«ۇسىنىلىپ وتىرعان زاڭ جوباسىنىڭ ماقساتى – زاڭنامالىق اكتىلەردى قر كونستيتۋتسياسىنداعى تۇزەتۋلەرگە سايكەس كەلتىرۋ. جوبا قر پرەزيدەنتىنىڭ جارلىعىن ورىنداۋ ماقساتىندا ازىرلەندى. زاڭدى كونستيتۋتسياعا سايكەستەندىرۋ ءۇشىن 7 كودەكس پەن 46 زاڭعا وزگەرىستەر ەنگىزۋ قاجەت. قىلمىستىق كودەكستىڭ 21 بابىندا ازاماتتىقتان ايىرۋ تۇرىندەگى قوسىمشا قىلمىستىق جازا كوزدەلەدى», - دەدى ۇكىمەت وتىرىسىندا اتالعان زاڭ جوباسىن تانىستىرعان ادىلەت ءمينيسترى مارات بەكەتاەۆ.
ونىڭ ايتۋىنشا, زاڭ جوباسىندا تەرروريستىك توپ قۇرۋ, وعان باسشىلىق ەتۋ جانە ونىڭ ارەكەتىنە قاتىسقانى ءۇشىن ازاماتتىقتان ايىرۋ جازاسى قاراستىرىلعان. "قىلمىستىق كودەكستىڭ 21 بابىندا ازاماتتىقتان ايىرۋ تۇرىندەگى قوسىمشا قىلمىستىق جازا كوزدەلەدى. وسىلايشا, قىلمىستىق كودەكستىڭ 10 بابىندا كوزدەلگەن 14 اسا اۋىر تەرروريستىك قىلمىس قۇرامدارى بويىنشا ازاماتتىقتان ايىرۋ تۇرىندەگى قوسىمشا جازا رەتىندە ۇسىنىلىپ وتىر", دەدى مينيستر. سونىمەن قاتار مارات بەكەتاەۆ مەملەكەتتىڭ قۇرىلىمىنا قاۋىپ توندىرگەن ازاماتتارعا جازا كۇشەيەتىنىن ايتتى.
«ۇلتتىق قاۋىپسىزدىك تۋرالى» زاڭىنا سايكەس نەگىزگى ۇلتتىق مۇددەلەرگە كونستيتۋتسيالىق قۇرىلىستىڭ تۇتاستىعى جاتادى. بۇل ۇعىمعا ەلدىڭ تاۋەلسىزدىگى, بىرتۇتاستىعى جانە پرەزيدەنتتىك باسقارۋ نىسانى كىرەدى. قر-نىڭ نەگىزگى ۇلتتىق جانە ومىرلىك ماڭىزى بار مۇددەلەرىنە اۋىر زيان تيگىزەتىن قىلمىستارعا 11 باپتا كوزدەلگەن 16 قىلمىس قۇرامى كىرەدى. مىسالى, گەنوتسيد, سەپەراتيستىك ارەكەت, ەكسترەميستىك توپ قۇرۋ, وعان باسشىلىق ەتۋ نەمەسە ونىڭ ارەكەتىنە قاتىسۋ», - دەدى مينيستر.
سونىمەن قاتار زاڭ جوباسىنا پرەزيدەنت اكىمشىلىگىنىڭ پروكۋراتۋرا جۇيەسى مەن سوت قىزمەتىنە قاتىستى تۇزەتۋلەر مەن تولىقتىرۋلار ەنگىزۋ تۋرالى ۇسىنىستار دا كىرگەن.