شارانى اشقان كوميتەت توراعاسى بىرعانىم ءايتىموۆا ەلباسىمىز ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ءبىلىم جۇيەسىنىڭ الدىنا جاڭا مىندەتتەر قويعانىن اتاپ ءوتتى. ماقالادا ۇسىنىلعان يدەيالار, ونىڭ ىشىندە ەرەكشە ورىن الاتىن «ءبىلىمنىڭ سالتانات قۇرۋى» يدەياسى ەلىمىزدىڭ مەكتەپتەرىنىڭ كەلبەتىن وزگەرتۋگە ءتيىس. ب.ءايتىموۆا جينالعانداردىڭ نازارىن مەملەكەت باسشىسىنىڭ «بولاشاقتا ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالادى» دەگەن سوزىنە اۋداردى.
سەنات دەپۋتاتتارى الدىندا پاۆلودار وبلىسى اكىمىنىڭ ورىنباسارى مەيرام بەگەنتاەۆ بايانداما جاسادى. سەناتتىڭ الەۋمەتتىك-مادەني دامۋ جانە عىلىم كوميتەتىنىڭ مۇشەلەرى دە ايماقتى ارالاعان ەكى كۇننەن كەيىنگى وزدەرىنىڭ كورگەن-تۇيگەندەرىمەن ءبولىسىپ, ۇسىنىستارىن ورتاعا سالدى. اتاپ ايتقاندا, دەپۋتات ۆلاديمير رەدكوكاشين كوپشىلىگى اۋىلدىق جەرلەردە ورنالاسقان شاعىن مەكتەپتەردىڭ پروبلەمالارىن شەشۋ قاجەتتىگىن اتاپ ءوتتى. «مەكتەپتەردى وڭتايلاندىرۋ وتە جاعىمسىز قۇبىلىس, ءتىپتى شالعايدا جاتقان ەلدى مەكەندەردە دە مەكتەپتەردىڭ جابىلۋىنا جول بەرمەي, ساقتاپ قالۋ قاجەت», − دەدى سەناتور.
دەپۋتاتتار ءالي بەكتاەۆ پەن نۇرلان قىلىشباەۆ مۇنداي مەكتەپتەردى ماماندارمەن جانە قارجىلاي قامتىپ, بىرنەشە پاندەردى ۇيلەستىرە وقىتىپ جۇرگەن مۇعالىمدەرگە ەڭبەكاقى تولەۋدىڭ قاعيدالارىن قايتا قاراۋعا شاقىردى. دەپۋتاتتار جابال ەرعاليەۆ پەن تولەۋبەك مۇقاشەۆ مەكتەپ وقۋشىلارىنا پاتريوتتىق تاربيە بەرۋ مەن ينتەللەكتۋالدىق جانە رۋحاني دامىتۋ ماسەلەلەرىنە, ولاردى شىعارماشىلىققا, مۋزىكا, سالت-داستۇرلەرى مەن ادەت-عۇرىپتاردى ۇيرەنۋگە تارتۋدىڭ كەلەشەگىنە توقتالدى. بايانداماشىلار, بۇل ورايدا, باسقا ايماقتار پاۆلودار وبلىسىنىڭ تاجىريبەسىن پايدالانا الاتىنىن اتاپ ءوتتى.
الەۋمەتتىك-مادەني دامۋ جانە عىلىم كوميتەتىنىڭ ءتوراعاسى بىرعانىم ءايتىموۆا سەناتورلاردىڭ ۇسىنىستارىن قورىتىندىلاي كەلىپ, پاۆلودار وبلىسىنا ساپار وزەكتى جانە جەمىستى بولدى دەپ مالىمدەدى. ساپار بارىسىندا دەپۋتاتتار 40-تان استام قالا جانە اۋىل مەكتەپتەرىنىڭ جۇمىسىمەن تانىسۋ مۇمكىندىگىنە يە بولدى. پارلامەنتشىلەر پاۆلودار, اقسۋ مەن ەكىباستۇز قالالارىندا, اقتوعاي, قاشىر, لەبياجى, ۋسپەن, شارباقتى اۋداندارىندا ۇستازدار قاۋىمىمەن, وقۋشىلارمەن كەزدەستى. دەپۋتاتتار ايماق ءبىلىم بەرۋ جۇيەسىنىڭ تابىستى جۇمىس ءىستەۋىنىڭ ۇلگىسى بولا الادى دەگەن ورتاق پىكىرگە كەلدى.
وبلىستا 3-تەن 6 جاسقا دەيىنگى بالالار مەكتەپكە دەيىنگى بىلىممەن (كەيبىر اۋدانداردا, مىسالى, اقسۋ اۋدانىندا 2-دەن 6 جاسقا دەيىنگى بالالار) تولىق قامتىلعان. ۇبت ناتيجەلەرى بويىنشا, ءتىپتى اۋىل مەكتەپتەرى جاقسى ناتيجە كورسەتتى. دەپۋتاتتار كوپتەگەن مەكتەپتەر شاحمات, روبوتتى تەحنيكا سىنىپتارىنىڭ بولعانىنا, جوعارى جىلدامدىقتى ينتەرنەتپەن, قازىرگى زامانعى سپورت جابدىقتارىمەن قامتاماسىز ەتىلگەنىنە ريزا بولدى.
ب.ءايتىموۆا ءوز سوزىندە ءبىلىم جانە عىلىم مينيسترلىگىن شاعىن مەكتەپتەر ماسەلەلەرىن ءتيىمدى شەشۋگە جانە مۇعالىمدەر ەڭبەكاقىسىنىڭ لايىقتى بولۋى شەشۋگە شاقىردى.
كوميتەتتىڭ كوشپەلى وتىرىسىنىڭ قورىتىندىلارى بويىنشا ۇستىمىزدەگى جىلعى ءىىى توقساننىڭ سوڭىندا سەناتتا «ورتا ءبىلىم بەرۋ جۇيەسىن زاڭنامالىق رەتتەۋدىڭ احۋالى, پروبلەمالارى مەن كەلەشەگى» دەگەن تاقىرىپتا پارلامەنتتىك تىڭداۋ وتكىزۋ جوسپارلاندى.