ەلىمىزدەگى ونكولوگتار الدىندا تۇرعان باستى ماقسات – قاتەرلى ىسىك دەرتىنە شالدىعۋشىلار سانىن ازايتا ءتۇسۋ. وسى ماقساتقا جەتۋ جولىندا دارىگەرلەرىمىزدىڭ ءبىرشاما جەتىستىككە قول جەتكىزگەنىن ايتپاي كەتۋگە بولماس. دەگەنمەن, اتالعان سالاداعى شەشىمىن تاپپاي كەلە جاتقان ماسەلەلەردى شەشۋ جولىندا وزگە ەلدەر ماماندارىمەن تاجىريبە الماسا وتىرىپ, قاتەرلى ىسىك دەرتتەرىن, اسىرەسە باۋىردىڭ گەپاتوتسەلليۋليارلى كارتسينوماسىن ەمدەۋ ادىستەرىن جاقسارتۋدا ورتاق شەشىمدەر قابىلداۋدىڭ ماڭىزدى ەكەنى انىق. قاتەرلى ىسىك وشاعىن راديوجيىلىك ابلياتسياسى ارقىلى ەمدەۋ, ياعني باۋىرداعى جانە وزگە دە ءىشكى ءمۇشەلەردەگى قاتەرلى ىسىك وشاقتارىن جانسىزداندىرۋ ارقىلى ەمدەۋ ءتاسىلى بىرقاتار شەت مەملەكەتتە كەڭىنەن قولدانىلا باستاعانىمەن, قازاقستان ءۇشىن تىڭ ەمدەۋ ءتاسىلى بولىپ تابىلادى.
الماتى ونكولوگيالىق ورتالىعى شاقىرتقان رەسەيلىك, ۋكراينالىق, بەلورۋسسيالىق جوعارى دارەجەلى ماماندار ەكى كۇندىك شەبەرلىك سىنىبى بارىسىندا ەلىمىزدىڭ دارىگەرلەرىنە باۋىر ءىسىگىن وتاسىز ەمدەۋدىڭ از ينۆازيۆتى ءتاسىلىن ۇيرەتتى. كوپتەگەن ناۋقاستاردىڭ دەرتى سوڭعى ساتىسىنا ءوتىپ كەتكەندە عانا انىقتالىپ جاتاتىندىعى بارماق ءتىستەتكەنمەن, راديوجيىلىك ابلياتسياسى ارقىلى ەمدەۋ ءتاسىلىن سونداي اۋىر ناۋقاستار ءۇشىن دە قولدانۋعا بولادى, دەيدى شەتەلدىك ماماندار.
«الماتى ونكولوگيالىق ورتالىعى» مقك شجق باس دارىگەرى دامير ءداۋلەتباەۆتىڭ ايتۋىنشا, اتالعان شەبەرلىك سىنىپتارىنىڭ ەرەكشەلىگى – العاش رەت باۋىر راگىن كەشەندى ەمدەۋ تاسىلدەرى دە قاراستىرىلعان ەكەن, ال بۇرىن تەك جەكەلەي ەم ءتۇرلەرى عانا قاراستىرىلعان. «قازاقستاندا جىل سايىن باۋىر راگىمەن مىڭنان استام ادام تىركەۋگە الىنىپ جاتادى. باۋىر راگىنىڭ شامامەن, 60-90 پايىز جاعدايى باۋىر تسيرروزى مەن ۆيرۋستىق گەپاتيتتىڭ اسقىنۋى سالدارىنان تۋىندايدى, تسيرروزبەن اۋىراتىن ناۋقاستاردىڭ 5 پايىزىندا ءوربيدى. باۋىر راگىنا شالدىققان ناۋقاستاردىڭ شامامەن ۇشتەن ءبىر بولىگىنە وتا جاساۋعا بولادى», دەدى باس ءدارىگەر.
ال ۇلى وتان سوعىسى مۇگەدەكتەرىنە ارنالعان رەسپۋبليكالىق كلينيكالىق گوسپيتالدىڭ ديرەكتورى جەتكەرگەن ارزىقۇلوۆ وسى باسقوسۋدا جاساعان بايانداماسىندا «قازاقستاندا بىلىكتىلىگى شەتەلدىك دارىگەرلەردەن ەش كەم تۇسپەيتىن حيرۋرگتەر بارشىلىق. تەك ونكولوگتەر عانا ەمەس, گاستروەنتەرولوگتەر, ينفەكتسيونيستەر, ۋزي ماماندارى دا بىرىگىپ, باۋىرى اۋىرىپ كەلگەن ناۋقاستان اپتا سايىن اناليز الىپ, بىرگە باقىلاپ وتىرسا, اۋرۋدىڭ ىسىككە اينالىپ كەتپەۋ مۇمكىندىگىنە يە بولار ەدى. سالدارمەن كۇرەسكەننەن گورى, سەبەپپەن كۇرەس الدەقايدا ءتيىمدى بولاتىنى راس. جاقسى ءناتيجەگە قول جەتكىزۋ ءۇشىن ناۋقاستاردى تەكسەرۋدەن ءوتكىزۋ جۇيەسىن وزگەرتۋ كەرەك شىعار», دەگەن پىكىر ءبىلدىردى.
شەبەرلىك سىنىبىنا ەلىمىزدىڭ ءار وبلىسىنان ارنايى كەلگەن گەپاتولوگ, حيرۋرگ, ساۋلەلىك دياگنوستيكا ءبولىمىنىڭ ماماندارى قاتىستى.
ميرا بايبەك, «ەگەمەن قازاقستان» الماتى