ماسكەۋدە تۇراتىن وتانداسىمىز – كوپ جىلدار بويى رەسەي مەملەكەتتىك دۋماسىنىڭ ۇلتتار ىستەرى كوميتەتىندە اپپارات باسشىسى لاۋازىمىندا بولعان, قازىر وسى كوميتەت توراعاسىنىڭ كەڭەسشىسى قىزمەتىن اتقاراتىن ساياسي عىلىمدار دوكتورى, بەلگىلى قوعام قايراتكەرى راۋشان قاناپيانوۆا ماسكەۋ جۇرتشىلىعىنا, رەسەي قازاقتارىنا جاقسى تانىمال. راۋشان مۇساحانقىزىنىڭ ءبىلىمى مەن بىلىگى, ومىرلىك تاجىريبەسى مەن ۇيىمداستىرۋشىلىق قابىلەتى رەسەيلىك قازاقتاردىڭ قوعامدىق ۇيىمدارىنىڭ جۇمىسىن جەتىلدىرىپ, جانداندىرۋعا ەلەۋلى ىقپال ەتىپ كەلەدى. ول سونىمەن بىرگە ءبىراز جىلدان بەرى ايەلدەردىڭ تۇركى تىلدەس حالىقتاردىڭ داستۇرلەرىن ساقتاۋعا ءجاردەمدەسەتىن وڭىرارالىق قوعامدىق ۇيىمىن باسقارادى. بۇل 1998 جىلى ماسكەۋدەگى جانە ياكۋتيانىڭ ميرنىي قالاسىنداعى قازاق ايەلدەرىنىڭ باستاماسىمەن دۇنيەگە كەلگەن ۇيىم.
اتالعان ۇيىمنىڭ ايتۋلى جوباسى دەپ جىلما-جىل داستۇرگە اينالعان ۇلتتىق كوستيۋمدەر ءسانىنىڭ حالىقارالىق كونكۋرسىن ايتۋعا بولادى. «بۇل كونكۋرستىڭ ماقساتى, – دەيدى راۋشان قاناپيانوۆا – كيىمدەگى ءھام تۇرمىستاعى ۇلتتىق داستۇرلەردى تەرەڭىرەك زەردەلەۋگە, ءارتۇرلى حالىقتاردىڭ مادەنيەتى مەن ونەرىنە دەگەن قىزىعۋشىلىقتى قالىپتاستىرۋعا, سان الۋان مادەنيەت تۇرلەرىنىڭ ءوزارا توعىسۋى مەن دامۋىنا ىقپال ەتۋ. ەتنوستىڭ قازىرگى زامانعى جوعارى ءسان ۇردىستەرىمەن ۇشتاسقان ءداستۇرلى كيىمدەرىنىڭ سان الۋان باعالى ۇلگىلەرىن كورسەتۋ».
ەكى كۇنگە سوزىلعان بيىلعى كونكۋرستاعى جەڭىمپازدار جايىنا كەلسەك, ءبىرىنشى ورىندى ادىگەي رەسپۋبليكاسىنىڭ, ەكىنشى ورىندى ابحازيانىڭ, ءۇشىنشى ورىندى چەشەنستاننىڭ شەبەرلەرى جەڭىپ الدى. ءارتۇرلى اتالىمدار بويىنشا العاشقى ۇشتىككە كوتەرىلگەن ءسانگەرلەر اراسىندا ماسكەۋدىڭ, ۋلان-باتور قالالارىنىڭ, حاباروۆسك ولكەسىنىڭ, موردوۆيانىڭ, ادىگەيدىڭ, بۋرياتيانىڭ, وزبەكستاننىڭ, ءتۇركىمەنستاننىڭ, ساحا-ياكۋتيانىڭ, ارمەنيانىڭ جانە ت.ب. وڭىرلەردىڭ وكىلدەرى بار.
اتالمىش كونكۋرستىڭ «حالىقتىق ءداستۇرلەردى مۇقيات ساقتاعانى ءۇشىن» دەپ اتالاتىن ارناۋلى جۇلدەسىنە وڭتۇستىك قازاقستان وبلىسىنىڭ تۇركىستان قالاسىنداعى ح.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنەن كەلگەن ءماريام ەزيەۆا يە بولىپ, وسى وقۋ ورنىنىڭ بىرنەشە ستۋدەنتتەرىنە ديپلومدار تاپسىرىلدى دەپ حابارلادى كونكۋرستى ۇيىمداستىرۋشىلار.
سەرىكقالي بايمەنشە, ماسكەۋ.