سەمەيدىڭ جيەنالى اۋىلدىق وكرۋگىنە قاراستى 43-ءشى شاقىرىمىندا ەرىگەن قار سۋى تاس جولدىڭ استىنداعى سۋ وتەتىن ءوتكەلدى بۇزىپ كەتكەن. جول دا ءارى-بەرى جۇرۋگە جارامسىز بولىپ تۇر. قازىر وقيعا ورنىندا قالپىنا كەلتىرۋ جۇمىستارى اتقارىلىپ جاتىر. سەمەيدىڭ زاتون بولىگىندەگى كەپتەلگەن مۇزداردىڭ بولىگى ەرتىس بويىمەن شىعىس قازاقستاننان سىرتقارى اعىپ كەتكەندىكتەن, قازىردە قاۋىپ سەيىلدى. سەمەيگە ىرگەلەس بەسقاراعاي اۋدانىنا قاراستى بىرنەشە اۋىل ءدال وسى ەرتىس جاعاسىندا ورنالاسقان.
بۇل تۇستا ەرىگەن قار سۋى مەن ءۇستى-ۇستىنە قۇيىلا جاۋعان جاڭبىر اۋدان ماڭىنداعى ەكى شاعىن وزەندى جانە جەراستى سۋلارىن تاسىتىپ جىبەردى. سوعان وراي, اۋىلدا 9 ءۇي, 10 اۋلاعا سۋ كىرىپ, 20 ادام قۇتقارىلدى. اۋدان اكىمىنىڭ مىندەتىن اتقارۋشى ەربولات راحمەتۋلليننىڭ ايتۋىنشا بۇگىندە جەدەل شتاب قۇرىلىپ, ولار كۇندىز-ءتۇنى جۇمىستار اتقارۋدا. قوسىمشا 40-50 ادام كومەككە كەلىپ, 8 تەحنيكا جۇمىلدىرىلىپ, سۋ باسقان جەرلەر تازارتىلعان. قاۋىپتى تۇستارعا 6 مىڭ توننا ينەرتتى ماتەريالدار توگىلىپتى. ءازىرگە ءتاۋلىك بويى جۇرگىزىلىپ جاتقان جۇمىستار مەن ساقتىق شارالارىنا وراي بىرلىك, جەتىجار اۋىلدارى سۋ تاسقىنىنان امان.
ەرتىستىڭ جاعاسىنداعى 500 تۇرعىنى بار كريۆينكا اۋىلىن تاسقىننان ساقتاپ قالۋ ءۇشىن وزەننىڭ مۇزىن جارۋ جۇمىستارى شۇعىل تۇردە قولعا الىندى. سەمەيدەگى توتەنشە جاعدايلار باسقارماسى مەن «شىعىسجارىلىسونەركاسىپ» مەكەمەلەرىنەن كەلگەن 16 مامان 600 كيلوگرامنان استام جارىلعىش زاتتى قالىڭدىعى 60 سانتيمەترلىك مۇزعا قويىپتى. ال 130 ۇيگە ەسكەرتۋ پاراقشالارى تاراتىلعان.
ەرتىس بويىندا جاعداي ازىرشە بىرقالىپتى.
راۋشان نۇعمانبەكوۆا,
جۋرناليست
سەمەي