قازاقستان قارۋلى كۇشتەرىنىڭ قۇرىلعانىنا 25 جىل تولۋىنا وراي باس قالادا بۇرىن-سوڭدى بولىپ كورمەگەن اۋقىمدا اسكەري پاراد وتەتىنىن بۇعان دەيىن حابارلاعان بولاتىنبىز. استانانىڭ ىرگەسىندە قوس تىككەن جاۋىنگەرلەر وسى سالتاناتتى شەرۋگە كۇن قۇرعاتپاي قىزۋ دايىندالۋدا. ساربازدار سالتاناتتى شاراعا ازىرلەنىپ, جەر-جەردەگى بولىمدەردەن اسكەري تەحنيكالاردى جەتكىزىپ, ولاردىڭ اقاۋلارىن جوندەپ, بوياپ-سىرلاپ جاتىر.
قورعانىس مينيسترلىگى سالانىڭ قۋاتىن وزىمىزگە دە, وزگەلەرگە دە پاش ەتەتىن اۋقىمدى شاراعا ازىرلىك بارىسىن جۋرناليستەرگە تانىستىرۋ ءۇشىن 68665 اسكەري بولىمىنە مەديا-ساپار ۇيىمداستىرعان بولاتىن. ءبىر توپ جۋرناليست اسكەري پوليگون اۋماعىنا اياق باسقان ۋاقىتتا ات شاپتىرىم جەردە 120 شاتىر تىگۋلى تۇرعانىن كوردى. لاگەردىڭ شەت جاعىندا تاعى 12 شاتىردا شارۋاشىلىققا قاجەتتى زاتتار, ازىق-ت ۇلىكتەر ساقتالادى ەكەن.
جاۋىنگەرلەرگە ارنالعان ءار شاتىرعا 40 ساربازدان ورنالاسقان. ساربازدار مەن كۋرسانتتار ءساۋىر ايىنىڭ باسىنان بەرى مەكەندەپ جاتقان شاتىرلارعا باس سۇعىپ كوردىك. ولاردىڭ ارقايسىسىنىڭ ىشىندە 40 توسەك, پەش, شاش قىسقارتاتىن, كيىمدەرىن جوندەيتىن بۇرىش, ءدارى-دارمەك سالىنعان قوراپتار قويىلعان. قاتارداعى جاۋىنگەر بەرىكبول سارجانوۆ ەسىمدى جاۋىنگەردىڭ ايتۋىنشا, كەستە بويىنشا ءار شاتىرلاردا ءبىر جاۋىنگەر كەزەكشىلىك اتقارادى.
– وسى جەرگە كەلگەنىمىزگە جيىرما كۇنگە جۋىق ۋاقىت بولدى. جاۋىنگەرلەر ەڭ باستى كەرەكتەردىڭ بارىمەن جابدىقتالعان. كەستە بويىنشا ءار جاۋىنگەر 6 ساعاتتان كەزەكشىلىك اتقارادى. جىلى, ىڭعايلى, ازىق-ت ۇلىك جەتكىلىكتى. بۇل جەردە باسى ارتىق نارسەنىڭ قاجەتى دە جوق, – دەيدى ول.
پولكوۆنيك م.قاراعۇلوۆتىڭ ايتۋىنشا, جاۋىنگەرلەر كۇن سايىن تۇسكە دەيىن – 3 ساعات, تۇستەن كەيىن 3 ساعات جاتتىعادى. بۇل ولاردىڭ ساپتىق جاتتىعۋلاردى ويداعىداي مەڭگەرۋىنە, بابىندا بولۋىنا جەتكىلىكتى.
لاگەردىڭ شەتىندە ارنايى مەديتسينالىق پۋنكت تە بار. بىلىكتى اسكەري دارىگەرلەردىڭ ايتۋىنشا, ءدارى-دارمەك جەتكىلىكتى. قاجەت بولعان جاعدايدا مەديتسينالىق كومەك كورسەتۋگە ساقاداي-ساي.
قازاقستان پرەزيدەنتى, قارۋلى كۇشتەردىڭ جوعارعى باس قولباسشىسى ن.نازارباەۆتىڭ ءتيىستى جارلىعىنا سايكەس, اسكەري پارادقا جۇمىلدىرىعان جاۋىنگەرلەر جاتتىعۋدى جوسپار بويىنشا ءجۇرگىزۋدە. ءساۋىر ايىنىڭ العاشقى كۇنىندە پارادتىق ەسەپتوپتار مەن مەحانيكالىق كولوننالار جەرگىلىكتى بريگاداعا كەلىپ جەتكەن. 5 مىڭنان استام ادامنىڭ قاتارىندا وفيتسەرلەر, كەلىسىمشارت بويىنشا جۇمىس ىستەيتىن اسكەري قىزمەتكەرلەر, مەرزىمدى اسكەري قىزمەت جاۋىنگەرلەرى, اسكەري وقۋ ورىندارىنىڭ كۋرسانتتارى بار.
لاگەردەگى كۇن تارتىبىنىنە سايكەس, ساربازدار تاڭعى 6:30-دا ۇيقىدان تۇرادى. تازالانۋ, كيىنۋ, تاڭعى اس, جاتتىعۋعا دايىندىق ۋاقىتى, ءتيىستى قارۋلارىن الۋ ساعات 8:30-عا دەيىن اياقتالادى. ءۇش ساعات جاتتىعۋدان كەيىن تۇسكى اس ۋاقىتى كەلەدى. ءبىر جەرگە شوعىرلانعان مىڭداعان ادامدى ءبىر مەزگىلدە تاماقتاندىرۋ قيىنعا سوققاندىقتان, تۇسكى اس ۋاقىتى ءسال ۇزاققا سوزىلادى. ساعات 15:45-تەن كەشكى 19:30-عا دەيىنگى ارالىقتا جاتتىعۋ جۇمىستارى قايتا جالعاسادى. قۇرلىق اسكەرلەرى باس قولباسشىسىنىڭ اسكەري دايارلىق جونىندەگى ورىنباسارى, گەنەرال-مايور تالعات قويباقوۆ ساربازداردىڭ جاتتىعۋ بارىسىن ءوزى تىكەلەي قاداعالاپ, تيىسىنشە باعالايدى. گەنەرال-مايوردىڭ ايتۋىنشا, ەسەپتوپتار قازىردىڭ وزىندە ءبىرشاما جاقسى ناتيجەگە قول جەتكىزگەن.
– بۇل جاتتىعۋعا قارۋلى كۇشتەردىڭ عانا ەمەس, ۇلتتىق قاۋىپسىزدىك كوميتەتىنىڭ شەكارا قىزمەتى, ىشكى ىستەر مينيسترلىگىنىڭ ۇلتتىق ۇلانى, مەملەكەتتىك كۇزەت قىزمەتى, اسكەري وقۋ ورىندارى دا اتسالىسادى. بۇعان دەيىنگى پارادتارعا س.نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنىڭ ۇلاندارى عانا قاتىسسا, بۇل جولى ەلىمىزدەگى باسقا دا وقۋ ورىندارىنىڭ وقۋشىلارى, اسكەري-پاتريوتتىق كلۋبتاردىڭ تاربيەلەنۋشىلەرى, قورعانىس مينيسترلىگى اسكەري-تەحنيكالىق مەكتەپتەرىنىڭ شاكىرتتەرى قاتىسادى. پارادتى اسكەري اۆتوكولىكتەرگە مىنگەن ارداگەرلەرىمىز باستاپ شىعادى, – دەيدى ت.قويباقوۆ.
ساپتاعى جاۋىنگەرلەردىڭ اراسىندا نازىك جاندىلاردان جاساقتالعان روتالاردى دا بايقاعان ەدىك. ولارعا جاسالاتىن جاعداي ەر-ازاماتتاردان مۇلدە ەرەكشەلەنبەيدى دەۋگە بولادى. جالعىز جەڭىلدىك – پالاتكادا ەمەس, كازارمادا تۇراتىندىعى. سەبەبى, ولار ءبىرىنشى كەزەكتە اسكەري قىزمەتكەر, سودان كەيىن عانا قىزدار دەگەن قاعيدا قالىپتاسقان.
جالپى, اسكەري پارادتى ۇيىمداستىرۋداعى باستى ماقسات – حالىققا قارۋلى كۇشتەردىڭ قالاي دامىعانىن, ەل تاۋەلسىزدىگى مەن تۇتاستىعىن قامتاماسىز ەتۋگە ءازىر ەكەندىگىن كورسەتۋ. شەرۋگە قارۋلى كۇشتەردىڭ تاڭداۋلى اسكەري قىزمەتشىلەرى, بولىمشەلەرى ىرىكتەلگەن. اسكەريلەر حالىققا مەرەكەلىك كوڭىل-كۇي سىيلاپ قانا قويماي, ءتول اسكەرىمىزدىڭ قۋاتىن, تەحنيكالىق تۇرعىدا جابدىقتالۋىن, ەلىمىز بەن حالقىمىزدىڭ ەگەمەندىگى مەن قاۋىپسىزدىگىن كۇزەتىپ جۇرگەن اسكەري قىزمەتشىلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن كورسەتە بىلۋگە ءتيىس. استانانىڭ ىرگەسىندە پارادقا قىزۋ ازىرلەنىپ جاتقان جاۋىنگەرلەر وسى جاۋاپتى مىندەتتى لايىقتى اتقارىپ شىعۋعا ءتيىس.
ءبىر توپ ءجۋرناليستىڭ قورعانىس مينيسترلىگى ۇيىمداستىرعان مەديا-ساپار بارىسىندا كوزبەن كورىپ, كوڭىلگە تۇيگەندەرى وسى بولدى.
ارنۇر اسقار,
«ەگەمەن قازاقستان»
سۋرەتتى تۇسىرگەن ەرلان وماروۆ,
«ەگەمەن قازاقستان»