عابدول سلانوۆ اتىنداعى اتىراۋ وبلىستىق عىلىمي-امبەباپ كىتاپحاناسىندا حالىق جازۋشىسى, مەملەكەتتىك سىيلىقتىڭ يەگەرى فاريزا وڭعارسىنوۆانىڭ كابينەتى اشىلدى.
اقىن تۋعان جەردىڭ تالانتتى جاستارى وتكەن جىلى «فاريزا جۇلدىزدارى» اتتى ادەبي كلۋب قۇرعان ەدى. ولار ايماقتاعى وقۋ ورىندارىندا, مادەنيەت مەكەمەلەرىندە كەزدەسۋلەر مەن ءتۇرلى شارالار وتكىزۋدى داستۇرگە اينالدىردى. وبلىس اكىمدىگىنىڭ قولداۋىمەن ەندى اۋداندار مەن اۋىلداردى ارالاپ, ونەرلەرىن ورتاعا سالادى.
پوەزيا پاتشايىمىنىڭ قۇرمەتىنە ارنالعان كابينەتتىڭ اشىلۋ سالتاناتىندا وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى ءابىل جولامان, فيلولوگيا عىلىمدارىنىڭ دوكتورى, پروفەسسور قادىر ءجۇسىپ, اقىن, حالىقارالىق «الاش» سىيلىعىنىڭ يەگەرى قاسىمحان بەگمانوۆ, قر ەڭبەك سىڭىرگەن قايراتكەرى, جازۋشى-دراماتۋرگ راحىمجان وتارباەۆ, اۋىلشارۋاشىلىعى عىلىمدارىنىڭ دوكتورى باقتىبەك تاۋباەۆ, قوعام قايراتكەرى, «قۇرمەت» وردەنىنىڭ يەگەرى راشيلا مۇرساليەۆا, اتىراۋداعى نازارباەۆ زياتكەرلىك مەكتەبىنىڭ ديرەكتورى ايداربەك ايتپوكەشەۆتەر ءسوز الىپ, يگىلىكتى ىسكە قۇتتى بولسىن ايتتى.
كىتاپحانانىڭ كەڭ دە جارىق بولمەسىن فاريزا وڭعارسىنوۆا كابينەتى قىلىپ جاساقتاۋعا بەلگىلى مۇنايشى ەرمەك ماراباەۆ پەن اقىننىڭ ۇلى ايۆار وڭعارسىنوۆ دەمەۋشىلىك كورسەتكەن.
«بۇل ورىن تالانتتى جاستار باس قوساتىن, وڭاشادا ويلاناتىن ونەر مەن ولەڭنىڭ ۇياسى بولادى دەگەن نيەتتەمىز. اتىراۋعا الىس-جاقىننان كەلگەن ادەبيەت پەن ونەر قايراتكەرلەرىنىڭ الدىمەن ات باسىن بۇراتىن قاسيەتتى مەكەنىنە, قۇتحاناسىنا اينالدىرۋ – ماقساتىمىز», – دەيدى «فاريزا جۇلدىزدارى» كلۋبىنىڭ جەتەكشىسى, اقىن ءاليا داۋلەتباەۆا.
باقىتگۇل باباش,
«ەگەمەن قازاقستان»
اتىراۋ