كەزدەسۋدە ك.ءماسىموۆ مەملەكەت باسشىسىنا ۇلتتىق قاۋىپسىزدىك كوميتەتىنىڭ وزگە قۇقىق قورعاۋ ورگاندارىمەن بىرلەسىپ, «ەكسپو-2017» حالىقارالىق كورمەسىنە دايىندىق اياسىندا قاۋىپسىزدىكتى قامتاماسىز ەتۋگە باعىتتالعان ءتيىستى شارالاردى اتقارىپ جاتقانىن باياندادى, دەپ حابارلايدى اقوردانىڭ رەسمي سايتى.
قازاقستان پرەزيدەنتى الداعى ۋاقىتتا «ەكسپو-2017» كورمەسىمەن قاتار الەمدىك دەڭگەيدەگى باسقا دا اۋقىمدى شارالار وتەتىنىن ەسكە سالدى.
– بيىل بىرقاتار حالىقارالىق ءىس-شارالار بولادى. مەملەكەتتەر مەن ۇكىمەتتەر باسشىلارى, پارلامەنت مۇشەلەرى, سونداي-اق شەت ەلدەردەن جانە ءوز ەلىمىزدەن تۋريستەر كوپتەپ كەلەدى دەپ جوسپارلانىپ وتىر. وسىعان وراي, سول ءىس-شارالاردىڭ ءتيىستى دەڭگەيدە ۇيىمداستىرىلۋىن قامتاماسىز ەتۋ ماسەلەلەرىن پىسىقتاۋ قاجەت. ەڭ الدىمەن قاۋىپسىزدىك ماسەلەسىنە نازار اۋدارۋ كەرەك, – دەدى نۇرسۇلتان نازارباەۆ.
سونداي-اق, مەملەكەت باسشىسى باسقا ەلدەردە بولىپ جاتقان تەررورلىق اكتىلەرگە توقتالىپ, ونداي جايتتارعا جول بەرمەۋ ءۇشىن ءتيىستى جۇمىستار جۇرگىزۋ, سونىڭ ىشىندە شەت ەلدەردەگى ارىپتەستەرمەن ءوزارا ءىس-قيمىل ورناتۋ قاجەتتىگىن ايتتى.
ك.ءماسىموۆ ەلباسىعا مۇنداي اۋقىمداعى ءىس-شارانىڭ قاۋىپسىز ءوتۋى, سونداي-اق تەرروريزممەن جانە ءدىني ەكسترەميزممەن كۇرەس ۇلتتىق قاۋىپسىزدىك كوميتەتىنىڭ, باسقا دا قۇقىق قورعاۋ ورگاندارىنىڭ ۇدايى باقىلاۋىندا بولاتىنى جونىندە مالىمدەدى.