...پاتەرلەرگە قونىستاندى
جاقىندا حرومتاۋ قالاسىنداعى ءدوڭ تاۋ-كەن بايىتۋ كومبيناتىنىڭ 65 قىزمەتكەرىنىڭ وتباسى باسپانالى بولدى. جاڭا پاتەر كىلتتەرىن العانداردىڭ ءبارى دە كاسىپورىننىڭ جاس جۇمىسشىلارى مەن ماماندارى. ءبىر, ەكى جانە ءۇش ءبولمەلى پاتەرلەر ولارعا ون بەس جىلعا جىلدىق ءوسىمى 1 پايىزدىق نەسيەمەن بەرىلدى. بۇل پاتەرلەر اسا قىمبات ەمەس, ءبىر شارشى مەترى 80 304 تەڭگە تۇرادى.
بۇل «قازحروم» تۇك-نىڭ 2007 جىلدان باستاپ كورپوراتيۆتىك تۇرعىن ءۇي باعدارلاماسى اياسىندا سالعان بەسىنشى ءۇيى بولىپ تابىلادى. تۇرعىن ءۇيدى سالۋعا كاسىپورىن 432 ميلليون تەڭگە جۇمسادى. اتالعان باعدارلاما بويىنشا التىنشى ءۇيدىڭ قۇرىلىسى جۇرگىزىلۋدە. جالپى, كاسىپورىندا جۇمىسشى-قىزمەتكەرلەرگە الەۋمەتتىك جاعداي جاساۋعا باسا كوڭىل بولىنگەن.
ساتىبالدى ءساۋىرباي, اقتوبە وبلىسى.
...بالاباقشانىڭ اتى – «نۇراي»
جاقىندا تاراز قالاسىنداعى «استانا» شاعىن اۋدانىندا «نۇراي» دەپ اتالاتىن 280 بۇلدىرشىنگە ارنالعان جاڭا بالاباقشا اشىلدى. عيماراتتىڭ قۇرىلىس جۇمىسىن وتكەن جىلدىڭ تامىز ايىندا «بينوم» جشس قولعا العان بولاتىن.
سمەتالىق قۇنى 382,403 ملن. تەڭگەنى قۇراعان بالالار باقشاسىندا 12 توپ بولمەسى بار. ادىسكەرگە, پسيحولوگقا, مۋزىكانتقا, مەديتسينا قىزمەتكەرىنە, دەنە شىنىقتىرۋ مامانىنا ارنالعان بولمەلەر دە قاراستىرىلعان.
قۇرىلىس كومپانياسى, سونداي-اق, بالالار باقشاسىن ءبۇلدىرشىندەرگە ارنالعان قاجەتتى جيھازدارمەن, ويىنشىقتارمەن تولىعىمەن جابدىقتادى.
كوسەمالى ساتتىباي ۇلى,تاراز.
...باسشى تاعايىندالدى
ەلىمىزدىڭ مۇناي الىپتارىنىڭ ءبىرى – «ماڭعىستاۋمۇنايگاز» اق-تىڭ باسشىسى اۋىستى. اكتسيونەرلىك قوعامنىڭ باس ديرەكتورى بولىپ بۇعان دەيىن مۇناي جانە گاز ءمينيسترىنىڭ ورىنباسارى قىزمەتىن اتقارعان اسەت ماعاۋوۆ تاعايىندالدى. ول – ماسكەۋدىڭ گۋبكين اتىنداعى مەملەكەتتىك مۇناي جانە گاز اكادەمياسىنىڭ تۇلەگى. ۆيتسە-مينيسترلىككە دەيىن «قازاقويل», «مۇناي جانە گاز تاسىمالداۋ», «قازمۇنايگاز» ۇلتتىق مۇناي-گاز كومپانيالارىندا, «تەڭىزشەۆرويل» جاۋاپكەرشىلىگى شەكتەۋلى سەرىكتەستىگىندە لاۋازىمدى قىزمەتتەر اتقارعان.
ال «ماڭعىستاۋمۇنايگازدىڭ» بۇرىنعى باس ديرەكتورى اليك ايدارباەۆ استاناعا اۋىسىپ, «قازمۇنايگاز» ۇلتتىق كومپانياسى» اق-تىڭ باسقارۋشى ديرەكتورى بولىپ تاعايىندالدى.
جولامان بوشالاق, اقتاۋ.