بۇرىنعى تۇتىنۋشىلار قۇقىعىن قورعاۋ دەپارتامەنتى ەندى قوعامدىق دەنساۋلىق ساقتاۋ دەپارتامەنتى بولىپ قۇرىلدى. وعان ورال بەكماعامبەتوۆ جەتەكشىلىك ەتەدى. ول بۇرىن مەديتسينالىق جانە فارماتسەۆتيكا قىزمەتىن باقىلاۋ جونىندەگى دەپارتامەنتتى باسقارعان بولاتىن.
مۇنداي اۋىس-ءتۇيىس ۆەدومستۆولاردى كەزەكتى قايتا قۇرعاننان كەيىن بولدى. ەستەرىڭىزگە سالا كەتسەك, ۇكىمەتتىڭ 2017 جىلدىڭ 17 اقپانىنداعى قاۋلىسىمەن دەنساۋلىق قورعاۋ كوميتەتىن تۇتىنۋشىلار قۇقىن قورعاۋ كوميتەتىنەن شىعارۋ تۋرالى شەشىم قابىلدانعان بولاتىن. ال تۇتىنۋشىلار قۇقىن قورعاۋ پروبلەمالارى قايتادان تابيعي مونوپوليالار جانە باسەكەنى قورعاۋدى رەتتەۋ كوميتەتىنە قارايتىن بولدى. ۇكىمەتتىڭ وسى قۇجاتىمەن دەنساۋلىق ساقتاۋ جانە الەۋمەتتىك قىزمەت مينيسترلىگىنە قاراعان مەديتسينالىق جانە فارماتسەۆتيكالىق قىزمەتتى باقىلاۋ كوميتەتىن دەنساۋلىق ساقتاۋ مينيسترلىگىنىڭ فارماتسيا كوميتەتىنە بەرۋدى دە شەشىلدى.
فارماتسيا كوميتەتىنىڭ وبلىستىق دەپارتامەنتى جەتەكشىسىنىڭ ورنى ازىرگە بوس تۇر.
ءنازيرا جارىمبەتوۆا,
«ەگەمەن قازاقستان»