ەقىۇ ءىس باسىنداعى ءتوراعاسىنىڭ توزىمدىلىك جانە كەمسىتۋگە قارسى كۇرەس ماسەلەلەرى ءجونىندەگى جەكە وكىلى, پارلامەنت سەناتىنىڭ دەپۋتاتى ءادىل احمەتوۆتىڭ ريمدە (يتاليا) مەملەكەتتىك ورگاندار, ۇكىمەتتىك ەمەس ۇيىمدار جانە ءدىني بىرلەستىكتەر وكىلدەرىمەن كەزدەسۋىندە ءدىني ەركىندىكتى ىلگەرىلەتۋ, ءدىني تۇرعىداعى, جاتسىنۋ مەن ناسىلدىك كەمسىتۋگە قارسى ءىس-قيمىل ماسەلەلەرى ءسوز بولدى.
كەزدەسۋ ەقىۇ ءىس باسىنداعى ءتوراعاسىنىڭ ءۇش جەكە وكىلىنىڭ يتاليا مەن ۆاتيكانعا بيىلعى بىرلەسكەن ساپارى اياسىندا بولدى. كيەلى تاقتىڭ مەملەكەتتەرمەن بايلانىس جونىندەگى حاتشىسى – ارحيەپيسكوپى د.مامبەرتيمەن كەزدەسۋى بارىسىندا كەمسىتۋگە قارسى كۇرەس پەن ءدىني ەركىندىك ماسەلەلەرى جونىندەگى ءوزارا ءىس-قيمىلدىڭ ماڭىزدىلىعى اتاپ ءوتىلدى.
د.مامبەرتي دىنارالىق ۇنقاتىسۋ مەن كونفەسسياارالىق ءوزارا تۇسىنىستىكتى ورنىقتىرۋعا قازاقستاننىڭ قوسقان ۇلەسىن جوعارى باعالاي كەلىپ, قاراعاندىداعى كاتوليك شىركەۋى قۇرىلىسىنىڭ قولداۋ تاپقانى جانە اياقتالۋىنا وراي العىس ايتتى.
يتاليانىڭ مۇسىلمان قوعامىنىڭ وكىلدەرىمەن, مينيسترلەر كەڭەسىنىڭ, يتاليا ءىىم ءدىني قاتىناستار جونىندەگى ديرەكتوراتىنىڭ, تەڭ مۇمكىندىكتەر دەپارتامەنتىنىڭ جانە كەمسىتۋ مەن ءناسىلشىلدىككە قارسى ۇلتتىق كەڭسەنىڭ ساراپشىلارىمەن كەزدەسۋلەردە قۋعىنداۋدى, جاتسىنۋ جانە ءناسىلشىلدىكتى مەملەكەتتىك ساياسات دەڭگەيىندە جويۋ سالاسىنداعى شارالار ازىرلەۋ قاجەتتىگى اتاپ كورسەتىلدى, دەپ حابارلادى پارلامەنت سەناتىنىڭ ءباسپاسوز قىزمەتى.