەر الدىندا بەكەمدىلىكتى قامتاماسىز ەتۋ سياقتى وزەكتى تاقىرىپتار بويىنشا ارنايى جۇمىس سەسسيالار وتكىزىلۋدە.
ءدال وسى كۇندەرى استانادا ءوتىپ جاتقان VII بۇكىلالەمدىك يسلام ەكونوميكالىق فورۋمىمەن قاتار, ۆەناداعى ەكونوميكالىق كونگرەسس اعىمداعى اپتانىڭ اسا ءىرى حالىقارالىق وقيعاسى بولىپ تابىلادى. وعان الەمنىڭ 67 ەلىنەن كەلگەن جۇزدەگەن قاتىسۋشىلار, اتاپ ايتقاندا, مەملەكەت جانە ۇكىمەت باسشىلارى, ەكونوميكالىق ۆەدومستۆولار مەن ۇلتتىق قارجى ينستيتۋتتارىنىڭ جەتەكشىلەرى, حالىقارالىق ىسكەر ەليتاسى, اكادەميالىق توپتار مەن ازاماتتىق قوعام وكىلدەرى قاتىناسۋدا.
بۇكىلالەمدىك ەكونوميكالىق فورۋم جۇمىسىنا قازاقستان دەلەگاتسياسىنىڭ قۇرامىندا پرەمەر-ءمينيستردىڭ ورىنباسارى ەربول ورىنباەۆ, ەكونوميكالىق دامۋ جانە ساۋدا ءمينيسترى قايرات كەلىمبەتوۆ, ەكونوميكالىق ينتەگراتسيا ءمينيسترى جانار ايتجانوۆا قاتىسۋدا. ءىس-شارالار باعدارلاماسىنا سايكەس, ق.كەلىمبەتوۆكە ۇيىمداستىرۋشى رەتىندە فورۋمعا تەڭ توراعالىق ەتۋ قۇرمەتتى ءارى جاۋاپتى مىندەتى جۇكتەلدى. كونگرەسس تەڭ توراعالارى قاتارىندا سونداي-اق بريتانيالىق «BT Group» باسشىسى مايكل رەيك, رەسەي «سبەربانكى» باسقارما توراعاسى گەرمان گرەف, گفر-ءدىڭ «SAP» كونتسەرنىنىڭ اتقارۋشى ديرەكتورى دجيم حاگەمانن-شناب بار.
فورۋم قارساڭىندا جانە ونىڭ بارىسىندا قازاقستاندىق دەلەگاتسيا اۆستريالىق تاراپپەن ءبىرقاتار ماڭىزدى ەكىجاقتى كەزدەسۋلەر وتكىزدى. ەربول ورىنباەۆ اۆستريانىڭ فەدەرالدىق پرەزيدەنتى حاينتس فيشەرمەن سۇحبات قۇردى. ۆيتسە-پرەمەر سونداي-اق فورۋمنىڭ «ورتالىق ازيا بۇرىلۋ پۋنكتىندە» اتتى سەسسياسىندا ءسوز سويلەدى. قازاقستاندىق دەلەگاتسيا باسشىسىنىڭ كواليتسيالىق كونسەرۆاتيۆتىك پارتياسىنىڭ كوشباسشىسى, فەدەرالدىق ۆيتسە-كانتسلەر – ەۋروپالىق جانە حالىقارالىق ىستەر جونىندەگى مينيستر ميحاەل شپيندەلەگگەرمەن كەزدەسۋى جوسپارلانۋدا.
ەلىمىزدىڭ ەكونوميكالىق دامۋ جانە ساۋدا مينيسترلىگى قازاقستان-بريتانيا ساۋدا-ەكونوميكالىق پالاتاسىمەن بىرلەسە وتىرىپ فورۋمنىڭ جەتەكشى ساراپشىلارىمەن جۇمىس كەزدەسۋىن ۇيىمداستىردى. قازاقستاندىق دەلەگاتسيا سونداي-اق يۋنيدو-نىڭ باس ديرەكتورى ك.يۋمكەللامەن كەزدەستى.
اۆستريانىڭ ونەركاسىپشىلەر بىرلەستىگى قازاقستان ۇكىمەتى ءمۇشەلەرى قۇرمەتىنە قابىلداۋ جاساپ, وعان ەلىمىزدىڭ ۇدەمەلى يندۋستريالىق-يننوۆاتسيالىق دامۋ باعدارلاماسىنا قىزىعۋشىلىق تانىتىپ وتىرعان جەتەكشى اۆستريالىق كومپانيالاردى شاقىردى.
قازاقستان دەلەگاتسياسى مۇشەلەرى فورۋمنىڭ «ينفراقۇرىلىم ورنىقتىلىعى», «ەۋروپا جانە ورتالىق ازيانىڭ اشىلماعان الەۋەتى» جانە «ەنەرگەتيكالىق قاۋىپسىزدىكتىڭ تەپە-تەڭدىگى» سەسسيالارىندا بايانداما جاساۋدا. فورۋم قاتىسۋشىلارى قاتارىندا «سامۇرىق-قازىنا» ۇلتتىق ءال-اۋقات قورى» اق جانە قازاقستاننىڭ ىسكەر توپتارىنىڭ وكىلدەرى بار.
ساپار اياسىندا جانار ايتجانوۆا اۆستريانىڭ ەكونوميكالىق جانە ساۋدا ۆەدومستۆولارى باسشىلىقتارىمەن كەزدەسۋلەر وتكىزىپ, ەكىجاقتى ىنتىماقتاستىق, قازاقستاننىڭ بۇكىلالەمدىك ساۋدا ۇيىمىنا ەنۋى, سونداي-اق قازاقستان, بەلارۋس جانە رەسەي اراسىنداعى كەدەندىك وداق قىزمەتى جايىندا پىكىر الماستى.
قازاقستاندىق دەلەگاتسيا كەدەندىك وداق جانە قالىپتاسىپ وتىرعان بىرىڭعاي ەكونوميكالىق كەڭىستىكتىڭ زاڭدىق نەگىزى تۋرالى, وسىعان وراي 170 ميلليون حالقى بار وداق اۋماعىنا ءونىم وتكىزۋگە مۇمكىندىگى بار قازاقستاندا ينۆەستورلار ءۇشىن جاڭا كوكجيەكتەر اشىلعانى جايىندا حاباردار ەتتى.
تالعات جۇماعۇلوۆ, «ەگەمەن قازاقستان» – ۆەنادان.