قارامىرزا اۋىلىندا 7 ءۇيدى اۋلاسىمەن سۋ باستى. ۇيلەردەن 10 ادام تۋىستارى مەن تانىستارىنىڭ ۇيىنە ورنالاستىرىلدى. وسىنداعى «رامازان» شارۋاشىلىلىعىنىڭ تەحنيكالارى سۋدان قۇتقارۋ جۇمىستارىنا كومەككە كەلدى. سۋ كەتەتىن 45 شاقىرىمدىق 3 ارىق قازىلدى. سۋ باسقان ۇيلەردىڭ مالى دا قۇتقارىلدى. وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, قاراسۋ اۋدانىندا مۇنان باسقا باكان, وكتيابرسكوە, كوشەۆوە جانە جەلەزنودوروجنوە ەلدى مەكەندەرىن دە قارعىن سۋ مازالاپ تۇر. تۇرعىندار قار سۋىنىڭ قارقىنى كۇشتى جانە دەڭگەيى 1,5 مەترگە دەيىن بارعانىن ايتادى. مال شىعىنى ورىن العان.قار سۋى قاراسۋ اۋدانى ورتالىعىنداعى بىرنەشە كوشە سۋدا قالدى.
ال اۋليەكول اۋدانىندا كوكتال جانە ديەۆ اۋىلدارىنا سۋ كىرگەن. وندا 15 ءۇي مەن وسىنشا ءۇيدىڭ اۋلاسى سۋ دا قالدى. ولاردان 42 ادام كوشىرىلدى, سونىمەن قاتار 45 ءىرى قارا, 81 ۇساق مال سۋدان شىعارىلدى.
سونىمەن قاتار وبلىستاعى بىرنەشە جولدار دا سۋدان زارداپ شەكتى, بىرنەشە جەردەن سۋ بۇزىپ كەتتى. ەكاتەرينبۋرگ-الماتى رەسپۋبليكالىق تاس جولىنىڭ سارىكول اۋدانى مەن سولتۇستىك قازاقستان وبلىسى شەكاراسى اراسى تاسقىن سۋ شايىپ كەتكەندىكتەن جابىلدى. قوستاناي-اۋليەكول-سۇرگەن تاس جولىنىڭ وكتيابر سەلوسى مەن قويباعار ستانساسىنا دەيىنگى اراسىن دا سۋ باستى. قازىر سۋدىڭ زارداپتارىن جويۋ جۇمىستارى جۇرگىزىلۋدە.
«ءساۋىردىڭ 15 مەن 17 ء–ى اراسىندا كۇننىڭ كۇرت جىلۋىنا, قاردىڭ جىلدام ەرۋىنە بايلانىستى سۋ تاسقىنى شەگىنە جەتتى. ەرتەڭ دە قاۋىپ بار, سوسىن قارعىن سۋدىڭ بەتى قايتادى. سۋ باسقان بارلىق ەلدى مەكەندەردە توتەنشە جاعداي دەپارتامەنتىنىڭ قۇتقارۋ توپتارى جەرگىلىكتى اتقارۋ ورگاندارى جانە شارۋاشىلىقتارمەن تىزە قوسىپ, سۋ شايعان اۋلالاردان, ۇيلەردەن ادامداردى كوشىردى, مالداردى قۇرعاققا شىعاردى. تەحنيكا جەتكىلىكتى, جۇمىستار جالعاسۋدا», دەدى وبلىستىق توتەنشە جاعدايلار دەپارتامەنتىنىڭ باستىعى تالعات كاكىموۆ.
ءنازيرا جارىمبەتوۆا,
«ەگەمەن قازاقستان»