جارىسقا بارلىعى 8 كوماندا قاتىستى. وندا قازاقستان سپورت ءباسپاسوزى قاۋىمداستىعى استانا قالالىق فيليالىنىڭ «جەڭىس», «ەگەمەن قازاقستان», «حابار», «قازاق راديوسى», «قازمەديا», «Sport 59», «Kazsport» جانە «اتامەكەن» كوماندالارى كۇش سىناستى.
تۋرنيردە كوماندالار ەكى توپقا ءبولىنىپ, ونەر كورسەتتى. «ا» توبىندا قازاق راديوسى, «ەگەمەن قازاقستان», «Kazsport» جانە «حابار» ۇجىمدارى ويناسا, «ۆ» توبىندا «قازمەديا», «جەڭىس», «Sport 59», «اتامەكەن» جىگىتتەرى ءوزارا كۇش سىناستى.
جارىس وتە تارتىستى جəنە قىزىقتى ءوتتى. ونى ءتۋرنيردىڭ اشىلۋ سالتاناتىندا ءسوز سويلەپ, سوعان دەيىن ويىنداردى ءوز كوزىمەن كورگەن مادەنيەت جəنە سپورت مينيسترلىگى سپورت جəنە دەنەشىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ تا ايتتى.
ەكى توپقا بولىنگەن كوماندالار ءبىر-بىرىمەن ويناپ, مىقتىلارى جارتىلاي فينالعا شىقتى. «ا» توبىندا «حابار» اگەنتتىگى مەن «ەگەمەن قازاقستان» گازەتىنىڭ كلۋبتارى ءبىرىنشى جانە ەكىنشى ورىنمەن كەلەسى اينالىمعا شىقسا, «ۆ» توبىندا «جەڭىس» پەن «Sport 59» كوماندالارى ½ فينالعا جولداما الدى.
قورىتىندىسىندا تۋرنير ۇيىمداستىرۋشى «جەڭىس» كومانداسى چەمپيون اتانسا, «حابار» ۇجىمى ەكىنشى ورىنعا تۇراقتادى. ال «Sport 59» ۇزدىك ۇشتىكتى تۇيىندەدى.
سونىمەن قاتار, ۇيىمداستىرۋ كوميتەتى جەكەلەگەن اتالىم بويىنشا ۇزدىك اتانعان ءتورت ادامعا ارنايى سىيلىق تاعايىندادى. وندا ءتۋرنيردىڭ ۇزدىك ويىنشىسى اتاعىن «حابار» اگەنتتىگىنىڭ كاپيتانى نۇرسۇلتان قۇرمان, ۇزدىك قورعاۋشى نوميناتسياسىن «ەگەمەن قازاقستان» كومانداسىنىڭ ويىنشىسى ەلتاي نۇرعازين السا, قۇماربەك ازات («جەڭىس») ۇزدىك شابۋىلشى, ايبەك قابىلشا («حابار») ۇزدىك قاقپاشى اتاندى.
ەندى بولاشاقتا قازاقستان سپورت ءباسپاسوزى قاۋىمداستىعىنىڭ استانا قالالىق فيليالى جۋرناليستەر اراسىندا جارىستىڭ بىرنەشە تۇرىنەن سپارتاكيادا وتكىزۋدى جوسپارلاپ وتىر.