ءالماش ۇلىنىڭ مەرەيتويىن تۋعان ءوڭىرى تويلاپ وتكەنىن ايتۋ ابزال. ونىڭ ءومىرى مەن شىعارماشىلىعىنا ارنالعان دەرەكتى فيلم دە ءتۇسىرىلدى. «قازاقستان» تەلەارناسى نىڭ «دارا جول» باعدارلاماسىنا دا شىقتى. بۇل جولى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇستازدارىمەن جانە ستۋدەنتتەرىمەن جۇزدەستى.
اسەرلى ادەبي كەش جۋرناليستيكا كافەدراسى ستۋدەنتتەرىنىڭ جازۋشى شىعارماسىنان ءۇزىندىلەر وقۋىمەن باستالدى. سونان سوڭ قۇزىرەتتى ورگاندار تاراپىنان قالامگەردى قۇتتىقتاعان حاتتار شوعىرى تىڭدالدى. ەڭ الدىمەن ۇكىمەت باسشىسى مەن پرەمەر-مينيستر كەڭسەسى باسشىسى ورىنباسارىنىڭ قۇتتىقتاۋىن پرەمەر-مينيستر كەڭسەسىنىڭ باس ينسپەكتورى گۇلميرا بوتاناەۆا وقىپ بەردى. مادەنيەت ءجانە سپورت ءمينيسترىنىڭ قۇتتىقتاۋىمەن تىلدەردى دامىتۋ جانە قوعامدىق ساياسي جۇمىس كوميتەتى ءتوراعاسىنىڭ ورىنباسارى عالىمجان مەلدەشوۆ, ال ءبىلىم ءجانە عىلىم ءمينيسترى مەن ەۇۋ رەكتورىنىڭ قۇتتىقتاۋىمەن اتالمىش وقۋ ورنىنىڭ پرورەكتورى ديحان قامزابەك ۇلى تانىستىردى.
ونىڭ «ويانعان ۇرپاق» رومانى بۇگىنگى كۇن تاقىرىبىنا ارنالعان. وتىرىكتەن الىس قونۋعا تالپىنعان جاستاردىڭ وي-سەزىمدەرىندەگى, ءىس-ارەكەتتەرىندەگى ارپالىستى بەينەلەيتىن شىعارما. زاماننىڭ تامىرىن تاپ باسىپ جازۋ ءۇشىن تالانت قاجەت. ال وتكەندى زەردەلەۋگە, ءتۇسىنىكتى ەتىپ جازۋعا ءبىلىم كەرەك. مەملەكەتتىك سىيلىقتىڭ يەگەرى, جازۋشى الدان سمايىلدىڭ ارىپتەسىنىڭ شىعارماشىلىعى تۋرالى پىكىرى وسى تۇرعىدان ءوربىدى. ول ءاربىر ءجۋرناليستىڭ ساياساتتان, ءاربىر جازۋشى مەن اقىننىڭ تاريحتان حابارى بولماعى شارت ەكەنىن ايتتى. «اقىن نە جازۋشى بولعان سوڭ تاريحشى بولۋىڭ كەرەك. ەلىڭنىڭ رۋحاني مۇراسىن بىلەتىن رۋحاني زەرگەر بولۋىڭ قاجەت. حالقىڭنىڭ ءجۇرەگىندە قانداي ارمان بار ەكەنىن بىلمەسەڭ, جازۋشى بولا المايسىڭ. قىزىلوردا وبلىسىنداعى جاڭاقورعان اۋدانىنىڭ ەڭ اۋىر تاريحىن جازعان جولتاي جەرلەستەرى الدىنداعى پارىزىن وتەدى دەپ ويلايمىن. اشتىق جىلدارىندا, قۋعىن-سۇرگىن كەزەڭىندە ەل قاراتاۋدى تاستاپ, اۋعانستانعا, باسقا جاقتارعا دا ءوتىپ كەتكەن. بۇل تەك وتىزىنشى جىلدار ويرانىنان قينالعان ەلدىڭ ەمەس, رۋحى جاسىعان, داستۇرىنەن قول ءۇزىپ, ساناسىنان جاڭىلعان حالقىمىزدىڭ تراگەدياسى ەدى. وسىنى جازۋشى تەرەڭنەن تولعاپ جازدى. ال ونىڭ بۇگىننىڭ كەلبەتىن سومدايتىن تۋىندىلارى ءبىر توبە. شىن مانىندە بۇگىنگى كۇن تۋرالى جازۋ, ونى جۇرەكتەن وتكىزىپ جازۋ وتە قيىن», دەدى الدان سمايىل.
عىلىمدا دا ءىزى بار, دراماتۋرگياسى مەن پروزاسى قوس قاناتىنداي قالامگەردىڭ مەرەيتويىنا استانالىق زيالى قاۋىم كوپ جينالدى. ولار قالامگەردىڭ شىعارماشىلىعىنا قاتىستى وي-پىكىرلەرىن ارقايسىسى ءوزىنشە ورنەكتەدى. كەش بارىسىندا ستۋدەنتتەر تاراپىنان قالامگەر شىعارمالارىنان ءۇزىندىلەر وقىلدى, ءان-كۇيلەرى تارتۋ ەتىلدى.
ايگۇل سەيىلوۆا,
«ەگەمەن قازاقستان»