تالدىقورعانداعى ءبىرىنشى كەزدەسۋدە جەرلەستەرىمىز 4:1 ەسەبىمەن باسىم تۇسكەن ەدى. ول كەزدە دە كورشىلەرىمىز مىقتى قۇراممەن كەلگەن. اراسىندا وليمپيا ويىندارىنىڭ جۇلدەگەرلەرى بولدى. رينگ يەلەرى بۇل جولى سول كەتكەن ەسەنى قايتارۋعا تىرىستى. ءتىپتى, جەكپە-جەك الدىندا ريو-2016 وليمپياداسىنىڭ چەمپيونى حاسانبوي دۋسماتوۆ 5:0 ەسەبىمەن ۇتامىز دەپ سۇحبات تا بەردى. دۋسماتوۆتىڭ بۇل پىكىرىمەن انتون پينچۋك قانا كەلىسكەن جوق. قالعانى جاپپاي جەڭىلدى.
الدىمەن شارشى الاڭعا 64 كيلوداعى بوكسشىلار كوتەرىلدى. «ارلانداردىڭ» نامىسىن ءدىلمۇرات ميجيتوۆ قورعادى. ول وزبەكستاندا تۇراتىن ەتنيكالىق قازاق ەلنۇر ابدىرايىموۆپەن جولىقتى. 2015 جىلعى الەم چەمپيوناتىنىڭ قولا جۇلدەگەرى بولىپ سانالاتىن ءابدىرايىموۆ ءبىزدىڭ ميجيتوۆكە ەش مۇمكىندىك بەرمەدى. تورەشىلەر ءبىراۋىزدان ەلنۇردىڭ جەڭىسىن مويىندادى (45:50, 46:49, 47:48).
ەكىنشى جۇپتا (56 كيلوعا دەيىن) جۇدىرىقتاسقان ءىلياس سۇلەيمەنوۆ تە ابۋلحاي شاراتوۆتان ايلاسىن اسىرا المادى – 0:3 (47:48, 47:48, 45:50).
ال 75 كيلوداعى وزبەك بوكسشىسى يسرويل مادريموۆ ءبىزدىڭ ساپارباي ايداروۆتىڭ وسال تۇسىن تاۋىپ, كومانداسىنا ءۇش ۇپاي سىيلادى. قورىتىندى ەسەپ – 0:3 (45:50, 45:50, 46:49).
قازاقستان كومانداسىنىڭ جالعىز جەڭىسى انتون پينچۋككە تيەسىلى. بيىلعى ماۋسىمدا ءۇشىنشى رەت شارشى الاڭعا شىعىپ وتىرعان انتون ءوز سالماعىنداعى رەيتينگتە كوش باستاپ تۇر. بۇل جولى ول زۋحريددين ماحكاموۆتى وڭاي جەڭدى. قورىتىندى ەسەپ – 3:0 (50:45, 50:45, 49:46).
سوڭعى بولىپ شارشى الاڭعا ريو وليمپياداسىنىڭ چەمپيونى, ۆەل باركەر كۋبوگىنىڭ يەگەرى حاسانبوي دۋسماتوۆ پەن قازاق بوكسشىسى تەمىرتاس ءجۇسىپوۆ كوتەرىلدى. تورەشىلەر دۋسماتوۆتىڭ جەڭىسىنە ەش كۇمان كەلتىرمەدى. ءسويتىپ, 4:1 ەسەبىمەن وزبەك كومانداسى «ارلانداردان» ەسە قايتاردى.
بەك تولەۋوۆ,
جۋرناليست
استانا