كناۋف – وتباسىلىق بيزنەستىڭ ۇزدىك ۇلگىسى نەگىزىندە قۇرىلعان حالىقارالىق كومپانيا. ءوز قىزمەتى اۋقىمىنىڭ كولەمىنە قاراماستان ول وسىناۋ باستى قۇندىلىقتارىن مۇلتىكسىز ساقتاپ كەلەدى. بۇگىندە كناۋف قۇرىلىس ماتەريالدارىن ءوندىرۋشىلەردىڭ الەمدەگى ەڭ ءىرى حالىقارالىق توبىنىڭ بىرىنەن سانالادى.
ولار ينۆەستيتسيالىق قىزمەتىن 1993 جىلى رەسەيدە باستاعان بولاتىن. سودان كەيىن قۇلاشىن كەڭ جايىپ ۋكراينادا, مولدوۆادا, قازاقستاندا, ءوزبەكستان مەن ءازىربايجاندا كاسىپورىندار اشا باستادى. ماركەتينگ قىزمەتىن تمد ەلدەرىنىڭ بارىندە دەرلىك ورىستەتە ءتۇستى.
تمد ەلدەرىندەگى كاسىپورىنداردىڭ ءبارى قازىرگى زامانعى قۇرال-جابدىقتارمەن جاراقتانعان, حالىقارالىق توپتىڭ ءوندىرىس تەحنولوگياسى دا بارلىق جەردە بىرتەكتى. شىعاراتىن ءونىمدەرىنىڭ ساپاسى اسا جوعارى, سول ورايدا ساپا ستاندارتى گەرمانياداعى كاسىپورىنداردا دا, تمد ەلدەرىندەگى كاسىپورىنداردا دا بىردەي. قۇرعاق قۇرىلىس جۇيەسى ءبولمەارالىق قۇرىلىمداردى تۇرعىزۋ, قابىرعالار مەن ەدەندەردى قاپسىرۋ كەزىندە كەڭىنەن پايدالانىلادى.
قاپشاعاي وڭىرىندەگى زارەچنىي اۋىلىنىڭ سولتۇستىك قاپتالىنا قونىستانعان «كناۋف گيپس» كاسىپورنىنىڭ اتاعى قازىر قازاقستاننان تىس ايماقتارعا دا كەڭىنەن جايىلىپ, ورتالىق ازيا مەملەكەتتەرىنىڭ بىرقاتارىنا ءوز ونىمدەرىمەن تانىمال. ۇزىندىعى – 2,5, ەنى 1,2 مەتر, قالىڭدىعى 9,5 جانە 12,5 ميلليمەتر بولاتىن گيپستى كارتون تاقتالار كونۆەيەرلى تاسىلمەن شىعارىلادى. ۇلكەن بۋمالى قوڭىرقاي ءتۇستى قاعازدىڭ بىرقالىپتى جازىلىپ, استى-ءۇستىنە قويۋ كىلەگەيدەي قۇيىلىپ تۇرعان گيپس ەرىتىندىسىن ءاپ-ساتتە قاۋسىرىپ الىپ, جول-جونەكەي قاتقىلدانىپ قالىپتان شىققان قۇيماداي كۇيگە تۇسەتىنىن تاماشالاۋدىڭ ءوزى ءبىر عانيبەت. مۇندا ءبىر اۋىسىم جۇمىس بارىسىندا 90 مىڭ شارشى مەتر دايىن ونىمدەر شىعارىلادى. ءتيىستى ماقساتتارعا ساي اۆتوماتتاندىرىلعان جابدىقتاردىڭ تەتىگىن باسىپ, جالپى جۇمىس جوسىعىن قاداعالاپ تۇراتىندار سونشالىقتى كوپ ەمەس, ءبىر اۋىسىمدا 15-اق ادام بارىنە ۇلگەرىپ تۇرادى. ال, كاسىپورىننىڭ وزىندە جۇمىس ىستەيتىندەردىڭ جالپى سانى 250 ادامعا جەتەدى. باس ديرەكتورى الەكساندر ەفيمەنكو دەيتىن ازامات كوپ جىلداردان بەرى ۇيىمداستىرۋشىلىق قابىلەتىمەن كوپشىلىككە تانىمال بولعان بيزنەس وكىلدەرىنىڭ ءبىرى.
ىرگەلى كاسىپورىننىڭ نەگىزگى ءونىمى كارتوندى گيپس تاقتالار بولعانىمەن, قۇرىلىسقا ارناپ قوسىمشا شىعاراتىن قۇرعاق قوسپالارى تاعى بار. سىلاققا, قابىرعا ساڭىلاۋلارىن بىتەۋگە, اكتەۋگە قاجەتتى قۇرعاق ۇنتاقتار, قۇيما ەدەندەردى, سۋ جانە سىز وتكىزبەيتىن قورعانىش جاساۋ كەزىندە كادەگە اساتىن ءتۇرلى كومپونەنتتەر وسى ءوندىرىس ورنىندا دايىندالادى. ولار جانە اسا قاراپايىم, قولجەتىمدى ماتەريال بولعاندىقتان جاپپاي سۇرانىسقا يە جانە باعاسى دا تۇتىنۋشى قالتاسىنا ءاردايىم شاق كەلىپ تۇرادى. سودان دا بولار, «كناۋف گيپس-قاپشاعاي» دەپ اتالاتىن بۇل كاسىپورىننىڭ ونىمدەرىنە دەگەن سۇرانىس ەش باسەڭدەگەن ەمەس.
كۇمىسجان بايجان, الماتى وبلىسى.