شىبىن-شىركەيدىڭ جاز تۋا باس كوتەرتپەي قاپتاپ كەتۋىن ەلىمىزدىڭ ەكونوميكا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتى «ۇلتتىق ساراپتاما ورتالىعى» ماماندارى كەلىپ زەرتتەمەك. ال جاندىكتەردى ۋلاۋ جۇمىستارىمەن «بيوفارم» جشس اينالىسادى.
– سوندىقتان, قاراجات وتكەن جىلعىمەن سالىستىرعاندا 4 ەسە ءوستى. بۇل ۋلاۋ شارالارى جانە عىلىمي ىزدەنىستەرگە دە بولىنەدى. قاجەتتى دارىلىك پرەپاراتتار مەن قىزمەتتەردى ساتىپ الۋ جونىندەگى كونكۋرس وتكەن جىلدىڭ جەلتوقسان ايىندا جاريالانعان-دى. كونكۋرس جەڭىمپازى جۇمىستى جىلداعىداي شىركەي قاپتاعان كەزدە ەمەس, 1 ساۋىردەن باستايدى. اتالعان جۇمىستاردى ەرتىس وزەنىنىڭ اعىسى بويىنشا شىعىس قازاقستان وبلىسىنان باستاپ, رەسەي شەكاراسىنا دەيىن جۇرگىزەمىز, – دەيدى وبلىستىق ءماسليحات حاتشىسى ۆلاديمير بەركوۆسكي.
ارنايى قۇرىلعان كوميسسيا مۇشەلەرى مەن وبلىستىق ءماسليحات دەپۋتاتتارى ەندى اۋىلدارعا بارىپ, شىبىن-شىركەيدىڭ جايىن وزدەرى زەرتتەپ بىلمەك. وبلىستاعى اقتوعاي, جەلەزين, ەرتىس, قاشىر, لەبياجى, ماي جانە پاۆلودار اۋداندارىندا جۇرگىزىلەتىن جۇمىستار عىلىمي توپتىڭ ۇسىنىسى بويىنشا ءساۋىر ايىندا باستالماق.
فاريدا بىقاي, «ەگەمەن قازاقستان»
پاۆلودار