«2012 جىلدان بەرى اتىراۋ قالاسىندا جەكەمەنشىك ۇيگە جەر بولىنبەدى. وتكەن جىلى عانا تۇرعىنداردىڭ وتىنىشتەرى قاناعاتتاندىرىلا باستادى. بيىل 2092 جەر تەلىمى بەرىلەدى», - دەدى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ساۋلەت جانە قالا قۇرىلىسى باسقارماسىنىڭ باسشىسى تولەپ ورىنباساروۆ.
2015 جىلعى ەسەپ بويىنشا وبلىس ورتالىعىندا 314,5 مىڭ تۇرعىن بار. باس جوسپاردا 2030 جىلعا قاراي اتىراۋ قالاسى حالقىنىڭ سانى 350 مىڭنان اسادى دەپ كورسەتىلگەن. سول كەزدە قالا اۋماعى ءۇش ەسەگە ۇلعايادى, ماحامبەت اۋدانىنداعى بەرەكە, المالى اۋىلدارى قالا قۇرامىنا ەنگىزىلەدى.
وبلىستىڭ باس ساۋلەتشىسى «نۇرلى جەر» باعدارلاماسى اياسىندا 37 كوپقاتارلى تۇرعىن ءۇي قۇرىلىسى ءجۇرىپ جاتقانىنان حاباردار ەتتى. 2013-2016 جىلدارى وبلىس ورتالىعى مەن 143 ەلدىمەكەننىڭ قولدانىستاعى باس جوسپارلارى جاڭارتىلدى.
«توزىعى جەتكەن ۇيلەردى قيراتىپ, جاڭالارىن سالۋدا استانادان ۇلگى الامىز», - دەدى ت.ورىنباساروۆ.
باقىتگۇل باباش,
«ەگەمەن قازاقستان»
اتىراۋ