توتەنشە جاعداي, اسىرەسە, اتباسار اۋدانىندا ايرىقشا سەزىلدى. ونىڭ الدىن الۋ ءۇشىن توتەنشە جاعدايلار كوميتەتىنىڭ 9 دانا تەحنيكاسى, 4 ءجۇزۋ قۇرالى جانە 46 ادامى ىسكە قىزۋ كىرىسىپ كەتتى. بۇدان باسقا, جەرگىلىكتى پوليتسيانىڭ 26 تەحنيكاسى مەن 70 قىزمەتكەرى جانە جەرگىلىكتى اتقارۋشى ورگاننىڭ 39 تەحنيكاسى مەن 154 ادامى جۇمىلدىرىلعان. جالپى, تابيعي اپات ورىن العاننان بەرگى ۋاقىتتا اتباسار قالاسىندا 454 تۇرعىن ءۇي سۋدىڭ استىندا قالدى. سۋ باسقان اۋماقتاردان 1379 ادام وزگە جەرگە كوشىرىلدى. سونىمەن قاتار, 359 باس ءۇي جانۋارى دا قاۋىپسىز جەرلەرگە اكەتىلگەندىگىن ايتا كەتۋ كەرەك.
اتباسار اۋدانىنىڭ اكىمى ا.نيكيشوۆ پلوتينا بوگەتى كۇشەيتىلمەسە زارداپ سالدارى بۇدان دا كولەمدى بولار ەدى دەگەندى باسا ايتتى. ونىڭ سەندىرۋىنشە, بۇعان دەيىن توسەلگەن توپىراق ءۇيىندىسى سۋعا ايتارلىقتاي توسقاۋىل بولا العان. بۇگىنگى تاڭدا اتباسارلىقتارعا جان-جاقتان كومەك كەلۋدە. ارنايى شتاب قۇرىلىپ, سۋ اپاتىنان زارداپ شەككەندەرگە كومەك كورسەتۋ ءۇشىن اقشا, ازىق-ءتۇلىك جانە كيىم-كەشەك جينالۋدا. سونىمەن بىرگە, مەديتسينالىق كومەك پەن پسيحولوگيالىق قولداۋ كورسەتۋ جۇمىستارى دا كەڭىنەن جۇرگىزىلىپ جاتىر.
ال تسەلينوگراد اۋدانىندا سۋ اعىزۋ جۇمىستارى كۇشەيە تۇسكەن. ياعني, سۋ ارنالارىن كەڭەيتۋ, بوگەتتەردى نىعايتۋ جانە مۇزداردان تازارتۋ قولعا الىنعان. جانە دە 1700 دانا قاپ توسەلىپ, 1200 توننا ينەرتتى ماتەريالدار جەتكىزىلگەن. تاعى ەرەكشە اتاپ كەتەرلىگى, قاتەرلى اۋماقتاردان 17 مىڭ تەكشە مەتر قارعىن سۋ سورىپ الىنعان. ارشالى اۋدانىنىڭ جىبەك جولى اۋىلىندا سۋ دەڭگەيىنە مونيتورينگ جۇرگىزىلۋدە.
جالپى قازىرگى تاڭدا ساندىقتاۋ, بالكاشينو جانە ماكسيموۆكا ەلدى مەكەندەرىندە سۋدان تازارتۋ جۇمىستارى جۇرگىزىلدى. 10 740 تەكشە مەتر سۋ سورىپ الىندى. تابيعي اپاتپەن كۇرەسۋ كەزەڭىندە توناۋشىلىق پەن قوعامدىق ءتارتىپتى قامتاماسىز ەتۋ ماقساتىندا جەرگىلىكتى پوليتسيا قىزمەتى تاراپىنان كەزەكشىلىك ۇيىمداستىرىلدى.
اسقار تۇراپباي ۇلى,
«ەگەمەن قازاقستان»
اقمولا وبلىسى