وتىرىستى اشقان «نۇر وتان» پارتياسى توراعاسىنىڭ ءبىرىنشى ورىنباسارى 2006 جىلى مەملەكەت باسشىسى ءوزىنىڭ اۋقىمى جاعىنان تەڭدەسى جوق اكىمشىلىك رەفورمالاردىڭ باستاۋ الۋىنا سەرپىن بەرگەنىن ەسكە سالدى. سول كەزدە پرەزيدەنت تارازىنىڭ ءبىر باسىندا مەملەكەتتىك قىزمەت الۋشىلاردىڭ مۇددەسى, سونداي-اق, وزىق حالىقارالىق ءتاجىريبەلەر ەسكەرىلگەن كورپوراتيۆتىك باسقارۋ, اشىقتىق پەن ەسەپتىلىك قاعيداتتارى تۇراتىن مەملەكەتتىك باسقارۋدىڭ ساپالى جاڭا ۇلگىسىن قۇرۋعا كىرىسكەنىمىزدى اتاپ وتكەن بولاتىن. ناتيجەسىندە, ءبىزدىڭ ەل پوستكەڭەستىك كەڭىستىكتە ءبىرىنشى بولىپ «مەملەكەتتىك قىزمەت تۋرالى» زاڭ قابىلدادى جانە مەملەكەتتىك قىزمەت ىستەرى ءجونىندەگى ارنايى وكىلەتتى ورگان قۇردى.
«بۇل ماسەلەگە ايرىقشا ءۇڭىلۋ قاجەتتىلىگى مەملەكەتتىك اپپاراتتىڭ ساپالى قىزمەتى ەلدىڭ تۇراقتى دامۋىن قامتاماسىز ەتەتىن جانە ۋاقىتتىڭ جىلدام وزگەرىپ وتىراتىن سىن-تەگەۋرىندەرىنە دەر كەزىندە جاۋاپ قايتاراتىن شەشۋشى فاكتورلاردىڭ ءبىرى بولىپ تابىلاتىنىمەن بايلانىستى بولىپ وتىر», – دەدى ءوز سوزىندە مۇحتار قۇل-مۇحاممەد.
سونداي-اق, «نۇر وتان» پارتياسى توراعاسىنىڭ ءبىرىنشى ورىنباسارى: «بيىلعى جىلى مەملەكەت باسشىسىنىڭ باستاماسىمەن قازاقستان كونستيتۋتسياسىنا تاريحي تۇزەتۋلەر ەنگىزىلدى. ول مەملەكەتتىك باسقارۋدىڭ تۇبەگەيلى جاڭا ۇلگىسىنىڭ نەگىزىن قالادى. اتقارۋشى بيلىكتىڭ وكىلەتتىگى ايتارلىقتاي ۇلعايدى, سونىمەن بىرگە, بارلىق دەڭگەيدەگى مەملەكەتتىك قىزمەتكەرلەردىڭ جاۋاپكەرشىلىگى كۇشەيدى. سوندىقتان ساپالى جاڭا اپپاراتتى قالىپتاستىرۋ جونىندەگى ەلباسى العا قويعان مىندەتتەر مۇلتىكسىز ورىندالۋعا ءتيىس. بىزگە زاڭدىلىقتى قاتاڭ ساقتايتىن, كاسىبي جاعىنان بىلىكتى جانە جاۋاپكەرشىلىگى زور مەملەكەتتىك قىزمەتكەرلەر كەرەك», – دەدى.
بۇعان قوسا, جيىندا كاسىبي مەملەكەتتىك اپپاراتتى قالىپتاستىرۋ بەس ينستيتۋتتىق رەفورمانىڭ ءبىرىنشى باعىتى ەكەنى ايتىلدى. ماسەلەن, «100 ناقتى قادام» ۇلت جوسپارىنىڭ وسى ماسەلەگە ارنالعان 15 قادامىنىڭ 11-ءى تولىق جۇزەگە اسىرىلعان. اتاپ ايتقاندا, «مەملەكەتتىك قىزمەت تۋرالى» جاڭا زاڭنىڭ ارقاسىندا مەريتوكراتيا, ياعني اناعۇرلىم لايىقتى جانە كاسىبي مامانداردى باسشىلىق قىزمەتكە ىلگەرىلەتۋ قاعيداتىنا نەگىزدەلگەن مانساپتىق ءوسۋدىڭ جاڭا ۇلگىسى ەنگىزىلدى. ءناتيجەسىندە, 2016 جىلى 6 مىڭنان استام مەملەكەتتىك قىزمەتكەردىڭ مانسابى جوعارىلادى. بۇل 2015 جىلعىمەن سالىستىرعاندا 4 ەسە كوپ. بۇدان بولەك, كوماندالىق اۋىسۋدى ايتارلىقتاي دەڭگەيدە ازايتۋعا قول جەتكىزىلگەن. ماسەلەن, وتكەن جىلى ول 2015 جىلمەن سالىستىرعاندا 18 ەسەگە دەيىن كەمىپتى.
ءىس-شارا اياسىندا ءسوز العان مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ توراعاسى قايرات قوجامجاروۆ پارتيالىق تىڭداۋ بارىسىندا مەملەكەتتىك اپپاراتتى جاڭعىرتۋ تۋرالى ەگجەي-تەگجەيلى اڭگىمەلەپ بەردى. «ەلباسىمىز قولعا العان جاڭعىرتۋ ۇدەرىستەرى ىشىندەگى «100 ناقتى قادام» ۇلت جوسپارى بويىنشا ءبىرىنشى باعىت ءبىزدىڭ اگەنتتىككە جۇكتەلگەن. دەپۋتاتتاردىڭ قولداۋىمەن زاڭ قابىلداندى. 1 جىلداي سول زاڭنىڭ تالاپتارىنا سايكەس جۇمىس اتقارىپ كەلەمىز. ارينە, وسى ۋاقىتتىڭ ىشىندە بىرقاتار وزەكتى ءماسەلەلەر ايقىندالىپ وتىر. ال ول ماسەلەلەردى ءبىز بۇكىل حالىق بولىپ شەشۋىمىز كەرەك. ەڭ باستىسى, ول – حالىقتىڭ بيلىككە دەگەن سەنىمى. ەكىنشىدەن, مەملەكەتتىك ورگانداردىڭ حالىقتىڭ مۇددەسىنە جانە ەلباسىنىڭ ستراتەگيالىق ماقسات-ءمىندەتتەرىنە ساي جۇمىس اتقارۋى», – دەدى قايرات قوجامجاروۆ.
سونداي-اق, جيىن بارىسىندا مەملەكەتتىك قىزمەت سالاسىنداعى وزگەرىستەرگە قاتىستى وي-پىكىرلەر ايتىلدى. دالىرەگى, مانساپتىق ىلگەرىلەۋ بىلىكتىلىك تالاپتارىنا بايلانىستى جۇزەگە اساتىنى, بۇل كاسىبي مەملەكەتتىك اپپاراتتى جاقسارتۋعا مۇمكىندىك بەرەتىنى اتاپ كورسەتىلدى. بۇعان قوسا, مەملەكەتتىك قىزمەتشىنىڭ تەك قىزمەت ءوتىلى عانا ەمەس, سونىمەن قاتار, ونىڭ شەشىمدەردى قابىلداي ءبىلۋى, ەگەر, ول باسشى بولسا, ۇجىمدى باسقارا الۋى, ونى بەلگىلى ءبىر ماقساتتارعا ىنتالاندىرا الۋى سەكىلدى بىلىكتىلىكتەرى نازارعا الىندى.
پارتيالىق تىڭداۋدى قورىتىندىلاي كەلە, «نۇر وتان» پارتياسى توراعاسىنىڭ ءبىرىنشى ورىنباسارى ەل پرەزيدەنتى بەلگىلەپ بەرگەن مەملەكەتتىك قىزمەتتى رەفورمالاۋدىڭ تۇپكى ماقساتى حالىق پەن مەملەكەت ءمۇددەسىن بارىنەن جوعارى قوياتىن كاسىبي مەملەكەتتىك اپپارات قالىپتاستىرۋ بولىپ تابىلاتىنىن اتاپ ءوتتى.
ءلايلا ەدىلقىزى,
«ەگەمەن قازاقستان»