تسەلينوگراد اۋدانىنىڭ اكىمى م.تاتكەەۆتىڭ سەندىرۋىنشە, قازىرگى تاڭدا اۋدانداعى جاعداي تۇراقتى سانالادى. رەتى كەلگەندە اۋدان باسشىسى سۋ باسۋى مۇمكىن دەگەن قوياندى, قاراوتكەل, تالاپكەر جانە نۇرەسىل اۋىلدىق وكرۋگتەرىنىڭ جاعدايىمەن جان جاقتى تانىستىرىپ كەتتى. قازىرگى كەزدە بۇل ەلدى مەكەندەردە قارعىندى سۋدى سورعىنىڭ كۇشىمەن تازارتۋ جۇمىستارى قىزۋ جۇرگىزىلۋدە. بۇدان باسقا اقمول اۋىلىنان تايتوبە اۋىلىنا دەيىنگى ارالىقتا سۋدىڭ ەركىن جىلجۋى ءۇشىن جارىلىس جۇمىستارىن جۇرگىزۋ قولعا الىنعان. اۋىلدىق وكرۋگتەردە كۇندىز-ءتۇنى كەزەكشىلىك ۇيىمداستىرىلعان. وبلىس باسشىسى بۇل رەتتە تسەلينوگراد اۋدانىنىڭ اكىمى م.تاتكەەۆكە «كازۆودحوز» رمك بىرلەسە «الۆا» كولدەتە سۋارۋ سۋ تورابىنىڭ دامباسىن قالپىنا كەلتىرۋ جونىندەگى ۇسىنىستار بەرۋدى جانە دە اقمول اۋىلىنىڭ سۋىن تەحنيكالىق ماقساتتا پايدالانۋ ءۇشىن «جالاڭاش» كولىن تولتىرۋ قاجەتتىگىن تاپسىردى.
سونداي-اق ءوڭىر باسشىسى كەنبيداي سۋ تورابىن قاراۋ بارىسىندا قورعالجىن اۋدانىنىڭ اكىمى ق.رىسكەلدينوۆقا ەلدى مەكەندەر اينالاسىنداعى دامبالاردى قوسىمشا كۇشەيتۋ جۇمىستارىن جۇرگىزۋدى ەرەكشە ەسكەرتتى. ءوڭىر باسشىسى بۇل ورايدا قارعىن سۋ باسۋ قاۋىپىنىڭ الدىن الۋعا ارنالعان تەحنيكالاردىڭ دايىندىعىن قامتاماسىز ەتۋ, بارلىق سۋدى باقىلاۋ بەكەتتەرىندەگى كەزەكشىلىكتى كۇشەيتۋ, توتەنشە جاعدايلار جونىندەگى وبلىستىق شتابتى كۇندىز-ءتۇنى اقپاراتتاندىرىپ وتىرۋ قاجەتتىگىن العا تارتتى. وبلىس باسشىسى بولىپ قايتقان اتباسار قالاسىندا سۋ دەڭگەيى 5 مەتردەن اسىپ, قالاعا ايتارلىقتاي قاۋىپ توندىرۋدە. وسىنداعى سۋ باسقان 20 ءۇيدىڭ تۇرعىندارى وزگە ورىندارعا كوشىرىلدى.
جالپى توتەنشە جاعدايدىڭ الدىن الۋ جونىندە ناقتى تاپسىرمالار بەرىلدى. بۇدان باسقا, م.مىرزالين سۋ قاۋپى ءالى دە ساقتالىپ كەلە جاتقان ارشالى اۋدانىندا بولىپ, وسىنداعى جاعدايمەن جاقىن تانىستى. اۋدان اكىمىنىڭ مالىمەتىنە قاراعاندا, جىبەك جولى اۋىلىندا ورنالاسقان «بەزىمياننايا» دامباسىنداعى جاعداي تۇراقتى. سوندىقتان دا اۋىلدى سۋ قاۋىپى جوق. دەي تۇرعانمەن, 17 دانا ارنايى تەحنيكا جۇمىلدىرىلىپ وتىر. جالپى بارلىق اۋىلدىق وكرۋگتەردە كۇندىز-ءتۇنى كەزەكشىلىك ۇيىمداستىرىلعان.
قارعىندى سۋدىڭ الدىن الۋعا جەرگىلىكتى ازاماتتىق قورعانىس, تجد قۇرىلىمدارى مەن جەرگىلىكتى ورگانداردىڭ 250 ادامى تارتىلىپ وتىر. جىبەك جولى اۋىلىن سۋ باسۋى مۇمكىندىگى داۋىس زورايتقىشتار ارقىلى تۇرعىندارعا كەڭىنەن ءتۇسىندىرىلىپ, ەۆاكۋاتسيا بولۋى مۇمكىندىگى دە ەسكەرتىلىپ كەلەدى. توتەنشە جاعداي ورىن الا قالعانداي بولسا نوۆوالەكساندروۆكا ورتا مەكتەبى مەن قۇتپان ۇلى اتىنداعى ورتا مەكتەپ بازاسىندا 2900 ورىندىق قابىلداۋ پۋنكتى دە دايىن تۇر. ءتىپتى اپاتتى ايماقتان تۇرعىنداردى الىپ كەتۋ ءۇشىن 5 اۆتوبۋس تا دايىندالىپ وتىر. ءوڭىر باسشىسى بارلىق اكىمدەر مەن جاۋاپتى قىزمەتكەرلەرگە توتەنشە جاعدايلاردا تۇرعىنداردى كوشىرۋ جانە قوعامدىق ءتارتىپتى قامتاماسىز ەتۋ قاجەتتىگىن باسا ەسكەرتتى.
اسقار تۇراپباي ۇلى,
«ەگەمەن قازاقستان».
اقمولا وبلىسى.