وسىعان دەيىن قوس تاراپ جەكپە-جەك جونىندە كەلىسسوزدەر جۇرگىزىپ جاتقانى بەلگىلى بولدى. ورتاق ىمىراعا كەلەر بولسا, بوكس كەشى استانا قالاسىندا EXPO-2017 كورمەسىنىڭ اياسىندا ءوتۋى مۇمكىن.
ءوز كەزەگىندە دجو سوندەرس گولوۆكينمەن قازاقستاندا جۇدىرىقتاسۋعا دايىن ەكەنىن ءارى كەلىسىمشارتتى تەزىرەك ۇسىنۋى كەرەكتىگىن مالىمدەدى. سەبەبى, قالىپتى دەڭگەيىنە شىعۋ ءۇشىن جاتتىعۋعا كىرىسۋى قاجەت ەكەنىن العا تارتتى.
«قازىر كەلىسىمشارتتى كۇتىپ وتىرمىن. گولوۆكيننەن ازىرگە ەشقانداي حابار جوق. وسى اپتانىڭ سوڭىنا دەيىن عانا كۇتەمىن. ەگەر بىرنەشە كۇننىڭ ىشىندە ەشنارسە وزگەرمەسە, پروموۋتەرىم فرەنك ۋوررەنگە باسقا قارسىلاس ىزدەۋىن سۇرايمىن. ارتىق سالماعىم بولىپ, قالىپتى دەڭگەيىمدە بولماعان كەزدەرى مەنى شارشى الاڭعا شاقىراتىندار كوبەيىپ كەتەدى, ال ءبارى ءوز ورنىنا كەلگەندە كۇش سىناسقىسى كەلەتىن ادام تاپپاي قالامىن», – دەدى بريتان بوكسشىسى.
«كەلىسىمشارت ماسەلەسى تەزىرەك اياقتالسا ەكەن دەيمىن. ءوز كارەرامدى ارى قاراي ورلەتۋىم كەرەك. ورتا سالماقتاعى بارلىق بەلبەۋلەردىڭ باسى قوسىلعان جەكپە-جەك وتكىزۋ كىمگە بولسىن ارمان. مۇنداي ايقاس وتكىزگىم كەلەتىنىن جاسىرمايمىن. وسى ءۇشىن قازاقستانعا بارۋعا دايىنمىن. گولوۆكيننىڭ مەنىمەن كۇش سىناسقىسى كەلەتىنىن ناقتىراق بىلگىم كەلەدى», – دەدى سوندەرس.
«مەنىڭ بىلۋىمشە, بوكس كەشىن قازاقستاندا وتكىزۋدىڭ بەلگىلى ءبىر سەبەپتەرى بار. بۇعان ەشقانداي قارسىلىعىم جوق. قايتا وزگە ەلدە جاقسىراق جۇدىرىقتاسامىن. تريبۋناداعى جانكۇيەرلەردىڭ قارسىلاسىمدى قولداۋى ماعان كەرى اسەرىن تيگىزبەيدى», – دەدى ول.
«كوبىسى گولوۆكيننىڭ سوڭعى ايقاسىن كورىپ, ونىڭ شاما-شارقىنا شەك كەلتىرىپ ءجۇر. قازاقستاندىق بوكسشىنىڭ جاسى كەلگەنىن ءارى بۇرىنعى دەڭگەيدە ەمەستىگىن جارىسا ايتۋدا. بىراق ول بىلىكتى سپورتشىلاردىڭ ءبىرى. ءوزىنىڭ كۇشىن الدەقاشان دالەلدەپ قويعان. ارينە, ونىمەن كەزدەسۋىمىز وتەتىن بولسا, قاتەلىك جىبەرمەۋىم قاجەت. قولىمنان كەلگەننىڭ ءبارىن جاساۋعا دايىنمىن. گەنناديدى قالاي جەڭۋ كەرەكتىگىن جاقسى بىلەمىن», – دەدى بيللي دجو سوندەرس.
«GGG وسىعان دەيىن مەنىڭ ەسىمىمدى اتاپ بىرنەشە رەت ازىلدەگەنىن بىلەمىن. «بريتان بوكسشىلارى قالام ۇستاۋدى ۇمىتىپ قالعان, سوندىقتان كەلىسىمشارتقا قول قويعىسى كەلمەيدى», دەگەن. بىراق مىنە, مەن وسى ءىستى شەشىپ, ناقتى كۇندى بەلگىلەۋ ءۇشىن الدىنا كەلىپ تۇرمىن. ونىڭ بارلىق شارتىنا كەلىسىپ, ءوزىم ەشنارسەنى تالاپ ەتپەدىم. ولارعا تەك قانشا اقشا العىم كەلەتىنىن جەتكىزدىم. گەنناديدىڭ وكىلدەرى كەلىستى, بار تالابىم سول عانا», – دەدى بريتان بوكسشىسى.
«مەندە ورتا سالماقتاعى بەلبەۋدىڭ ءبىرى بار ەكەنىن ۇمىتپايىق. ونى ورتاعا قويۋعا دايىنمىن. ەگەر گەننادي بۇل جەكپە-جەكتى قالاسا, مەن بارىنە دايىنمىن», – دەدى سوندەرس.
وسىعان دەيىن ESPN تەلەارناسىنىڭ ساراپشىسى دەن رافاەل بۇل بوكس كەشىنەن گولوۆكيننىڭ قانشا پايدا تابۋى مۇمكىن ەكەندىگىن مالىمدەدى. ونىڭ ايتۋىنشا قازاقستاندىق بىلعارى قولعاپ شەبەرى 10 ميلليون دوللار كولەمىندە سىياقى الماق. دەنيەل دجەيكوبسپەن ايقاسىندا وعان 2,5 ميلليون دوللار بەرىلگەن. ال ەڭ جوعارعى سىيقاسىن بىلتىر كەلل برۋكپەن ايقاسىندا العان, ياعني 4 ميلليون دوللاردان استام سومانى قۇرايدى.
گولوۆكين سوندەرسپەن جەكپە-جەك جونىندە ورتاق كەلىسىمگە كەلە الماسا, ورنىنا باسقا بوكسشىنىڭ تابىلعانى دا بەلگىلى بولدى. ول – ەكىنشى ورتا سالماقتاعى IBF تيتۋلىنىڭ يەگەرى دجەيمس ديگەيل.