جاقىندا ەل تاۋەلسىزدىگىنىڭ 20 جىلدىعىنا ارنالعان سالتاناتتى شارالاردىڭ ءبىرى رەتىندە رەسپۋبليكالىق ۇلاندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كۇندەرى بولىپ ءوتتى. وندا ۋنيۆەرسيتەتتىڭ پروفەسسورلارى, وقىتۋشىلارى مەن ستۋدەنتتەرى اتالعان اسكەري قۇرىلىمدا ۇيىمداستىرىلعان كوپتەگەن ءىس-شارالارعا قاتىستى.
العاشقى كۇنى رەكتور ب.ءابدىرايىم باستاعان ەۇۋ توبى رەسپۋبليكالىق ۇلاننىڭ 0112 اسكەري بولىمىنە كەلدى. ۋنيۆەرسيتەتتىڭ ساياساتتانۋشى جانە فيلوسوف عالىمدارى «ۇلاندىقتار جانە قازاقستاندىق پاتريوتيزم» اتتى دوڭگەلەك ءۇستەلدە ءوز وي-پىكىرلەرىن ورتاعا سالدى. ءتۇرلى سالاعا ماماندانعان بىلىكتى وقىتۋشىلار جاۋىنگەرلەر مەن وفيتسەرلەر الدىندا مەملەكەتتىك-قۇقىقتىق دايىندىقتىڭ نەگىزگى تاقىرىپتارىنا وراي ءدارىس وقىدى. ۇستازدار قاۋىمى ۇلاندىقتار جاتتىعاتىن تير زالىندا مىلتىق اتىپ كوردى.
ەلوردادا ەكىنشى مارتە ءوتكىزىلەتىن وفيتسەرلەردىڭ بي كەشى دە ەۇۋ كۇندەرى اياسىندا ۇيىمداستىرىلدى. ونىڭ نەگىزگى قوناقتارى ۋنيۆەرسيتەتتە قىزمەت ەتەتىن قىز-كەلىنشەكتەر بولدى. ۇلتتىق سالت-ءداستۇرگە جەتىك جاۋىنگەرلەر اراسىندا «ۇلان سۇلتانى» بايقاۋى وتكىزىلدى. ەۇۋ مەن رەسپۋبليكالىق ۇلانداعى بۇل شارالار ءۇش جىلدان بەرى جاستاردى پاتريوتتىققا تاربيەلەۋدە جانە بىلىكتى عالىمداردان ۇلگى الۋعا باعىتتالعان ماڭىزدى ءىس-شارالاردىڭ ءبىرى بولىپ تابىلادى.
ارناي ورماش.استانا.