سايىستىڭ شىمىلدىعىن ميحايل كۋكۋشكين مەن ۋ دي اشتى. اتر جاريالاعان تىزىمگە كوز جۇگىرتسەك, ءبىزدىڭ كۋكۋشكين – 77-ءشى, ال ۋ دي – 219-شى ورىنعا جايعاسقان ەكەن. دەگەنمەن, رەيتينگتەگى الشاقتىققا قاراماستان, كەزدەسۋ تارتىستى ءوتتى. العاشقى سەتتى جەڭىسپەن باستاعان جەرلەسىمىز, كەلەسى كەزەڭدە كۇتپەگەن جەردەن قارسىلاسىنا ەسە جىبەردى. بۇل جەردە قىتايلىق سپورتشىنىڭ جانكەشتىلىگىن ايتا كەتكەن ءجون. بويىنىڭ قىسقالىعىنا قاراماستان, ول قارسىلاسىنىڭ ويلاستىرعان ءادىسىن دەر كەزىندە بايقاپ, قارسى سوققى جاساپ تا ۇلگەردى. ناتيجەسىندە, ەكىنشى كەزەڭدى ءوز پايداسىنا شەشتى. ايتكەنمەن, تاجىريبەنىڭ ارقاسىندا م.كۋكۋشكين وزىنەن ءتورت جاس كىشى ارىپتەسىنەن 6:2, 3:6, 6:3, 6:2 ەسەبىمەن باسىم ءتۇستى.
قىتاي جانكۇيەرلەرىنىڭ كوڭىلىن كۇپتى ەتكەن ءبىرىنشى كەزدەسۋدەن كەيىن, قازاقستان نامىسىن قورعاعان دميتري پوپكوعا اسپاناستى ەلىنىڭ №1 تەننيسشىسى تسزە چجان قارسى شىقتى. بىردەن ايتايىق, پوپكو 3:0 ەسەبىمەن جەڭىسكە جەتىپ, ءبىرىنشى كۇننىڭ قورىتىندىسى بويىنشا ەسەپتى 2:0-گە جەتكىزدى. الايدا, تابلوداعى كورسەتكىشكە قاراپ, جەڭىس ءبىزدىڭ تەننيسشىگە وڭاي كەلدى دەپ ايتۋعا اۋىز بارمايدى. سەبەبى, تسزو چجان العاشقى ەكى سەتتە جەڭىلگەنىنە قاراماستان, ءۇشىنشى كەزەڭدە تايتالاسىپ ءجۇرىپ كەزدەسۋدى تاي-برەيككە دەيىن جەتكىزدى. دەگەنمەن, ءبىزدىڭ تەننيسشى قارسىلاسىنان 6:3, 6:4, 7:5 ەسەبىمەن باسىم ءتۇسىپ, 1 ساعات 51 مينۋتقا سوزىلعان باسەكەگە نۇكتە قويدى.
جارىستىڭ ەكىنشى كۇنى جۇپتاسىپ ونەر كورسەتۋدە اندرەي گولۋبەۆ پەن الەكساندر نەدوۆەسوۆ باي يان مەن ماو-سين گۋنگە قارسى كورتقا شىقتى. جانكۇيەرلەردىڭ قىزۋ قولداۋىنا يە بولا تۇرا, جەرلەستەرىمىز بىردەن كەرەمەت ويىن كورسەتە العان جوق. ويتكەنى, بۇل كۇنى قىتايلىقتار ءا دەگەننەن-اق العاشقى كەزەڭدى ءوز پايداسىنا شەشە الدى. وسىلاي جالعاسا بەرەر دەپ ويلاسا كەرەك, شىعىستاعى كورشىلەرىمىز ءسال سىلبىرلىق تانىتقان ەدى, تەز ەسىن جيىپ ۇلگەرگەن گولۋبەۆ/نەدوۆەسوۆ جۇبى قاتارىنان بەس گەيمدە جەڭىسكە جەتىپ, جينالعان جانكۇيەرلەردىڭ قوشەمەتىنە بولەندى.
ۇزاق ءارى اۋىر بولعان ەكىنشى اينالىمدا ءبىزدىڭ جىگىتتەر 6:1 ەسەبىمەن باسىم ءتۇستى. قازاقستاندىقتاردىڭ ءوز جەرىندەگى سەنىمدىلىگى قارسىلاستارىن ەسەڭگىرەتىپ تاستاسا كەرەك, قىتاي سپورتشىلارى ءتورتىنشى-بەسىنشى كەزەڭدە تىپتەن ءوز دەڭگەيىندە ونەر كورسەتە المادى. قىتاي ماقتانىشتارىنىڭ ءبىرى ماو-سين كەزدەسۋ بارىسىندا قانشالىقتى ارەكەت جاساعانىمەن, ونىڭ كوپ جوسپارى ورىندالمادى. ناتيجەسىندە, 3 ساعاتقا سوزىلعان كەزدەسۋدە تورەشى 3:6, 6:1, 5:7, 6:1, 6:3 ەسەبىمەن جەرلەستەرىمىزدىڭ جەڭىسكە جەتكەنىن حابارلادى. ءسويتىپ, دياس دوسقاراەۆ جەتەكشىلىك ەتەتىن قۇراما جارىستىڭ الدا بولاتىن ەكى كەزدەسۋدىڭ ناتيجەسىنە قاراماستان, پلەي-وفف كەزەڭىنە جولداما الدى.
ءتۋرنيردىڭ سوڭعى كۇنىندە ەكى ماتچ وينالدى. العاش بولىپ كورتقا الەكساندر نەدوۆەسوۆ شىعىپ, تسزە چجانعا ەسە ءجىبەردى. ال قۇراماعا ەندى قوسىلعان 20 جاسار دميتري پوپكو 6:7, 7:5, 7:6 ەسەبىمەن جەڭىسكە جەتتى.
ءيا, جىگىتتەر ماراپاتقا لايىق بولدى. ويتكەنى, تەننيسشىلەرىمىز الەمدەگى دەۆيس كۋبوگىنىڭ پلەي-وفف كەزەڭىنە جولداما الىپ وتىر. ەندى قۇراما جىگىتتەرى بيىل كۇزدە رەسەي, حورۆاتيا, چەحيا, شۆەيتساريا, جاپونيا, كانادا, گەرمانيا, ارگەنتينا كوماندالارىنىڭ بىرىمەن نەگىزگى كەزەڭگە شىعۋ ءۇشىن باق سىنايدى.
دياس دوسقاراەۆ,
قازاقستان قۇراماسىنىڭ كاپيتانى:
– ءسوز جوق, جاقسى ماتچ بولدى, جىگىتتەر جارادى. اسىرەسە, كومانداعا جاڭادان قوسىلعان 20 جاسار دميتري پوپكو قۇراماعا ەكى ۇپاي سىيلادى. بۇل جىگىت سەنىمدى اقتادى. سوڭعى كەزدە شەتەلدىك باپكەرلەردى شاقىرىپ, قۇراماسىن كۇشەيتىپ العان قىتايعا قارسى شىعۋ وڭايعا سوقپادى. بىراق, جەڭىسكە جەتىپ, كەلەسى كەزەڭگە شىعىپ وتىرمىز. ەڭ باستىسى – وسى. از-كەم قاتەلىكتەر ورىن العانىمەن, الداعى ۋاقىتتا ونى تۇزەيتىن بولامىز. قولداۋ كورسەتكەن جانكۇيەرلەرگە مىڭ العىس. سول جانكۇيەرلەردىڭ ارقاسىندا جەڭىسكە جەتتىك.
الماس ماناپ,
«ەگەمەن قازاقستان»