كەزدەسۋ بارىسىندا تاراپتار قازاقستاننىڭ اۋىل شارۋاشىلىعى ونىمدەرىنىڭ قىتاي نارىعىنا كىرۋى مەن شەكتەۋلەردى الۋ ماسەلەلەرىنىڭ بىرقاتارىن تالقىلادى. اتاپ ايتقاندا, قىتاي تاراپى قحر-دىڭ جەتكىزۋشى كومپانيالار رەەسترىنە ەنگىزۋ ءۇشىن ا.ج. ساۋىردە قوي ەتىنىڭ ءوندىرىسى جۇيەسىن جانە ەت وڭدەۋشى كاسىپورىنداردى ينسپەكتسيالايتىنىن راستادى. ەكى جاق تا قازاقستاننان قىتايعا ەكسپورتتالاتىن 34 ونىمگە قاتىستى ۆەتەرينارلىق جانە فيتوسانيتارلىق تالاپتار حاتتامالارى جوبالارىن كەلىسىمدەۋ ۇدەرىسىن جىلدامداتاتىن بولدى. سونداي-اق, قازاقستان تاراپى ەل اۋماعىندا اۋىل شارۋاشىلىعى ونىمدەرىنىڭ ساپاسى مەن قاۋىپسىزدىگىن باقىلاۋعا ارنالعان بىرىككەن لابوراتوريا قۇرۋ جانە ونى تىركەۋ باستاماسىن كوتەردى, دەپ حابارلايدى قر اۋىل شارۋاشىلىعى مينيسترلىگىنىڭ ءباسپاسوز قىزمەتى.
ايتا كەتەيىك, كەزدەسۋ قورىتىندىسى بويىنشا كورشىلەس ەلگە ەكسپورتتالاتىن بيداي كەبەگى پارتيالارىنا قويىلاتىن ينسپەكتسيا, كارانتين جانە سانيتارلىق تالاپتار تۋرالى حاتتاماعا قول قويىلدى.
اتالعان كەلىسىمنىڭ ارقاسىندا قازاقستاندىق بيزنەسمەندەر تۇڭعىش رەت قىتاي نارىعىنا بيداي كەبەگىن ەكسپورتتاۋعا قول جەتكىزدى جانە دە بۇل ءۇردىستى العاشقىلاردىڭ ءبىرى بولىپ جۇزەگە اسىرۋ مۇمكىندىگى «HUOERGUOSI IRBIS INTERNATIONAL TRADING CO LTD» كومپانياسىنىڭ ۇلەسىنە ءتيىپ وتىر.
ءوز كەزەگىندە, كومپانيانىڭ باس ديرەكتورى مارات داۋلەتقاليەۆ وسىنداي ءتيىمدى شەشىمدەردىڭ استىق ەكسپورتىنا سەرپىن بەرەتىنىن اتاي وتىرىپ, سىندارلى كەلىسىم ءۇشىن كاسىپكەرلەر اتىنان قازاقستان ۇكىمەتىنە العىس ءبىلدىردى.
ەسكە سالا كەتەيىك, ەكى كۇندىك جۇمىس ساپارىنىڭ اياسىندا قحر اۋىل شارۋاشىلىعى مينيسترلىگى, قحر حالىقارالىق ساۋدا-ساتتىققا اتسالىسۋ كوميتەتى, قحر كوممەرتسيا مينيسترلىگى باسشىلىعىمەن جانە دە جەرگىلىكتى بيزنەس قاۋىمداستىعى وكىلدەرىمەن كەزدەسۋلەر ءوتىپ, ەكى ەلدىڭ الىس-بەرىسى ءۇشىن اسا ماڭىزدى بىرقاتار ماسەلەلەر شەشىمىن تابادى دەپ كۇتىلۋدە.