«قازگيدرومەت» رمك 2017 جىلدىڭ 4-6 ساۋىرىنە ارنالعان اۋا رايى بولجامىن جاريالادى.
«قازاقستاننىڭ الداعى ءۇش تاۋلىكتەگى اۋا رايىن قارا تەڭىزدە ورنالاسقان تسيكلونعا بايلانىستى بيىك باريكالىق قولات انىقتايدى. رەسپۋبليكا اۋماعىنا قولاتپەن بىرگە اركتيكالىق سۋىق جانە ىلعالدى اۋا اعىمدارى ىلەسىپ كەلەدى. وسىعان بايلانىستى ءساۋىر ايىنىڭ باسىندا اۋا رايى وتە سۋىق بولادى», - دەلىنگەن حابارلامادا.
4-6 ءساۋىر ارالىعىندا كوپتەگەن وبلىستاردا اۋا تەمپەراتۋراسى كليماتتىق نورمادان 2-6º س-قا تومەندەيدى. جاۋىن-شاشىن مەن سۋلى قار جاۋىپ, تۇمان تۇسەدى جانە كوكتايعاق بولادى. تەك باتىستا 5 جانە 6 ءساۋىر كۇنى رەسەيدىڭ ەۋروپالىق بولىگىندەگى انتيتسيكلوننىڭ ىقپالىمەن جاۋىن-شاشىن توقتاپ, تەمپەراتۋرا جوعارىلاۋى مۇمكىن.