مەرەيتوي: اپتا ايشىقتارى

وبلىس اكىمىنىڭ ورىنباسارى ارمان قىرىقباەۆ جەتەكشىلىك ەتەتىن مەرەيتويلىق كوميسسيانىڭ كەزەكتى ماجىلىسىندە ازىرلىك بارىسى تاعى ءبىر پىسىقتالدى. وندا قازاقستان جازۋشىلار وداعى توراعاسىنىڭ ءبىرىنشى ورىنباسارى عالىم  جايلىباي, بەلگىلى اقىن سەرىك تۇرعىنبەك, ايتىسكەر امانجول ءالتاي جانە باسقا دا قاتىسۋشىلار ءوز وي-ۇسىنىستارىن ورتاعا سالىپ, حالقىمىزعا ورتاق تويدى ەستە قالارلىقتاي وتكىزۋ جونىندە اقىل-كەڭەس قوستى.

ايقىن نەسىپباي, قاراعاندى.

ارداگەرلەر جاڭا ۇيگە قونىستاندى. قىزىلوردا قالاسىنىڭ «استانا»  شاعىن اۋدانىندا 30 پاتەرلى جالدىق ءۇي تۇرعىنداردىڭ يگىلىگىنە بەرىلدى. سالتاناتتى شاراعا وبلىس اكىمى بولاتبەك قۋاندىقوۆ قاتىستى. – ەلباسىنىڭ باستاماسىمەن قولعا الىنعان «تۇرعىن ءۇي» باعدارلاماسى اياسىندا وبلىس ورتالىعىندا كوپ قاباتتى 41 ءۇي سالىنىپ, 1362 تۇرعىن جەكە پاتەرگە يە بولدى. جاڭادان بوي كوتەرگەن «سىرداريا» شاعىن اۋدانى – وسى باعدارلامانىڭ ناقتى جەمىسى,– دەدى بولاتبەك بايان ۇلى. ال «استانا» شاعىن اۋدانىنىڭ العاشقى تۇرعىندارى ۇوس-نىڭ ارداگەرلەرى ەكەنىن ايتقان ابزال. بۇل ءۇيدىڭ باستى ەرەكشەلىگى, ءبىرىنشى قاباتىندا كەڭسە ورنالاستىرۋعا مۇمكىندىك مول. جاقىن ارادا اقمەشىت-سىرداريا ورتالىق مەشىتىنە دەيىن وسىنداي 13 ءۇي سالىنباقشى.

ەرجان بايتىلەس, قىزىلوردا.

تۇركيادان تابىسپەن ورالدى. وسكەمەندەگى ء«ۇمىت» بالالار ءۇيىن ۇزاق جىلداردان بەرى تاجىريبەلى پەداگوگ, جەتىم بالالاردىڭ «ەكىنشى» اناسى مايرا بەيساقانوۆا باسقارىپ كەلەدى. جاقىندا بالالار ءۇيىنىڭ تاربيەلەنۋشىلەرى تۇركيانىڭ فەتحيە قالاسىندا وتكەن «التىن كۇن» حالىقارالىق فەستيۆالىنەن تابىستى ورالدى. دۇنيە ءجۇزىنىڭ 23 ەلىنىڭ ەڭ تاڭداۋلى دەگەن ونەرلى جاستارى قاتىسقان بايقاۋدا وسكەمەندىك ورەندەر ەكىنشى ورىندى يەلەنىپ, ءوز ونەرلەرىمەن كوپشىلىكتى ءتانتى ەتتى. ء«ۇمىت» بالالار ءۇيىنىڭ ونەرپازدارى بۇعان دەيىن رەسسەيدە, ەۋروپا ەلدەرىنىڭ بىرنەشە قالالارىندا دا جەڭىمپاز اتانعان ەدى. ال رەسپۋبليكالىق جارىستاردا دا ۇمىتتىكتەر الدىڭعى قاتاردا. ءوڭىر باسشىسى ب. ساپارباەۆ بالالار ۇيىنە جان-جاقتى كومەك جاساپ تۇرادى.

وڭداسىن ەلۋباي, وسكەمەن.

قالا حانىمدارىنىڭ فورۋمى. وتكەن اپتادا تاۋەلسىزدىكتىڭ 20 جىلدىعىنا وراي ورال قالاسى حانىمدارىنىڭ ءىى فورۋمى ءوتتى. وندا ايەلدەردىڭ قوعامداعى ورنى مەن ءرولى تالقىلاندى. اقىن اقۇشتاپ باقتىگەرەەۆا مەن ەڭبەك ارداگەرى ماعريپا ىسقاقوۆا ايەلدەر ەڭ الدىمەن انا بولۋ ءۇشىن جاراتىلعانى جونىندە الەۋمەتتىك وي-پىكىر ساباقتادى. سونداي-اق فورۋمدا وبلىستاعى ۇكىمەتتىك ەمەس ايەلدەر ۇيىمدارىنىڭ گەندەرلىك ساياساتتى جۇرگىزۋ جونىندەگى قىزمەتتەرى دە ساراپقا سالىندى. جيىن بارىسىندا ءبىر توپ ايەلدەرگە ەلباسىنىڭ العىس حاتى تابىس ەتىلدى.

تەمىر قۇسايىن, ورال.

انا مەن بالا اللەياسى اشىلدى. وتكەن اپتادا پاۆلودارداعى پەريناتالدىق پەرزەنتحانا ورتالى­عىنىڭ اۋلاسىندا قازاقستان  ىسكەر ايەلدەرى قاۋىمداستىعى قوعامدىق  بىرلەستىگى  مەن وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ باستاماسىمەن  «انا مەن بالا» اللەياسى اشىلدى. تاۋەلسىزدىكتىڭ 20 جىلدىعىنا وراي باستالعان يگى شاراعا وبلىس اكىمىنىڭ ورىنباسارى ءاليا عالىموۆا جانە  قاۋىمداستىق  مۇشەلەرى  قاتىسىپ,  جاس  كوشەتتەر وتىرعىزدى. الداعى ۋاقىتتا وسى اۋلاعا قۇشاعىندا ءسابيى بار انا بەينەسى سالىنعان ءمارمار تاس بەلگى ورناتىلادى.

فاريدا بىقاي, پاۆلودار.

جالىندى  جاستار  باس قوستى. ەلىمىزدىڭ بويتۇمارى – تاۋەلسىزدىك مەرەكەسىنە دەگەن ماعىناسى زور اۋقىمدى شارالار جەتىسۋ جەرىندە  جاراسىم تاۋىپ, ۇيىمشىلدىقپەن وتكىزىلىپ كەلەدى. الاكول اۋدانىندا بىرنەشە ەلدى مەكەن جاستارىنىڭ باس قوسقان ء«بىز – تاۋەلسىزدىك پەن جاسامپازدىقتىڭ جالىندى جاستارىمىز!» اتتى فورۋمى ءوتتى. رۋحاني بىرلىك – حالىقتار دوستىعىنىڭ قاينار كوزى ەكەندىگىن ايعاقتاعان ويجايلاۋلىقتار ءوز ونەرلەرىن جان-جاقتى كورسەتۋگە ۇمتىلدى. وسى اۋىلداعى تاتار ەتنومادەني ورتالىعى ۇيىم­داستىرعان شەرۋ دە دىتتەگەن ماقساتىنا جەتتى. ولار دوستىقتىڭ المايتىن قامالى, اسپايتىن اسۋى جوقتىعىن كورسەتە ءبىلدى.  الاكولدىكتەر اتالعان فورۋمدى دۋمانداتىپ وتكىزدى. «جاسىل ەل» باعدارلاماسى اياسىندا «مەنىڭ جاسىل كوشەم» اكتسياسىمەن مەرەيلى مەرەكەگە وراي وسى كۇنى 2000 ءتۇپ اعاش كوشەتتەرى تىگىلدى. فورۋمعا قاتىسۋشىلار تابيعاتتىڭ تەپە-تەڭدىگىن ساقتاۋ ارقىلى تۋعان جەردى كوركەيتۋگە وزدەرىنىڭ قوماقتى ۇلەستەرىن قوستى.

كۇمىسجان بايجان, الماتى  وبلىسى.  

سالاعا سەرپىن بەرگەن باستاما. كوكشەتاۋ قالالىق اكىمدىگىندە جۇرتشىلىق جۇرەگىن جەلپىنتكەن مەموراندۋمعا قول قويىلدى. باستاما يەلەرى – اقمولا وبلىستىق قۇرىلىس كاسىپورىندارىنىڭ كەڭەسى مەن «بتا بانك» اق كوكشەتاۋ فيليالى ۇستىمىزدەگى جىلى وبلىس ورتالىعىندا 60 پاتەرلىك جاڭا تۇرعىن ءۇي قۇرىلىسىن جۇرگىزىپ, پايدالانۋعا بەرۋدى جوسپارلاۋدا. جاڭا جوبانىڭ باستى ەرەكشەلىگى, ەڭ الدىمەن قۇرىلىس سالاسىنىڭ وكىلدەرى مەن 2011-2015 جىلدارعا ارنالعان مەملەكەتتىك تۇرعىن ءۇي قۇرىلىسى باعدارلاماسىنا ەنبەيتىن ازاماتتاردىڭ قونىس توي قۋانىشىن كوبەيتۋ بولىپ تابىلادى. كەڭەس توراعاسى ت.شاپاعاتوۆ پەن «بتا بانك» فيليالىنىڭ ديرەكتورى ب.وس­پا­نوۆ­تىڭ ايتۋىنشا, بۇل باستاما قالاداعى تۇرعىن ءۇي كەزەگىن ازايتۋمەن قاتار, قۇرىلىس يندۋسترياسى وكىلدەرىنىڭ قولىن ۇزارتىپ, سالانىڭ مەرەيىن وسىرەدى.

باقبەرگەن امالبەك, اقمولا وبلىسى.