اياقدوپ الامانىندا جەكە-دارا كوش باستاپ, جولىنداعىسىنىڭ ءبارىن جايپاپ كەلە جاتقان «قايساردىڭ» بۇل تۋردا شالعىسى تاسقا ءتيدى. الماتىدا «قايراتپەن» كۇش سىناسقان سىر بويى فۋتبولشىلارىنىڭ تەڭ ويىنعا كونبەسكە امالى قالمادى. ەسەپتى الاڭ يەلەرى اشقانىمەن (گوۋ, 9-مينۋت), ماتچتىڭ 35-ءشى مينۋتىندا «قايساردىڭ» كاپيتانى ماقسات بايجانوۆ قارىمتا گول سوقتى.
«قايساردىڭ» سۇرىنگەنى «ورداباسىعا» ولجا بولدى. ءوز الاڭىندا «وقجەتپەسپەن» ويناعان وڭتۇستىكقازاقستاندىقتار قوناقتار قاقپاسىنا ەكى دوپ سالىپ, ءۇش ۇپايدى ولجالادى. بۇل ويىندا الەكسەي پەترۋشين كومانداسىنان تاڭات نوسەرباەۆ (57-مينۋت) پەن نيكيتا بوچاروۆ (69-مينۋت) گول سوققان بولاتىن. ءسويتىپ, ءتورت تۋردان كەيىن 10 ۇپاي جيناعان «ورداباسى» دوپ ايىرماشىلىعىنىڭ ارقاسىندا «قايساردى» ىعىستىرىپ, توپ باستادى.
ەكپىن الىپ كەلە جاتقان «ەرتىس» كۇتپەگەن جەردەن «اقتوبەگە» جول بەردى. سىرت الاڭدا ويناعانىنا قاراماستان, يگور راحاەۆ شاكىرتتەرى سەنىمدى ونەر كورسەتىپ, قارسىلاستارىن ايقىن باسىمدىقپەن جەڭدى. «ەرتىستىڭ» شابۋىلشىسى يسماەل فوفانا ماتچتىڭ 55-مينۋتىندا سوققان جالعىز دوپقا جۋنينو (64), شەستاكوۆ (73), زەنكوۆيچ (77) ءۇش گولمەن جاۋاپ بەردى. ءسويتىپ, ءۇش تۋردا جەڭىس ءدامىن تاتپاعان جانە بىردە ءبىر گول سوقپاعان «اقتوبە» ماڭىزدى ءۇش ۇپايعا يە بولدى.
بۇل تۋردا «توبىلدىڭ» اسىعى الشىسىنان ءتۇستى. ءوز الاڭىندا «تارازدى» قابىلداعان قوستانايلىقتار قاجەتتى جەڭىسكە قول جەتكىزدى. ويىن تاعدىرىن 50-مينۋتتا دجوردجە دەسپوتوۆيچ سوققان جالعىز گول شەشتى. ءسويتىپ, «توبىل» ءۇشىنشى ورىنعا كوتەرىلىپ, كوش باستاۋشىلارعا ءبىرتابان جاقىنداي ءتۇستى.
«شاحتەر» مەن «استانا» اراسىنداعى ماتچ تەمىرتاۋ قالاسىندا ءوتتى. وكپەك جەلدىڭ ءوتىندە ويناعان فۋتبولشىلار جاسىل الاڭ ۇستىندە كوسىلىپ ونەر كورسەتە المادى. العاشقى گول ويىننىڭ 63-مينۋتىندا سوعىلدى. قاراعاندىلىق ميحايل گابىشەۆتىڭ سوققىسى نىساناعا ءدوپ تيگەن. بىراق, 88-مينۋتتا جۋنيور كابانانگا ەسەپتى تەڭەستىرىپ كەتتى. ال قوسىمشا ۋاقىتتا سەرگەي سكورىح ءوز قاقپاسىنا گول سوعىپ الىپ, «استاناعا» ءۇش ۇپايدى قولدان بەردى. ءسويتىپ, وسىعان دەيىن الا-قۇلا ويناپ كەلگەن ەلوردا كلۋبى بيىلعى ماۋسىمدا تۇڭعىش رەت ۇزدىك التىلىقتىڭ قاتارىنا قوسىلدى.
كوش سوڭىنداعى «اتىراۋ» ورالدا «اقجايىقپەن» وينادى. تارتىستى وتكەن ويىندا كوماندالار قوس-قوستان گول سوعىپ, تەڭ تارقاستى. بۇل ەسەپ ولاردىڭ تۋرنير كەستەسىندەگى جاعدايىنا بالەندەي اسەر ەتە قويعان جوق. «اتىراۋ» باياعىشا ەڭ تومەنگى ورىندا.
كەلەسى – 5-تۋردىڭ ويىندارى 8 ءساۋىر كۇنى وتەدى. بۇل كۇنى «اتىراۋ» – «استانا», «اقتوبە» – «اقجايىق», «وقجەتپەس» – «ەرتىس», «تاراز» – ورداباسى», «قايسار» – «توبىل» جانە «شاحتەر» – «قايرات» كوماندالارى ءوزارا كۇش سىناسادى.
قايرات ءابىلدينوۆ,
«ەگەمەن قازاقستان»